Read Banggai BANGAITAN 4 Bible Online

BANGAITAN 4 - Banggai bible

BANGAITAN 4

¹TEMENENO sumboliiyo Musa tukon Harun

²mokubaiyo kobangaitan Lewi miano luwedoi Kehat pulino mololoi nakaluargaa suwe-suwele,

³maka tulise sasaibino komala-malane sambuno kona umur motolu kolono polong lima kolono kotaun, mo moola lakukanggene ko limang doi TEMENENO Na Sandung.

⁴Yanila nalimang doiyamo uluse kolangge-langge mo moliyous tuuno.

⁵TEMENENO bekene doi Musa na aturan nia: Kalu laatemo kotempono kobasandungan nalinopoan, Harun tukon napau-pau sio nausok doi TEMENENO Na Sandung, moobulusene kolalanse doi Peti Perjanjian salaano, tukon tombukiyo do Petidoo tukon do toikoo.

⁶Kalu lapamo, yanila sio natombukiyo koidan tukon meeng kopatolo kokulit mo alus, maka nabeleatene komeeng kotoik patolo momanampal doi bungkono, tukon konoikene kokayung patanggungo do Petidoo.

⁷Yanila sio nabeleatene komeeng kopatolo kotoik manampal doi meja bungkono bangusolan roti motuuk doi TEMENENO, tukon doi meja bungkono sio napo mangabos pinggan, baki mangabosan kamangian, baki mangabosan sosubakon, tukon selekan tuuk mososubakonan anggur paisuno. Roti mokinaan sio nasidutu daano doi mejadoo.

⁸Yanila sio natombukiyo sasaibino doiya tukon meeng kotoik patolo memela, maka napobeleatene komeeng kopatolo kokulit mohalus doi bungkono, tukon yanila konoikene kokayung patanggung do mejadoo.

⁹Yanila sio namangala meeng kopatolo kotoik manampal tukon tombukiyo kolampu aino tukon lampu-lampunodoo, pakakas teali pobilisii posi subuno tukon peeto, tukon sasaibino kobangabosan zaitun lisisono.

¹⁰Lampu aino tukon sasaibino kololongguno sio napo bungkuse tukon meeng kopatolo kokulit moalus maka napoabese doi batanggungan bungkonodoo.

¹¹Lapamo doiya yanila sio nabeleatene komeeng kotoik patolo momanampal doi balabaan mosonidoo bungkono, tukon na potombukiyo tukon meeng kokulit patolo moalus, maka nakonoikene kokayung patanggungo dobalabanoo.

¹²Sasaibino kololongguno mo pinake doi Kombiang Moliyous lalomo, sio napo alayo tukon napo bungkuse tukon meeng kotoik patolo mo manampal. Maka sio napo tombukiyo tukon meeng kokulit patolo moalus, tukon sio napo abese doi batanggunganoo bunggono.

¹³Yanila sio napobilisiiyo koambata doi balabaanoo, maka napobeleatene komeeng kotoik patolo mosamelaon doi bunggono.

¹⁴Tukon doi bunggonodoo sio napoabese sasaibino kololongguno mopinake doi kaledaan lalomo doi balabaanoo: bangabosan bilat, posiuk, sondo, tukon loyang. Maka napo tombukiyo sasaibino doiya tukon meeng kokulit patolo moalus tukon napokonoikene kayungdoo patanggungo.

¹⁵TEMENENO bantile doi Musa tukon Harun, “Doi tempo pobiyolano kobasandungan, Harun tukon napau-pau sio nausok doi Ku Sandung lalomo tukon sio napotombukiyo sasaibino kolangge tukon lolongguno modaano idoo. Kalu lapamo doiya, maka nasodo ko Kehat miano moola lubat tuuk motanggunge. Bai yanila aki namoola kitayo, loolaniyo kai singgile dolangge-langgedoo, sabab lapamo inalaas tuuk doiyaku. Kalu yanila lakukene koidan, yanila naikon mate. Jadi, sulano do Kehat mianodoo naaki natotinggal luwedoi Lewi nabenseno, Harun tukon napau-pau sio nabeena limang suwe-suwele doi yaniladoo oila komo sio napobabayo. Doiyamo ko Kehat miano nalimang doi tempo Daku Sandung nabiniyolan. Eleazar, Harun napau, sio nadagaiyo mono-monondok sasaibino Daku Sandung lolongguno, lampu lisisono, kamangian, gandum mosinosubakon moteali sidakan tataap. Lisison bakolobokiyan tukon sasaibino komo daano doi Ku Sandung lalomodoo.”

²¹TEMENENO sumboliiyo Musa

²²mokubaiyo kobangaitan Lewi miano mo luwedoi Gerson pulino mololoi nakaluargaa suwe-suwele.

²³Musa sio natulise sasaibino komala-malane sambuno kona umur mo tolukolono polong limakolono kotaun mo moola lakukene kobalimangan doi TEMENENO Na Sandung.

²⁴Yanila pinarentakon sulano napo akute nalangge-langge nia:

²⁵Toik pangalatoi do Sandungoo tukon potutupo motambikon lalom tukon tambikon doi tonggulung luwedoi kulit mo alus, toik doi Sandung tataapono,

²⁶kadut-kadut tukon alos-aloso tuuk doi basalean napoloolanikonan ko Sandung tukon balabaan, toik doi basaleanoo tataapono mobabasal, tukon sasaibino kololongguno mopinake doi nakinonoikonan sasaibino do lolonggu doo. Yanila dagaiyo mono-monondok doi sasaibino dolimangoo mo pokokonoi tukon do barang-barangoo.

²⁷Musa tukon Harun sio nadagaiyo sulano do limangoo Harun tukon napau-pau molapamo beekene doi Gerson mianodoo sulano napolimange, tukon sasaibino ko lolonggu mo sio nainakut, sulano nainakut.

²⁸Doiyamo ko Gerson miano nalimang doi Sandung salaano; do limang-limangoo sio napolimange tukon Itamal, Imam Harun napau komo katuaiyo.

²⁹TEMENENO sumboliiyo Musa mokubai bangaitan Lewi miano luwedoi Merari pulino mololoi nakaluargaa suwe-suwele.

³⁰Musa sio natulise sasaibino komala-malane sambuno kona umur mo tolu kolono polong lima kolono kotaun mo moola lakukene ko balimangan doi TEMENENO Na Sandung.

³¹Yanila pinarentakon sulano napoakute do Sandungoo pakakaso, balak-balako, sudong-sudongoo tukon pombosiino.

³²Koidan basalean sudong-sudongo potikunggon do Sandungoo tukon poombosiino, posupat-posupato tukon alos-aloso tukon sasaibino kopakakas mopinalaluu sulano nakinokondong. Memeeng komian pinarentakon namababa langge-langge motantu.

³³Doiyamo kai ko Merari pulino nalimang-limang; sasaibino yanila na limang doi TEMENENO Na Sandung sio napolimange tukon Itamal, Imam Harun napau komo katuaiyo.

³⁴Luwedoi TEMENENO naparenta, Musa, Harun tukon sasaibino komo katuaiyo komian sio na mokubai bangaitan luwedoi tolu konamondopulian doi Lewi nabenseno lalomo, doiyamo Kehat, Gerson tukon Merari. Yanila kubaiyo dobangaitanoo sasamba kokaluargaa. Yanila tulise konakadaang koanggota sasaibino komala-malane motolu kolono polong lima kolono kotaun kona umur mo moola limange ko balimangan doi TEMENENO Na Sandung. Naiyamo kona hasil: [BENSENO] — [KOMIAN AITO] Kehat — 2.750 Gerson — 2.630 Merari — 3.200 Sasaibino: — 8.580

⁴⁹Luwe TEMENENO naparenta mololo doi Musa sasamba komian sio natinulis tukon binee, tanggung-jawab suwe-suwele luwedoi oila konapo lineleani kai oila konapo tinanggung jawab.