Read Banggai BANGAITAN 3 Bible Online

BANGAITAN 3 - Banggai bible

BANGAITAN 3

¹Naiyamo Harun tukon Musa nakaluargaa doi tempo TEMENENO nabasilinganan doi Musa doi Bunggul Sinai bunggono.

² Harun daano kosanggapo kona mala-malane: Nadab ko langgongo, doibundu Abihu, Eleazar tukon Itamar.

³Yanila inoduduk teali imam tukon kinoloboki kinundongi lisison doi oluno bunggono.

⁴ Bai Nadab tukon Abihu mate doi Sinai padang lalomo, doi tempo napomangadapan doi TEMENENO tukon bilat moaki na minolakon. Yanila luaila akiyo kona pau. Jadi doi tempo Harun daanoon motubo, Eliazar tukon Itamar balimang salaku imam.

⁵TEMENENO bantile doi Musa,

⁶“Sumboliiyomo Lewi nabenseno nalubat mangadap, tukon tudoyomo yanila teali Harun napeleleani-peleleani.

⁷Yanila balimang doi Ku Sandung tukon sio naleleaniyo sasaibino koimam-imam tukon sasaibino komian tukon yanila nabalimangan doi Ku Sandung.

⁸Konapoo limang doiyamo mouluse sasaibino Daku Sandung lolongguno tukon lakukanggene kolimang doi Ku Sandungoo salaku posoboli ko Israel miano.

⁹Luwedoi bangsa Israel, tongo Lewi nabenseno Daku sinumbolii moteali peleleani motataap doi Harun tukon nakaturunan.

¹⁰Bai Harun tukon napau-pau sio muoduduke sulano naambakonggene konalimang salaku imam; sangalaasan yanila, indee komiano tolong komo sosubaiyo molakukanggene dolimangoo sio nainukum mate.”

¹¹TEMENENO bantile doi Musa,

¹² “Budodoiya ko Lewi miano Yaku lilike teali Kumian. Doi tempo Kuakateano sasaibino ko Mesir miano napau langgongo, Kualaasanggene doiya-Ku sasaibino ko Israel miano napau malaneno langgongo tukon sasaibino konapo iyayon piniala mosinuung tumbe. Sasaibino doiya teali Koonggu. Salaku posoboli Israel napau malaneno langgongo, Yaku mangala Lewi miano tuuk doi Yaku; yanila naikon teali Kumian. Yakumo ko TEMENENO.”

¹³

¹⁴Doi Sinai padang lalomo TEMENENO sumboliiyo Musa

¹⁵mokubaikene natinulisan ko Lewi miano mololoi puli tukon nakaluargaa suwe-suwele; sasamba kopau mala-malaneno kona umur momeeng kobituwon lobian sio natinulis kosambuno.

¹⁶Maka Musa lakukanggene ko TEMENENO naparentahdoo.

¹⁷Lewi daano kotolu kona pau malaneno: Gerson, Kehat tukon Merari. Yanila daano kai turunan puli-puli mobinantil mololoi sambunoila. Gerson daano kolua kona pau malaneno: Libni tukon Simei. Kehat daano kosanggapo kona pau malaneno: Amram, Yizhar, Hebron tukon Uziel, Merari daano ko lua kona pau malaneno: Mahli tukon Musi. Yaniladoo keturunan moluwe doi kaluargaa-kaluargaa mo binantil mololoi sambunoila.

¹⁸

¹⁹

²⁰

²¹Gerson pulino tongobos luwedoi Libni nakaluargaa tukon Simei nakaluargaa.

²²Gerson pulino momala-malane momeeng kobituwon lobian kona umur komo totulis doiyamo 7.500 komian.

²³Elyasar Lael napau kapalaiyo do pulidoo. Doi bangsa Israel nabasandungan lalomo. Do pulidoo mangala lipu taalikon doi talise sembeleng doi TEMENENO Na Sandung tonggulungo.

²⁴

²⁵Doi ulusano ko TEMENENO Na Sandung, sio nadagaiyo mono-monondok ko Sandung tukon kopotutupo, toik doi tataapon usokan,

²⁶kaduto basalean moboilingiyo ko Sandung tukon balabaan, tukon tataapon lalansenodoo basaleanoo. Yanila nadagaiyo mono-monondok doi sasaibino kolimang mopotaami tukon do barang-barangoo.

²⁷Kehat napuli-puli tongobos luwedoi Amram, Yizhar, Hebron tukon Uziel nakaluargaa-kaluargaa.

²⁸Ko mala-malane kona umur momeeng kobituwon lobian moluwe doi pulidoo sasaibino koaito 8.600 komian. Yanila ulusiyo ko langge-langge doi TEMENENO Na Sandung.

²⁹Elisafan Uziel napau kapalaiyo do pulidoo. Doi basandungan lalomo, dopulidoo mangala lipu talikon doi lalom sembeleng doi TEMENENO Na Sandung.

³⁰

³¹Yanila dagaiyo mono-monondok ko Peti Perjanjian, meja, lampu aino, balaban-balabaan, lolonggu-lolonggu sasaibino ko imam na pakeyan doi Kombiang Moliyous, tukon lalanse mo pooalasene ko Kombiang Moliyous. Yanila dagaiyo mono-monondok doi sasaibino kolimang mopotaami tukon do barang-barangoo.

³²Kokapalano Lewi nabenseno doiyamo Eleazar, Harun napau. Yana dagaiyo komian-mian mobalimang doi Kombiang Moliyous.

³³Merari napuli tongobos luwedoi Mahli tukon Musi nakaluargaa.

³⁴Mala-malane kona umur momeeng kobituwon lobian moluwe doi pulidoo sasaibino koaito 6.200 komian.

³⁵Zuriel Abihail napau komo kapalaiyo dopulidoo. Doi basandungan lalomo, do pulidoo mangala lipu doi lembet sembeleng doi TEMENENO Na Sandung.

³⁶Yanila dagaiyo mono-monondok do Sandungoo, kona balak-balak ko sudong-sudongo, poombosiino, tukon sasaibino kopakakaso tukon sasaibino kolimang mo potaami tukon do lolonggu-lolonggudoo.

³⁷Koidan doi sudong-sudong, pombosii-pombosii, papasok-papasok tukon alos-alos motuuk doi basalean tonggulungo.

³⁸Doi basandungan lalomo, Musa tukon Harun tukon napau-pau sio namangala tampat doi TEMENENO Sandung salaano, doi tambikon sembeleng kooloyo nasumbotan. Yanila dagaiyo mono-monondok ko Israel miano nabakolobokiyan doi tempo nabakaledaan doi Kombiang Moliyous. Sangalaasan yanila, indee komiano tolong komo soba-sobayo molakukanggene do limangoo sio nainukum mate.

³⁹Sasaibino komala-malane doi Lewi nabenseno lalomo kona umur momeeng kobituwon lobian Musa motulise mololoi konapuli suwe-suwele luwe TEMENENO naparentah sasaibino koaito 22.000 komian.

⁴⁰TEMENENO bantile doi Musa, “Sasaibino ko Israel napau-pau mala-malaneno langgongo daano kai Kumian. Tulisemo yanila kai kopai sambu-sambuno momeeng kobituwon lobian kona umur. Bai salaku posoboli yanila, Yaku talangkanggene sasaibino ko Lewi miano teali Kumian. Yakumo kona TEMENENO! Tukon Lewi miano naiyayon piniala Yaku talangkanggene teali posoboli sasaibino koiyayon komo tumbe-tumbeno sosuung doi antara ko bangsa Israel naiyayon piniala.”

⁴¹

⁴²Musa lakukanggene oila ko TEMENENO naparentahkon; yana tulise sasaibino kopau mala-malaneno langgongo

⁴³momeeng kobituwon lobian kona umur. Yanila sasaibino koaito 22.273 komian.

⁴⁴Maka TEMENENO bantile doi Musa,

⁴⁵“Alaasemo ko Lewi miano tuuk doi Yaku salaku posobolino ko Israel miano napau mala-malaneno langgongo; koidan ko Lewi miano naiyayon piniala salaku posobolino ko Israel miano naiyayon piniala.

⁴⁶Tobikon ko Israel napau mala-malaneno langgongo 273 komian lobian badaang luwedoi Lewi miano aito, maka domo lobianoo sio posoboliyo.

⁴⁷Sasamba kopau, komuyu sio pobeale lima kodoi perak mololoi angga mo pinake doi Ku Sandung;

⁴⁸beekene dodoydoo doi Harun tukon napau-pau.”

⁴⁹Musa lakukene do TEMENENO doo naparenta.

⁵⁰Yana mangala 365 kodoy perak,

⁵¹tukon salakanggene doi Harun tukon napau-pau.