Read Banggai BANGAITAN 35 Bible Online

BANGAITAN 35 - Banggai bible

BANGAITAN 35

¹ Doi Moab seanono, doi Yordan Paisunobatango bibilo, loolani kokota Yerikho, TEMENENO bantile doi Musa,

²“Pelenggenemo doi bangsa Israel baikon luwedoi buta pusaka donapo tinalimadoo, moimoiya kokotano tukon bulung lalomo doi napoloolanikonan sio napo beekene doi Lewi miano sulano yanila namoola dungol idoo.

³Dokota-kotadoo teali Lewi miano koona tuuk napoo lipu dungolan. Kobulung lalomo doi napololanikonan doiya tuuk doi iyayon mopiniala tukon sasaibino konapoo iyayon.

⁴Bulungdoo lalomodoo konakebelan 450 kometer doi sasaibino kojulusan, kalu inukul luwedoi kota pagalo mobinetoon.

⁵Jadi ko Lewi miano nadaerah kondondoongo tapanapat sangkap, koukulano 900 kometer sasamba kolisuko, tukon kokotano doi tanga-tangano.

⁶Doi Lewi miano sio pobeena noom kokota soopan salaku tampat obulenan tuuk doi mian-mian mo aki nasangaja moakateyomo komian bailon. Sangalaasan doiya ko Lewi miano sio nabinee koidan sangkap kolono lua kokota bailonggon

⁷tukon kobulungo lalomo. Jadi sasaibino daano sangkap kolono alu ko kota mobineekon doi Lewi miano.

⁸Ko Lewi miano nakota-kota aito doi nawilayah lalomo suwe-suwele ko Israel benseno sio natinantukanggon menurut konakadaang kokota tukon konakabasal dowilayahdoo.”

⁹ TEMENENO sumboliiyo Musa

¹⁰mopelenggene doi bangsa Israel nabantilan-bantilan nia, “Salataa lapamolapa komuyu mopintosiiyo ko Yordan Paisunobatango tukon usoko doi lipu Kanaan,

¹¹komuyu sio potantukanggene kokota-kota soopan, sulano komian mo aki nasangajaiyo mo akateyo komian bailon, moola bulen idoo.

¹²Doi kota-kotadoo domianoo naikon amano luwedoi namotolutusan kososubakon namangakatean mo yase soboliyo kona abosan noa. Sabab komian mo sinangka akateyo komian bailon, aki namoola inakate kalu konapalakala akiyoon napinalesa doi pangadilan umum.

¹³Tantukanggenemo noom kokota soopan,

¹⁴kotolu tambikon tolopot doi Yordan Paisunobatango, kotolu koidan doi tano Kanaan.

¹⁵Dokotadoo monoom teali pokota soopan, Israel miano, tukon doi mian molulubaton kai mopodungolimo komuyu. Indee tolong komo lapamo akateyo komian bailon tukon aki nasangajaiyo, moola obulenggene kobutongo luwedoi meeng dokotadoo.

¹⁶Bai kalu baikon memeeng komian mapake sinapan besi kai batu kai kayung sulano naakateyo komian bailon, domianoo daanokai pangakate; yana salah tukon sio nainukum mate.

¹⁹Kopuli-pulino mo loolani moluwedoi mian mo tangakatedoo moola nalaksanakanggene koukuman mo matedoo. Kalu yana pososuunggene dopangakatedoo, yana moola naakateyo.

²⁰Kalubaikon memeeng komian mosikitene komian bailon, maka naakateyo tukon lubange yana kai sokulikene komeeng kolobo doi yana,

²¹kai pukule yana tukon napopukul, domianoo daanokai pangakate; yana salah tukon sio nainukum mate. Kopuli-pulino mo loolani luwedoi mian mo inakatedoo moola nakabaiyo koukuman matedoo. Kalu yana pososuunggene dopangakatedoo, yana moola naakateyo.

²²Bai moola nateali memeeng komian tukon aki nasangaja mangakate mian bailon mo aki namosikitene, kai tukon lubange domianoo kai tukon sokulikene komeeng kolobo doi yana.

²³Kai moola teali memeeng komian aki nakitayo, otuwenge komeeng kobatu mo mangaanikene komian bailon mate mo bolikon namusuh, tukon yana aki koidan nakeeteiyo mo osilakayo domianoo.

²⁴Doi palakala-palakala mopokakana doiya komian nalapat sio naadiliyo antara mian molapamo mangakate tukon mian moiyase balase domianoo namatean molapamo tangakate.

²⁵Komian nalapat sio nalindungiyo komian mo lapamo mangakate tukon aki nasangajaiyodoo motuuk namotolutusan mo otokutiyo doi mian motangakatedoo. Domianoo sio nabinaba koidan doi kota soopan, tampat yana naobulengganano kobutongo. Yana sio dungol idoo polong mian mo doi tempodoo teali Imam Babasal mo lapamo mate; sodo nalapampolapa doiya yana moolamo namule doi kampung sinuungan. Bai kalu yana otinggale kokota soopan tampat yana naobulengganano kobutongo, maka napinososuunggon tukon inakate luwedoi namotolutusan doi mianoo motangakate, maka dotindakan pabalosoo bolikonkai mangakatean.

²⁹Doaturan-aturanoo tapake tuuk komuyu tukon tuuk doi mukaturunan lalomo, inaando tolong kopoo dungolan.

³⁰ Doi palakala mangakatean lalomo, mian mo tinudu salaku pangakate, tongo moola inokitakon komo salah tukon inukum mate kalu dokakabaidoo moola binuktikanggon doi lua komian mosakisii kai lobian. Meeng komian mosakisii aki nasukup sulano nabuktikanggene baikon dotuduhanoo bisa.

³¹Meeng komian mo mangakate sio nainukum mate. Yana aki namoola soboliyo doukumanoo tukon doy.

³²Kalubaikon meeng komian bulenggene kobutongo doi meeng kokota soopan, inaikai pataikene yana mo mebee doy sulano naminoolakon mule doi nabonua kalu akiyoon ko Imam Babasal namate.

³³Kalu komuyu kubaiyo bunodoiya, komuyu kulokisanggene kotano komuyu mo dungoliyo. Komangakatean kulokisanggene kolipu; jadi akiyo kokokubai bailon tuuk mobilisiiyo dolipudoo alaasene tukon akateyo domianoo mo mangakate.

³⁴Inaimo pokulokisanggene kotano komuyu mo dungoliyo, sabab Yakumo ko TEMENENO, tukon Yaku dungol doi bangsa Israel tanga-tangano.”