Read Banggai BANGAITAN 6 Bible Online

BANGAITAN 6 - Banggai bible

BANGAITAN 6

¹TEMENENO sumboliiyo Musa

²mobeekene naaturan-aturan nia doi Israel miano. Sasamba komala-malane kai boine mobaniat tuuk doi natuboan mo tangalaas doi TEMENENO salaku meeng komian badagai,

³ aki namoola monginum anggur paisuno tukon suka mosopot. Yana aki namoola monginum suka mosopot mokinubai luwedoi anggur saono kai kayung bailon sao-saono. Yana aki namoola kaane koanggur saano momaamis kai momotuul, kai oila tolong komo luwedoi anggur batango, batuno kai lendeno aki namoola yana kaane.

⁵Kalu yana daano baniat aki namoola patele kona buuk kai badalulu. Doi temponodoo kona buuk tukon kona simbil sio nabatadikene natubo bulusan. Yana tokooton doi nabaniatan polong doi tempo nalapaan naalaasano kobutongo doi TEMENENO.

⁶Donabuukoo bunom kopaloosan baikon yana inalaas tuuk doi Mian Bisa. Doi naambakoniano konaniat yana aki namoola kulokisanggene kobutongo; yana aki namoola koolaniyo kobajan, maukai doiya tamano bajano, tinano kai utuso.

⁸Kalu yana daano mokatulungan, yana daanokai TEMENENO namian inalaas.

⁹Kalunaikon meeng komian mokatulungan kona buuk molapamo inalaas teali kulokis sabab yana daano doi naloolanian komian mo mate tukon sosinggot, maka yana sio namontotiili pitu kooloyo konakalumbit; lapamo doiya yana sio nadaluluwo konabuuk tukon kona simbil, maka na teali bilisii.

¹⁰Doi oloyo koaluno yana sio namababa luwa kotomisi lapatiing kai tomisi tokukur doi imam doi TEMENENO Na Sandung tataapono.

¹¹Dotomisidoo momeeng sio imam nasosubakene tuuk sosubakon potolos lalim, tukon komeeng koidan tuuk sosubakon mosinua konaguna alapuse konakulokisan. Doi oloyodoo koidan yana sio naalaasene kona buuk doi TEMENENO

¹²tukon kiboluwe konasalakangganano kobutongo salaku mian mokatulungan. Ko tempo mo lapamo lapa aki nainait koidan sabab yana lapamo teali lokis. Salaku sosubakon posoboli lugi yana sio namososubakon meeng ko domba napau kona umur momeeng kotaun.

¹³ Kalu meeng komian mokatulungan nabaniatan lapamo lapa, sio nai lakukon nabakolobokiyan nia. Domianoo sio nainantokon doi TEMENENO Sandung tataapono

¹⁴tukon mababa doi TEMENENO tolu koiyayon piniala mo akiyo konapakol: meeng ko domba langgilo pauno kona umur meeng kotaun tuuk sosubakon mosinua, komeeng domba pauno molukono kona umur meeng kotaun tuuk sosubakon potolos lalim, tukon komeeng domba langgilo tuuk sosubakon podamean.

¹⁵Yana sio koidan namososubakon meeng kobois koroti mo kinubai aki nainobosi ragi, doiyamo roti matimbumbuk mo kinubai luwedoi tarigu mosinambul tukon zaitun lisisono, tukon sinanga manipi mo sinouti tukon zaitun lisisono. Sangalaasan doiya yana sio koidan namososubakon kinaan tukon sosubakon mo ininum.

¹⁶Imam sio nababayo sasaibino doiya doi TEMENENO salaano, maka nasosubakene kososubakon potolos lalim tukon sosubakon mosinua.

¹⁷Posinggat-singgat tukon doroti momeeng kobois, yana sio nasosubakene do dombadoo langgilo doi TEMENENO salaku sosubakon podamean. Koidan kososubakon mokinaan tukon sosubakon moininumoo sio nasosubakene doi TEMENENO.

¹⁸Mian mo katulungannoo sio nadaluluwo konabuuk doi TEMENENO Na Sandung tataapono, tukon nalambitene doi aung lalomo doi tampat sosubakon dopodameanoo modaano mo sinua.

¹⁹Salataa doiya, kalu kobanano salaano bangal dodombadoo langgilodoo lapamo sinaang, imam sio naalayo tukon naabese posinggat-singgat tukon meeng koroti matimbuk tukon meeng ko sinanga manipi luwedoi boisoo, doi minoo mokatulungan limano lalomo.

²⁰Maka imam sio natudoikene dokinaanoo salaku mobineekon doi TEMENENO, doiya daanokai obos moliyous moteali imam naobos, sangalasaan kooyopo tukon domba langgilo banano mo loingiyo koaturanoo teali imam naobos. Maka nalapa doiya domianoo mokatulungan moolamo monginum anggur paisuno.

²¹Doiyamo koaturano komian mokatulungan; bai kalu meeng komian mokatulungan yana dandikene kososubakon yana lobionio konabaniatan aturano, yana sio nasidaikene tukon tapaat oila kona dinandikonoo.

²²TEMENENO sumboliiyo Musa

²³mopelenggene doi Harun tukon napau-pau baikon yanila sio nabantile nabantilan-bantilan nia doi tempo napo balakatiyano kobangsa Israel:

²⁴Boliisi TEMENENO na balakatiyo tukon napialayo komuyu.

²⁵Boliisi TEMENENO namonondok konoano tukon sanaang konoano doi komuyu.

²⁶Boliisi TEMENENO naseange komuyu tukon beena komuyu nasanaangan.

²⁷Tukon TEMENENO bantile, “Kalunaikon yanila bantile Kosambunggu salaku balakaat mo luwedoi bangsa Israel, Yaku naikon balakatiyo yanila.”