Read Banggai BANGAITAN 8 Bible Online

BANGAITAN 8 - Banggai bible

BANGAITAN 8

¹ TEMENENO bantile doi Musa,

²“Bantilemo doi Harun baikon doi tempo nakonoikanano domopitudoo koposi doi posi ainodoo, yana sio nakonoikene buno doiya sulano nakadioloniiyo tambikon ko salaano doposidoo aino.”

³Harun lakukene ko TEMENENO napinalentahkon. Yana konoikene doposi-posidoo tambikon doi posidoo aino salaano.

⁴Doposidoo natangabosan, polong doi babo tukon kobunga-bungano tokubai luwedoi mosoni motinutuk, loingikene kopopialung TEMENENO mo okitakene doi Musa.

⁵TEMENENO bantile doi Musa,

⁶“Poalaasene ko Lewi miano luwedoi Israel miano mo bailon tukon lakukene kobakolobokiyan pokoliyous motuuk doi yanila

⁷tukon nakokubai nia: tiposiiyomo yanila tukon paisu motuuk bakolobokiyan pokoliyous tukon sumboliiyomo yanila nadaluse posaapon konabuuk, simbil tukon onuang tukon napo busoiyo konapoo pakean. Tukon kalu bunomo doiya yanila bilisiimo.

⁸Maka sumboliiyomo napo mangala meeng kosapi langgilo mongula tukon sosubakon mokinaan luwedoi tarigu mo sinambul lisison. Maka sio mumangala meeng kosapi langgilo bailon motuuk doi sosubakon potolos lalim.

⁹Doibundu pototongikenemo sasaibino ko Israel miano tukon sumboliiyomo ko Lewi miano nakokondong doi Ku Sandung salaano.

¹⁰Komian sio naabese kolimanoila doi Lewi miano oluno bunggono,

¹¹maka Harun sio nasosubakene ko Lewi mianodoo buno pokakana sosubakon motangalaas luwedoi Israel miano doiya-Ku, sulano yanila namoola bakaleda doiya-Ku.

¹²Maka ko Lewi miano sio napo abese kolimanoila doi sapi langgilodoo molua oluno bunggono; komeeng sio nasinosubakon teali sosubakon potolos lalim, tukon komo meeng koidan teali sosubakon mosinua. Tukon do bakolobokiyanoo koLewi miano kiniliyousimo.

¹³Alaasemo koLewi miano motuuk doi yaku tukon sumboliiyomo yanila naleleaniyo Harun tukon napau-pau.

¹⁴Tukon dobakolobokiyanoo komuyu poalaasenemo koLewi miano luwedoi Israel miano bailon, sulano nateali kumian.

¹⁵Salataa lapa ikoo molakukene kobakolobokiyan salakangganano doLewi mianodoo, yanila moolamo nabalimang doi Kusandung lalomo.

¹⁶Yaku lapamo tealikene yanila posoboli Israel miano napau-pau malaneno langgongo; jadi yanilakai tangalaasoo tuuk doi yaku.

¹⁷ Salataa yaku akateyo sasaibino kopau langgongo doi Mesir, pau mala-malaneno langgongo luwedoi memeeng kokaluargaa Israel sasamba koiyayon mosinuung tumbe lapamo kutealikene kulangge mo tangalaas.

¹⁸Budodoiya bunopokakana posobolino sasaibino koIsrael miano napau langgongo, kualayo koLewi miano,

¹⁹tukon do Lewi mianodoo yaku beekenemo doi Harun tukon napau-pau, sulano namoola leleaniyo koIsrael miano doi Kusandung lalomo. Koikoidan sulano yanila namangkabi kupotolos motuuk doi bangsa Israel sulano dobangsadoo aki nalinubotii bolaa kalu yanila lubat todudul loolani doi tampat mo moliyousoo.”

²⁰Tobikon doiya Musa, Harun tukon sasaibino ko Israel miano sosubakene ko Lewi miano doi TEMENENO, pokakana ko TEMENENO napinalentahkon doi Musa.

²¹Do Lewi mianodoo lakukene kobakolobokiyan bakiliyousian butong tukon yanila busoiyo konapoopakean, maka Harun sosubakene yanila salaku meeng ko sabeat motangalaas doi TEMENENO. Yana lakukene koidan kobakolobokiyan bakiliyousian motuuk doiyanila.

²²Israel miano lakukanggene sasaibino ko TEMENENO napinarentakon doi Musa tentang Lewi miano. Tukon bunodoiya ko Lewi miano malaat haak motuuk balimangan doi TEMENENO Sandung lalomo Harun tukon napau-pau mokatuaiyo.

²³TEMENENO bantile doi Musa,

²⁴“Sasamba ko Lewi miano kona umur molua kolono lima kotaun lobian, sio nalakukene kona limang doi Ku Sandung lalomo,

²⁵tukon kalu yana umuro lima kolono kotaun yana akimo napinarentah mo balimang.

²⁶Salataa lapa doiya yana moola tomboniiyo ko Lewi miano bailon mo balimang doi Ku Sandung lalomo, bai yana akimo koidan nadaano kona limang motataap. Bunomodoiya kai kokubaiyano ko Lewi miano nalimang.”