Read Banggai BANGAITAN 33 Bible Online

BANGAITAN 33 - Banggai bible

BANGAITAN 33

¹Sambunolapa ko bangsa Israel otinggale ko Mesir, doi balisan lalomo loingiyo kobangsa benseno suwe-suwele luwedoi Musa tukon Harun nakatuaiyano, yanila sampu doi moimoiya kolipu.

²TEMENENO parentayo Musa sulano natulise luwedoi sasamba kona polipu sampuan sambuno.

³Bangsa Israel naotinggalano ko Mesir doi tanggal songulo lima bituwon komeengo, meeng kooloyo sambuno lapa ko Paskah tumbeno. Luwedoi TEMENENO naloolaingano yanila naotinggalano kokota Rameses, tukon bangsa Mesir sakisiiyo,

⁴modaano yanila motadine konapopau-pau mo lapamo TEMENENO akateyo. Tukon dokakabaidoo, ko TEMENENO buktikanggene baikon yana lobian konabukuanan tukon ilah-ilah doi Mesir.

⁵Salataa ko bangsa Israel otinggalemo ko Rameses, yanila mo basandungo doi Sukot.

⁶Maka yanila luwemo koidan tukon basandungo doi Etam, doi padang lalomo bibilo.

⁷Luwe idoo yanila abali doi Pi-Hahirot, doi taambikon tolopot ko Baal-Zefon, maka yanila basandungo doi loolanian ko Migdol.

⁸Doibundu yanila tinggalemo ko Pi-Hahirot, pintosiiyo kotobun tukon usok doi Etam padang lalomo, sambuno lapa tolu kooloyo koambakonan, yanila basandung doi Mara.

⁹Luwe idoo yanila baggadudul tukon basandungo doi Elim; idoo daano kosongulolua kopaisu matano tukon pitu kolono kokurma batango.

¹⁰Doibundu yanila tinggalemo ko Elim tukon basandung doi loolanian ko Suez Minangano.

¹¹Salataalapa doiya yanila basandung koidan doi Sin padang lalomo, maka doi loolanian ko Dofka, sambuno lapa doiya doi Alus, tukon doi bundu doi Rafidim, bai idoo akiyo kopaisu moininum.

¹⁵Luwedoi Rafidim yanila banggadudul doi Bunggul Hor tukon basandung doi lipu-lipu nia: Sinai padang lalomo, Kibrot-Taawa, “Batadinan Modokoan”, Hazerot, Ritma, Rimon-Perez, Libna, Risa, Kehelata, Bunggul Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Esion-Geber, Zin padang lalomo, tukon Hor Bunggulo, doi napokalalatanan kotano Edom.

³⁸ Luwedoi TEMENENO naparenta, Imam Harun tolibo doi Bunggul Hor. Idoo yana mate doi tanggal komeengo bituwon kolimano doi taun kosanggapo kolono salataa ko Israel miano naotinggalano ko Mesir. Doi tempo namatean, Harun konaumur 123 kotaun.

⁴⁰ Daano mobunodoiya Tomundo doi Arat, doi tano Negeb, Kanaan Lalom, malaat bilita baikon ko Israel miano daanoon motujuiyo konalipu.

⁴¹Doi ambakonan lalomo luwedoi Bunggul Hor doi Moab seanono, ko Israel miano basandungo doi lipu-lipu nia: doi Zalmona, Funon, Obot, Abarim natabaakan doi daerah Moab, Dibon-Gad, Almon-Diblataim, Abarim Bunggulo loolani ko Nebo Bunggulo, tukon doi Moab seanono doi Yordan Paisunobatango bibilo, loolani kokota Yerikho, doi napokalalatanan ko Bet-Yesimot tukon ko Sitim Pepelako.

⁵⁰Doi Moab seanonodoo, doi Yordan Paisunobatango bibilo, loolani kokota Yerikho, TEMENENO beekene doi Musa

⁵¹naparentah-parentah nia tuuk doi bangsa Israel, “Kalu komuyu pintosiiyo ko Yordan Paisunobatango sulano pousok doi lipu Kanaan,

⁵²komuyu sio posiikayo sasaibino dolipudoo tumbuno. Pomanasemo sasaibino konapo uuno moluwedoi batu tukon logam polong yanila natampat-tampat balambeaan.

⁵³Dotanodoo sio polambase tukon podungoliyo, sabab yaku beekenemo doi komuyu.

⁵⁴ Doibundu komuyu sio poobosikene teali pusaka doi mupuli-puli tukon mangkabai undi. Doi puli-puli mo babasal sio pobeekene koobos mo babasal, tukon doi puli-puli mo soisik, obos mo soisik.

⁵⁵Bai kalu dolipudoo tumbuno aki posiikayo, komian mo tataap dungol idoo naikon kabaiyo susah komuyu buno bone doi matamu kai sonit doi aimu. Naikon yanilamo komo lobosiyo komuyu.

⁵⁶Kalu komuyu aki polobosiyo yanila, Yaku naikon akateyo komuyu pokakana komo lapamo Yaku batetelikene doi yanila.”