Read Banggai BANGAITAN 5 Bible Online

BANGAITAN 5 - Banggai bible

BANGAITAN 5

¹TEMENENO bantile doi Musa,

²“Bekenemo naparentahnia doi Israel miano: Sasaibino komian mo seselon ko kulito mo silakaiyo ko mian, kai mo seselon konamaa, kai komo lapamo mosinggil bajan, sio natinobuatonggon luwedoi Israel miano nabasandungan.

³Yanila sio nasinumbolii ampakon, sulano aki nakulokisanggene ko basandungan, doi naando Daku dungolan polaing-laing tukon Daku mian.”

⁴Israel miano lakukanggene doparentadoo tukon tobuatene sasaibino komian mo bunodoiya luwedoi basandungan.

⁵ TEMENENO beena doi Musa

⁶kona aturan-aturan nia mo tuuk doi Israel miano: Kaludaano komeeng komian mooaki natulu-tulutan doi TEMENENO tukon mokubai salah motuuk doi mian bailon,

⁷domianoo sio naakuiyo konalalim mobeale botol, sinuungi lua kolono kopersen, doi mian mo inolugikanggonoo.

⁸Bai kalu domianoo mo inolugi matemo tukon akiyono kopulino moloolani, maka dopotolosoo sio na bineekon doi TEMENENO, tukon teali imam naobos. Potolosoo aki natongusokon kodomba langgilo mokinubai pokoloboki pangakiyonggon lalim doi mian mo saladoo.

⁹Luwedoi oila tolong ko Israel miano nasinosubakon doi TEMENENO, nasinosubakon motangalaas teali imam naobos motalimayo dososubakonoo.

¹⁰Momeeng komian oila kona sinosubakon doi TEMENENO, teali naobos doi mianoo susuungo. Tongo oila kona bineekon doi meeng ko imam, teali domiannoo naobos.

¹¹TEMENENO sumboliiyo Musa

¹²mobeekene naaturan-aturania doi Israel miano. Moola nateali meeng komala-malane nasosunoiyo konaboloki. Yana sangkayo donabolokidoo aki natulu-tulutan doi yana tukon lapamo kulokisanggene kobutongo sabab pololoai tukon mala-malane bailon. Bai do langkaidoo akiyo konasakisii mo bisa, sabab dohaloo naboloki lakukene tukon seseekene; kona sakisii akiyo; tukon yana aki nalinako doi napokooloiyan. Kai moola teali meeng kolangkai sosunoiyo konaboloki, baanggokai donabolokidoo aki nabalolowa.

¹⁵Doi loluakon dohaloo lalomo langkaidoo sio nababayo konaboloki doi imam. Yana koidan sio namababa sosubakon mo pinalaluukon, doiyamo meeng kokilogram kogandum tariguno. Dotarigudoo aki namoola kinundongii zaitun lisisono kai inobosi kamangian, sabab buno meeng kososubakon basosunoiyan tukon minakasuuti teali tandano nadaanoan kolangkai nabasosunoiyan motuuk doi naboloki.

¹⁶Imam sio nasumboliiyo boinedoo doi balabaan salaano tukon kokondong mangadap doi TEMENENO.

¹⁷Maka koimam sio namangala meeng komanggo kobuta tukon nakundongiiyo soisik kapaisuu moliyous doi lalomo. Lapamo doiya yana sio namangala soisik koambata luwedoi TEMENENO Na Sandung salaano tukon usekenemo doi paisudoo lalomo.

¹⁸Doi bundu yana sio nasoisabule boinedoo nabuuk, tukon mangabos tarigu sosubakon basosunoiyan doi limano lalomo, baikai koimam susuungo mataani paisu mo mosopot mo lubatene kobalaa.

¹⁹Lapamo doiya doimamoo sio namabantil totopi tukon kabiyo boinedoo sio naiyase. Imam sio nabantile, “Kalu ikoo aki mubalolowa, ikoo aki mukanakon balaa mo inolubat luwedoi paisunia.

²⁰Bai kalu ikoo lapamo balolowa,

²¹boliisi ko TEMENENO nakubaiyo kosambumu teali totopi balaa doi antara mubangsa. Boliisi yana nakubaiyo kobanamu uuno namayot tukon natibubunggon kotiamu.

²²Paisu mo lubatene nabalaa nia naikon usok doi tiamu lalomo tukon kubaiyo tibubung tukon akamayote kobana mu uuno.” Boinedoo sio natimbiliyo, “Yaku yase, boliisi ko TEMENENO nakubaiyo buno doiya.”

²³Maka imam sio natulise dobalaadoo doi kalataas mo linulun maka nasaute tukon dopaisudoo mo mosopot.

²⁴Imam sumboliiyo boinedoo nainume dopaisu mosopotoo moolubatene kobalaa. Kalu ininum dopaisu mosopotoo, mangaanikene komasakitan.

²⁵Imam sio naalayo dotarigudoo sosubakon, tukon otudoikene doi TEMENENO salaano, maka nababayo doi balabaan.

²⁶Maka yana sio namangala soongguman kotarigu buno meeng kopaloosan baikon sasaibino dotarigudoo lapamo sinosubakon, maka nasuayo doi balabaan bunggono. Konapupusan dopaisudoo ininumikon doi boinedoo.

²⁷Kalu andeno boinedoo bisa mobalolowa, dopaisudoo mangaanikene yana nemiiyo momasakit tuuno, kotiano tibubung tukon mayot kobanano uuno. Kosambuno naikon teali kutuk doi nabangsa lalomo.

²⁸Bai kalu andeno yana aki nasalah, yana aki nakanakon balaa tukon daano moola mosuung.

²⁹Bunomodoiya koaturano oilakai kalu meeng kolangkai basosunoi tukon sosunoiyo baikon kona boloki lapamo mokubai salah tukon okimaayo kobutongo. Domala-malanedoo sio namangadapene dona bolokidoo doi TEMENENO tukon doi imam tukon sio nalakukene doaturanoo mo tuuk doi yana.

³¹Domala-malanedoo tongosobii luwedoi kasalahan, bai konaboloki, kalu tokita salah sio natanggunge kobalino.