Read Banggai BANGAITAN 31 Bible Online

BANGAITAN 31 - Banggai bible

BANGAITAN 31

²“Lakukenemo kopabalaso doi Midian miano sabab oila komo lapamo yanila kabaiyo motuuk doi bangsa Israel. Kalulapamo doiya ikoo naikon matemo.”

³Maka Musa bantile doi bangsa Israel, “Pobato-batotobomo sulano po molobosi; komuyu sio polobosiyo ko Midian miano tuuk molakukene ko TEMENENO naukuman motuuk doi yanila.

⁴Luwedoi sasamba ko bangsa Israel bense-benseno, komuyu sio pomasadia sololoon kosuludadu mo taus molobosi.”

⁵Maka linilikoo kosololoon komian doi sasamba kobangsa Israel benseno, sasaibino koaito songulo lua kololoono komian mo batotobo molobosi.

⁶Musa sumboliiyo yanila mopoolobosi polaing-laing tukon Pinehas Imam Eleazar napau. Pinehas babayo kolangge-langge mo moliyous tukon torompet-torompet sulano namebee palo-paloosan.

⁷Pokokonoi tukon TEMENENO naparenta doi Musa, ko Israel miano lobosiyomo ko Midian miano tukon akateyomo sasaibino komian mala-malaneno,

⁸tongusokon lima kotomundo doi Midian, doiyamo Ewi, Rekem, Zur, Hur, tukon Reba. Bileam, Beor napau, koidan inakate.

⁹Ko Israel miano taane sasaibino koboiboine tukon labuk-labuk doi Midian, tukon lambasemo sasaibino koiyayon tukon napoo iyayon piniala, tukon sasaibino konapo buat.

¹⁰Kota-kota tukon napoo sandung-sandung sinua.

¹¹Salalapa doiya ko Israel miano alayomo sasaibino konapoohasil linambasoo, tongusokon sasaibino komian motinaan tukon iyayon,

¹²maka yanila babayomo doi Musa tukon Imam Eleazar tukon doi sasaibino ko Israel miano. Doi tempodoo yanila daano mo basandung doi Moab seanono, doi Yordan Paisunobatango bibilo, loolani kokota Yerikho.

¹³Maka Musa, Imam Eleazar tukon sasaibino kokatua bailonggon moluwe doi Israel miano tobuat luwedoi basandungan tuuk molobotiyo kosuludadu Israel.

¹⁴Musa nggimoliiyo sasaibino kosuludadu, sasaibino kopasukan komondaano tukon mokapalaiyo korayat mosodo abali doi polobosiyan.

¹⁵Konabantilano doi yanila, “Bulaando komuyu mo otuboiyo sasaibino koboiboinedoo?

¹⁶ Bolikonkai doboiboinedoo komo loingiyo Bileam naotunggul, sampe bujukiyo ko Israel miano doi Peor sulano naotinggale ko TEMENENO? Tukon doiyamokai komo lubatene kobalaa doi TEMENENO namian!

¹⁷Jadi, budodoiya akateyomo sasamba kopau mala-malaneno tukon sasamba koboine moosowaano.

¹⁸Bai sasaibino koboine modaano mopauboinekon moola poalayo teali poboloki.

¹⁹Tukon komuyu sasaibino mo lapamo mangakate mian kai mo mosinggil bajan sio podungol doi basandungan tonggulungo pitu kopopook konakalumbit. Doi oloyo kotoluno tukon kopituno komuyu tukon sasaibino koboine komuyu mo taanedoo sio polakukene kobakolobokiyan bakiliyousian butong.

²⁰Sasamba kopakean patolo tukon oila tolong komoluwedoi kulit, mbembe buluno kai kayung, sio koidan nakiniliyousi.”

²¹Doi bundu Imam Eleazar bantile doi mian-mian mosodo abali doi polobosiyano, “Naiyamo koaturan-aturan TEMENENO mobeekene doi Musa.

²²Sasaibino kolangge mo taane kobilat, buno mosoni, suasa, tambaga, besi, timah moute tukon timah mopook, sio nakiniliyousi tukon sinua doi aung lalomo. Doi bundu dolangge-langgedoo sio nakiniliyousi koidan tukon paisu bakolobokiyan pokoliyousi sulano naakimo nalokis koidan. Sasaibino kolangge bailonggon mo aki nataane kobilat sio nakiniliyousi tukon paisu bakolobokiyan bakiliyousian.

²³

²⁴Doi oloyo kopituno komuyu sio pobusoiyo kopo pakean, maka nasodo komuyu akimo pomanggilit koidan, tukon moola pousok doi basandungan lalomo.”

²⁵TEMENENO bantile doi Musa,

²⁶“Ikoo tukon Imam Eleazar, polaing-laing tukon sasaibino kokatua bailonggon moluwedoi Israel miano sio poaite sasaibino kohasil mo linambas, tongusokon sasaibino komian motinaan tukon iyayon.

²⁷Hasil molinambasoo sio poebese lua mo pokakana konakadaang. Kosoobos tuuk doi sasaibino kosuludadu molapamo ampakon molobosi, tukon kosoobos koidan tuuk doi mian labino.

²⁸Tuuk pebee mo tangalaas doi Yaku, TEMENENO, luwe sasaibino dosuludadudoo naobos sio mumangala meeng luwedoi sasamba konalima kosakato — mau mo luwedoi mian-mian motinaan, maukai luwedoi sapi, keledai, domba tukon mbembe.

²⁹Salakanggenemo doiya doi Imam Eleazar salaku sosubakon motangalaas tuuk doi Yaku, TEMENENO.

³⁰Luwedoi obos mo bineekon doi Israel miano, sio mumangala meeng luwedoi sasamba konalimakolonoan, mau naluwedoi mian-mian motinaan, maukai komo luwedoi sapi, keledai, domba tukon mbembe. Salakanggenemo doiya sasaibino doi Lewi miano mo uluse Daku Sandung.”

³¹Musa tukon Imam Eleazar lakukene pokakana ko TEMENENO napinarentakon.

³²Sangalaasan sasaibino kosuludadu koona inala, dohasiloo molinambasoo koaito: 675.000 kodomba tukon mbembe, 72.000, sapi 61.000 tukon 32.000 kopau boine.

³³

³⁴

³⁵

³⁶Sembeleng luwedoi aitodoo bineekon doi sasaibino kosuludadu tukon kona inobosan bunonaiya 337.500 kodomba tukon mbembe, tukon luwedoi aitodoo 675 tuuk pebee mo tangalaas doi TEMENENO; 36.000 kosapi, 72 tuuk pebee motangalaas doi TEMENENO; 30.500 kokeledai, 61 tuuk pebee motangalaas doi TEMENENO; 16.000 kopau boine, 32 komian tuuk pebee motangalaas doi TEMENENO.

³⁷

³⁸

³⁹

⁴⁰

⁴¹Maka Musa salakanggene dopebee mo tangalaasoo doi Imam Eleazar teali sosubakon motangalaas doi TEMENENO, pokakana ko TEMENENO napinarentakon.

⁴²Obos motuuk doi rayat pokakana konakadaang tukon obos motuuk doi suludadu; 337.500 kodomba tukon mbembe, 36.000 kosapi, 30.500 kokeledai, tukon 16.000 komian mopauboinekon.

⁴³

⁴⁴

⁴⁵

⁴⁶

⁴⁷Pokakana ko TEMENENO napinarentakon, Musa mangala meeng luwedoi sasamba kona limakolonoan komian motinaan tukon iyayon, maka nasalakanggene doi Lewi miano mo balimang doi TEMENENO Na Sandung.

⁴⁸Doibundu sasaibino kosuludadu molapamo katuaiyo kosuludadu Israel mangadap doi Musa

⁴⁹tukon lapulkanggene, “Tuan, kami aitemo sasaibino kosuludadu mai bawahan. Tokita yanila koaito sukup, akiyokai komeeng komian mo lapus.

⁵⁰Tobikon doiya kami mababa maemaenan mosoni, kulaluk mian limano, kulaluk mian aino, sousolut, susumbang tukon inoon yanila susuwele molapamo alayo. Sasaibino naiya kami salakanggene doi TEMENENO salaku mai sosubakon, sulano natataap osoopami.”

⁵¹Maka Musa tukon Imam Eleazar talimayo domosonidoo, sasaibino doiya luwedoi maenan-maenan.

⁵²Sasaibino dosuludadudoo nasosubakon konakotoong adukon lua kosakato ko kilogram.

⁵³Bai dosuludadu-suludadudoo suwe-suwele lapamo mangala dolanggedoo mo linambas tuuk doi yanila susuungo.

⁵⁴Maka Musa tukon Imam Eleazar babayomo domosonidoo doi TEMENENO Na Sandung sulano ko TEMENENO naeseepe ko bangsa Israel.