Read Banggai BANGAITAN 27 Bible Online

BANGAITAN 27 - Banggai bible

BANGAITAN 27

¹Zelafehat daano kolima kona pau boineno, doiyamo Mahla, Noa, Hogla, Milka tukon Tirza. Zelafehad tamano doiyamo Hefer, Hefer tamano doiyamo Gileat. Gilead tamano doiyamo Makhir, Makhir tamano doiyamo Manasye, tukon Manasye tamano doiyamo Yusuf.

²Zelafehat napau molimadoo ampakon mangadap doi Musa, tukon imam Eleazar tukon katua-katua tukon sasaibino komian mo daanoon pototongi doi lolanian ko TEMENENO Na Sandung tataapono. Yanila nabantilano,

³“Kotamanggami mate doi padang lalomo tukon yana akiyo kona pau malaneno. Yana bolikon Korah napololaing monggimoliiyo ko TEMENENO. Tamanggamidoo mate sabab nalalim susuungo.

⁴Bai bulando kosambuno sio lapus luwedoi bangsa Israel sabab yana akiyo kona keturunan mala-malane? Beenggamimo buta pusaka posinggat-singgat tukon tamanggami utuso.”

⁵Maka Musa pelenggene yanila napalakaladoo doi TEMENENO,

⁶tukon ko TEMENENO bantile doi Musa,

⁷ “Oila Zelafehat napau-pau nabinantiloo takainomo pantas. Jadi beenamo yanila buta pusaka posinggat-singgat tukon tamanoila utuso. Zelafehat napusakadoo sio nabineekon doi napau-pau boineno.

⁸Bantilekai doi bangsa Israel baikon kalu daano komeeng komala-malane mate tukon akiyo kona pau malaneno, maka kona buta pusaka sio nabineekon doinapau boineno.

⁹Kalu yana akiyo kona pau boineno, ko buta pusaka bineekon doi utuso malane.

¹⁰Kalu yana akiyo ko utuso malaneno, dona butadoo bineekon doi napinatama.

¹¹Kalu yana akiyo koutuso malane, tukon akiyo koidan ko tamano utuso malane, dona butadoo teali pulino moloolani tuuno komo alayo luwedoi nabapulian.” Ketentuanoo sio Israel miano naloingiyo bunom koaturan ukum TEMENENO moparentakene lolodoi Musa.

¹² TEMENENO bantile doi Musa, “Tolibomo doi bunggul Abarim, tukon luwe idoo mbalenge kai kolipu naikon yaku mobeekene doi Israel miano.

¹³Sambuno lapa mombalenge, ikoo naikon mate pokakana komu piipi Harun,

¹⁴sabab doi Zin padang lalomo komuyu looluakon lapamo tumbokiiyo Daku parentah. Tempodoo doi Meriba sasaibino korayat nggimolii yaku, sabab aki poiyase nyatakanggene Daku kuasaan doi yanila salaano tentang, dopaisudoo.” (Kadadianoo teali doi paisu matano Meriba doi Kades, doi Zin padang lalomo.)

¹⁵Maka Musa sambeang,

¹⁶“Oh, TEMENENO, Mian Bisa mo beena tuboan doi sasaibino komo tubo, yaku kabiyo, tudoyomo komeeng komian mo moola katuaiyo nabangsa nia,

¹⁷ meeng komian moola teali talenga doi napopolobosian. Inai batadikene komumian nia pokakana kodomba badaang moakiyo konapototoolii.”

¹⁸ TEMENENO bantile doi Musa? “Uangemo Yosua, Nun napau. Yana meeng komian pandoy. Abesemo kolimamu doi oluno.

¹⁹Sumboliiyomo yana nakokondong doi Imam Eleazar salaano tukon sasaibino komian. Yanila doi salaano sasaibino sio naumumkanggene baikon Yosua doiyamo komo soboliyo ikoo.

²⁰Salaakanggenemo doi yana kosoobos mo luwedoi mukakuasaan sulano ko Israel miano taatiyo yana.

²¹ Yosua sio namangkabi otunggul moluwedoi Imam Eleazar, tukon Eleazar sio namansadaikene daku mongiasan tukon napake Ulim tukon Tumim. Tukon do kokubaidoo Eleazar katuaiyo Yosua tukon sasaibino ko bangsa Israel doi sasaibino kopalakala lalomo mo sasalaane.”

²²Musa lakukanggene pokakana ko TEMENENO napinarentakon doi yana. Yana sumboliiyo Yosua kokondong doi Imam Eleazar salaano tukon sasaibino komian.

²³ Maka yana abesemo kolimano doi Yosua oluno bungkono tukon umumkanggenemo baikon Yosua doiyamo koposobolino, pokakana ko TEMENENO nabinantil doi yana.