Read Banggai BANGAITAN 32 Bible Online

BANGAITAN 32 - Banggai bible

BANGAITAN 32

¹Ruben nabense-benseno tukon Gad mototooli iyayon mobadaang tuuno. Salataa yanila kitayo bulaando konamonondokan kotano Yaezer tukon tano Gilead tuuk bapialaan iyayon,

²yanila ampakon momangadap doi Musa, Imam Eleazar, tukon katua-katua bailonggon moluwe doi Israel. Yanila nabantilano,

³“Buta doi kota-kota Atarot, Dibon, Yaezer, Nimra, Hesybon, Eleale, Sebaan, Nebo tukon Beon mo lapamo Israel dudukiyo tukon TEMENENO napotombonii, monondok tuuno tuuk doi bapialaan iyayon. Tukon sabab komai iyayon piniala badaang tuuno,

⁵kami kabiyo sulano nabuta nia mai bineekon nateali koonggami. Inaimo mosumboliiyo maibiyol doi Yordan Paisunobatango sembeleng.”

⁶Musa timbiliyo, “Masakan komuyu moiyase dungol naimbaa, sabeakai komian momeeng komu bangsa ampakon polobosi?

⁷Bulaando komuyu moiyase kabaiyo kobangsa Israel namatakut tuuk mopintosiiyo ko Yordan Paisunobatango sulano nausok doi lipu TEMENENO mo beekene doi yanila?

⁸ Tama-tamamu kabaiyo bunodoiya koidan, doi tempo kuutusano yanila luwedoi Kades-Barnea tuuk modadange dolipudoo.

⁹Yanila polongo doi Eskol Pepelako tukon lapamo koidan kitayo dotanodoo. Bai doi tempo napo abalian, yanila kabaiyo ko bangsa Israel matakut sulano nausok doi buta mo lapamo TEMENENO beekene doi yanila.

¹⁰ Maka nggimalo ko TEMENENO doi tempodoo sampe Yana bantile, ‘Domian-mianoo aki nasetia doiya-Ku. Tobikon doiya Yaku batotopi baikon luwedoi yanila molua kolonomo lobian kotaun konaumur doi tempo napotinggalano ko Mesir, akiyo naikon komo usok doi lipu Yaku mo dandikenemo doi Abraham, Ishak tukon Yakub.’

¹²Sasaibino komian kanakon dohukumanoo alaasene Kaleb Yefune napau, Kenas miano, tukon Yosua Nun napau, sabab yanila luaila sotia doi TEMENENO.

¹³TEMENENO nggimoliiyo ko Bangsa Israel sampe Yana batadikene yanila molausala doi padang lalomo sangkap kolono kotaun konakalumbit polong sasaibino komian motubo doi tempodoo mo nggimoliiyo Yana mate sasaibino.

¹⁴Tukon budodoiya, komuyu nggimal pokakana kotama-tamamuyu! Komuyu takainomo meeng komian tambuno mo baladosa mo kabaiyo ko TEMENENO nanggimalan molobi-lobian koidan doi bangsa Israel!

¹⁵Kalu komuyu bangabalinggon totonggulunge ko TEMENENO, maka sasaibino nabangsa nia naikon binatadikono lobian malumbit koidan doi padang lalomo, tukon komuyumo komo mangaanikene konaposilakaan!”

¹⁶Maka Ruben tukon Gad namian-mianoo loolaniyo Musa tukon bantile, “Tadukai mai loolukon mongokondong tondok-tondok mobinetoon tuuk mai domba-domba, tukon kota-kota modaano kobentengo tuuk mai pau boloki.

¹⁷Kami naikon batotobomo soisobit tuuk mopolobosi polaing-laing tukon utusonggami. Kami naikon katuaiyo domolobosianoo tukon babayo yanila usok doi lipu mo teali yanila koona. Daanoon mobuno doiya komai pau boloki moola dungol naimbaa, doi kota-kota mo daano konabenteng aman luwedoi lipunia tumbuno namolobosian.

¹⁸Kami akimo naikon maimule doimai bonua kalu akiyoon sasaibino ko Israel miano nadaano konabuta moteali pusaka.

¹⁹Kami aki maiyase mantalima mautongo soisikkai luwedoi yanila nabuta doi Yordan Paisunobatango sembeleng, sabab kami talimayomo komai obos naimbaa, doi tambikon tolopot ko Yordan Paisunobatango.”

²⁰Musa timbiliyo, “Kalu komuyu tutuu moiyase bato-batotobo tuuk mopoolobosi doi TEMENENO,

²¹tukon sasaibino doi antara komuyu mo moola polobosi pintosiiyo ko Yordan Paisunobatango, tukon luwedoi TEMENENO napimpinan molobosiyo komusuh-musuh polong ko TEMENENO siikayo yanila,

²²sampe dolipudoo takluk doiya-Na, maka komuyu moolamo pomule, tukon komuyu bebaso luwedoi mukawajiban motuuk doi TEMENENO tukon motuuk doi utus-utusomu, tukon ko TEMENENO naikon beena buta doi tambikon nai tolopot nia tealimo koomu.

²³Bai neneeke, kalu komuyu aki potapaatiyo kopoodandi, komuyu baladosa doi TEMENENO tukon naikon inukum sabab domu lalimdoo.

²⁴Amapakono kekendenge kokota-kota tukon mudomba natondok-tondok, tukon inai motoliminggene motapaatiyo oila komo lapamo komuyu dandikenemoo!”

²⁵Maka Gad namian-mian tukon Ruben namian-mian bantile, “Tuan, kami naikon lakukene oila Tuan napinarentakon.

²⁶Komai pau boloki tukon iyayon piniala sapi tukon domba naikon dungol naimbaa, doi kota-kota Gilead.

²⁷Bai kami nia batotobo moampakon molobosi luwedoi TEMENENO napimpinan. Kami naikon pintosiiyo ko Yordan Paisunobatango tukon polobosi pokakana komo lapamo Tuan bantile.”

²⁸ Maka Musa beekene naparenta nia doi Imam Eleazar, Yosua tukon katua-katua Israel,

²⁹“Kalu Gad namian-mian tukon Ruben namian-mian loingiyo ko TEMENENO naparenta tukon pintosiiyo ko Yordan Paisunobatango tuuk polobosi, tukon kalu luwe yanila napotombonii komuyu manaang molaate dolipudoo, maka Gilead nabutadoo sio pobeekene doi yanila teali yanila koona.

³⁰Bai kalu yanila aki napintosiiyo ko Yordan Paisunobatango sulano napoolobosi polaing-laing tukon komuyu, maka yanila sio namantalima obos buta pusaka doi lipu Kanaan, bunopokakana komuyu.”

³¹Gad namian-mian tukon Ruben namian-mian timbiliyo, “Tuan kami naikon lakukene oila ko TEMENENO napinarentakon.

³²Luwedoi TEMENENO naotunggul kami naikon pintosiiyo kolipu Kanaan tukon maju mopoolobosi, bai siokai kobuta doi tambikon tolopot ko Yordan Paisunobatango nia natataap teali koonggami.”

³³Maka Musa salakanggenemo doi Gad tukon Ruben nabense-benseno tukon doi Manasye nabenseno sembeleng posaapon ko daerah Sihon, tomundo Amori, tukon daerah Og, tomundo Basan, tongusokon kokota-kota tukon buta doi napoloolanikonan.

³⁴Gad nabenseno abali bangune kokota Dibon, Atarot, Aroel,

³⁵Atarotsofan, Yaezer, Yogbeha,

³⁶Bet-Nimra, tukon Bet-Haran buno kota-kota mo daano konabenteng tukon salaku tampat domba natondok-tondok.

³⁷Ruben nabenseno abali bangune kokota-kota Hesybon, Eleale, Kilyataim,

³⁸Nebo, Baal-Meon, tukon Sebam. Kokota-kota yanila mo kekendengemo yanila soboliyo koidan kosambuno.

³⁹Ikoo Makhil, Manasye napau, lobosiyo Gilead nabuta, maka mulambase tukon musiikayo ko Amori miano mo daano idoo.

⁴⁰Tobikon doiya Musa beekenemo Gilead nabutadoo doi Makhil puli-pulino, tukon yanila tataapo idoo.

⁴¹Yair, mo luwedoi Manasye nabenseno, lobosiyo tukon lambase komoimoiya kodesa, maka nasombuikene “Yair nadesa-desa”.

⁴²Nobah lobosiyo tukon lambase ko Kenat tukon kampung-kampung doi napoloolanikonan, maka yana sombuikene Nobah, menurut sambuno susuungo.