Read Banggai BANGAITAN 9 Bible Online

BANGAITAN 9 - Banggai bible

BANGAITAN 9

¹ Doi bituwon komengo doi taun koluano sambuno lapa ko bangsa Israel otinggale ko Mesir, TEMENENO basilingan doi Musa doi Sinai padang lalomo. TEMENENO bantile,

²“Doi tanggal songulo sangkap nabituwonia, tambuun doi oloyo matano nasopokan, ko Israel miano sio nalamekene ko Paskah loingiyo ko aturan mo lapamo tinataapon.”

⁴Maka Musa sumboliiyo ko bangsa Israel molamekene ko Paskah.

⁵Yanila lamekene doi gurun pasir Sinai doi kikinobian kooloyo tanggal songulo sangkap bituwon komeengo. Sasaibino yanila lakukanggene tapaat buno ko TEMENENO napinarentakon doi Musa.

⁶Bai doi antara yanila daano kobula-bulaa komian momanggilito sabab lapamo singgile kobajan, sampe aki namoola lamekene ko Paskah doi oloyodoo. Yanila nia ampakon mangadap doi Musa tukon Harun

⁷tukon bantile, “Kami nia manggilito sabab kami singgilemo kobajan. Bai bulaando kami sio mbai kinaluar sampe aki namoola mososubakon sosuba doi TEMENENO pososinggat tukon utus-utusonggami?”

⁸Musa timbiliyo, “Totiiliyo looluk sio kumantalimamo otunggol mo luwedoi TEMENENO.”

⁹TEMENENO sumboliiyo Musa

¹⁰mobantile doi bangsa Israel, “Kalu doi antara komuyu kai mukaturunan daanomo komo manggilit sabab lapamo mosinggil bajan kai daano doi ambakonan moodoon lalomo, yana koidan sio nalamekene ko Paskah tuuk doi TEMENENO.

¹¹Bai dolamekananodoo sio nakinubai meeng ko bituwon loolukon, doiyamo doi popook tanggal songulo sangkap doi bituwon koluano lalomo. Kolamekanano dooloyodoo tukon makaan domba Paskah polong roti mo aki namapake ragi tukon nosuwon mosopot.

¹² Inai mongotinggal oioila luwedoi kinaan polong modowakon dowa-dowa, tukon inai momoloto mau meeng luwedoi iyoyonoo bukuno, mo sinosubakon doiya-Ku. Lamekenemo do Paskahdoo pokokonoi tukon sasaibino koaturano.

¹³Kona tangabalian komian mo aki namanggilit tukon aki koidan naambakon doi ambakonan lalomo, bai aki nalamekene ko Paskah, akimo Kuanggene koidan meeng komian mo luwedoi Kumian, sabab yana aki namososubakon sosuba doiya-Ku doi tempo mo tinantukon. Domianoo sio natanggunge kodosano.

¹⁴Kalunaikon doi antara komuyu daano komeeng komian lulubaton moiyase lamekene ko Paskah, yana sio nalamekene pokokonoi tukon sasaibino koaturano tukon natataap. Do hukumoo pinake tuuk sasamba komian, mau Israel miano maukai mian mo lulubaton.”

¹⁵Doi oloyo ko TEMENENO Sandung na kinokondongan, lubato kai kobunom tukon nunungiyomo do Sandungoo. Doi popook polong dowa-dowa dobunomo tokita pokakana kobilat.

¹⁷Sasamba luunggon dobunomo naliba, ko Israel miano lomboyo konapo basandungan, maka naluwe. Tukon inaando dobunomo nabulusan, doi tampatoo kona pobasandungan koidan.

¹⁸Luwedoi TEMENENO naparentah do bangsa Israeldoo lomboyo konapo Sandung tukon luwedoi TEMENENO naparenta yanila konoikene koidan. Kalu dobunomo daano doi TEMENENO Sandung bungkono, yanila tataap dungol doi tampatoo.

¹⁹Kalu dobunomo malumbit kona daanoan doi Sandung bungkonodoo, yanila tulutiyo ko TEMENENO naparaturan tukon aki naluwedoi tampatoo.

²⁰Bai daano kotempono tongo bula-bulaa kooloyo tolong dobunomo nadaanoan doi Sandungoo bungkono. Maunabulaandomo koidan, TEMENENO mo naparentah komo tantukene yanila modungol doi meeng kolipu kai taus.

²¹Daano kotempono do bunomo tongo dungol luwedoi kinobian polong dodowa, tukon kalu do bunomo liba dodowa, yanilakai luwemo. Oila kotempono do bunomo naliba, mau oloyo kai popook, yanila tauso.

²²Kalu dobunomo daano doi TEMENENO Na Sandung bungkono, kai lua kooloyo konakalumbit, meeng kobituwon, meeng kotaun kai lobian, donakalumbitoo koidan yanila dungol doi lipudoo. Kalu dobunomo liba, maka nasodo yanila lengget.

²³Yanila dungol doi mengkolipu tukon luwedoi lipu bailon pokokonoi tukon TEMENENO naparentah TEMENENO mo beekene lolo doi Musa.