Read Banggai BANGAITAN 28 Bible Online

BANGAITAN 28 - Banggai bible

BANGAITAN 28

¹TEMENENO sumboliiyo Musa

²mopelenggene doi bangsa Israel baikon yanila sio napalaatikanggene tukon monondok sulano doi tempo-tempo motinantukanggon yanila sio namososubakon sosubakon-sosubakon buno kinaan mo sananggene ko TEMENENO noano.

³Naiyamo kososubakon mo sio nasinosubakon doi TEMENENO: Tuuk sosuba, lua kodomba napau langgilo konaumur meeng ko taun mo akiyo kona sesel;

⁴komeeng tuuk sosubakon dowa-dowa, tukon komeeng koidan tuuk sosubakon kinobian.

⁵Posinggat-singgat tukon domba napaudoo sio nasinosubakon tukon meeng kokilogram kotarigu mosinambul tukon meeng koliter kozaitun lisisono momonondok tuuno.

⁶Doiyamo kososubakon mosinua tumbe doi tumbeno luunggon mosinosubakon doi Bunggul Sinai tukon tinatapkanggono sidutu-posidutukon. Koboono sanaanggene ko TEMENENO noano.

⁷Posinggat-singgat tukon dodombadoo napaudoo sio nasinosubakon koidan komeeng koliter koanggur paisuno mokinundongiikon doi balabaan bungkono.

⁸Domba pauno motuuk sosubakon kinobian sio nasinosubakon tukon kokubai mo pokakana kososubakon dowa-dowa, linolaing anggur paisuno. Dososubakonoo mosinua koboono sanaanggene ko TEMENENO noano.

⁹ Doi oloyo Tadean sio nasinosubakon kolua kodomba napau langgilo konaumur meeng kotaun moakiyo kona sesel, lua kokilogram kotarigu mosinambul zaitun lisisono tuuk sosubakon mokinaan tukon sosubakon anggur paisuno.

¹⁰Sosubakon mosinuadoo sio nasinosubakon sasamba kooloyo Tadean salaku posuungi sosubakon oloyo biasa posinggat-singgat tukon sosubakon naanggur paisuno.

¹¹Doi natambuunan sasamba kobituwon sio nasinosubakon doi TEMENENO kososuba mosinua buno lua kosapi langgilo mongula, meeng kodomba langgilo, pitu kodomba pauno langgilo konaumur meeng kotaun, suwe-suwele moakiyo kona sesel.

¹²Salaku sosubakon mokinaan sio nasinosubakon kotarigu mosinambul zaitun lisisono; lua kokilogram kotarigu tuuk doi memeeng ko sapi langgilo; lua kokilogram kotarigu tuuk doi domba langgilo,

¹³tukon meeng kokilogram kotarigu tuuk memeeng kodomba napau langgilo. Sosuba mosinuadoo buno sosuba mokinaan, tukon koboono sanaanggene ko TEMENENO noano.

¹⁴Posinggat-singgat tukon sosubakon mosinuadoo sio nasinosubakon koidan kososubakon anggur paisuno, lua koliter kona kadaang tuuk memeeng kosapi langgilo, meeng maka sembeleng koliter tuuk doi domba langgilo, tukon meng koliter tuuk memeeng kodomba napau. Doiyamo koaturano tentaang sosubakon mosinua mosio nasinosubakon doi tanggal memeengo sasamba kobituwon popupuson kotaun.

¹⁵Salaku posuungi doi sosuba mo sinua doi oloyo-oloyo biasa tukon sosubakon naanggur paisuno, sio pososubakene koidan komeeng kombembe langgilo tuuk sosubakon pongompuni kolalim.

¹⁶ Doi tanggal kosongulono sangkap bituwon komengo, daanokai oloyo Paskah doi TEMENENO.

¹⁷ Modowakon kooloyo, tanggal songulo lima, tambuuno ko Lamekanano ko Roti Moakiyo Koragino, pitu ko popook tukon kona kalumbit komuyu aki namoola makaan roti mokinabai mopakeio ragi.

¹⁸Doi oloyo tumbeno dolamekananodoo komuyu sio pomakabai pososuungan tuuk pobakaleda, tukon aki namoola lakukanggene kolimang momotoong.

¹⁹Pososubakenemo doi TEMENENO kososuba mosinua buno lua kosapi langgilo mongula, meeng kodomba langgilo tukon pitu kodomba langgilo konaumur meeng kotaun, memeng moakiyo kona sesel.

²⁰Pososubakenemo kai kososubakon mokinaan mosio nadinaanokon, buno tarigu mosinambul zaitun lisisono: tolu kilogram kotarigu tuuk memeng kosapi langgilo, lua kilogram tuuk doi domba langgilo,

²¹tukon meeng kokilogram tuuk memeng kodomba napau langgilo.

²²Pososubakenemo koidan komeeng kombembe langgilo tuuk sosuba poompuni lalim. Tukon dokokubaidoo komuyu lakukanggene kobakolobokiyan bangapusan mian nalalim.

²³Sasaibino dososubadoo salaku posuungi doi sosuba mosinua dowa-dowa mo biasa.

²⁴Tukon dokokubaidoo koidan sio pososubakene doi TEMENENO kososuba mosinua pitu kopopook kona kalumbit. Dososubadoo bunopokakana posuungi dososuba mosinua oloyo-oloyo mobiasa tukon sosubakon naanggur paisuno. Koboono dososubadoo sanaanggene ko TEMENENO noano.

²⁵Doi oloyo kopituno komuyu sio pomokubai pososuungan tuuk pokaleda tukon aki namoola polakukanggene kolimang momotoong.

²⁶ Doi oloyo Komeengo Kolamekanano Kobapadakan pitu kominggu kona lapaan kooloyo babasal doi tempo pomososubakonan gandum mo boolu doi TEMENENO, sio pomokubai pososuungan sulano pokaleda, tukon aki namoola polakukene kolimang mo motoong.

²⁷Pososubakenekai doi TEMENENO kososubakon mosinua doiyamo lua kosapi langgilo, meeng kodomba langgilo mongula tukon pitu kodomba napau langgilo momeeng kotaun konaumur, suwe-suwele akiyo konasesel. Dososubakonoo boono sanaanggene ko TEMENENO noano.

²⁸Pososubakenemokai kososubakon mo kinaan mo sio nadinaanokon doiyamo tarigu mo sinambul zaitun lisisono: tolu kokilogram tuuk sasamba kosapi langgilo, lua kokilogram tuuk kodomba langgilo,

²⁹tukon meeng kokilogram tuuk sasamba kodomba napau.

³⁰Pososubakenekai koidan komeeng kombembe langgilo tuuk sosubakon poompuni lalim. Tukon dokokubaidoo komuyu lakukene kobakolobokiyan bangapusan mian nalalim.

³¹Dososubakon-sosubakonoo tukon naanggur sinosubakon doiya daanokai posuungi doi nasosubakon mosinua oloyo biasa tukon sosubakon mokinaan.