Read Banggai MIKHA 1 Bible Online

MIKHA 1 - Banggai bible

MIKHA 1

¹ Mikha konaasal luwedoi meeng ko kota popoisik kosambuno Moresyet. Doi tempo kotano Yehuda napinalentaan potutundu kotomundo doiyamo tomundo Yotam, tomundo Ahas tukon Hizkia. Mikha matalima TEMENENO nateteba tentang Samaria tukon Yerusalem.

²Ndongolio, he bangsa-bangsa! Palatikanggene, he komodungoliyo posapoon kodunia! TEMENENO Moinakatandak Tuuno lubat buno sakisii molawane komuyu saibino! Ndongoliyo Yana basilingan luwedoi Na Bonua mo moliyous doi surgaa.

³Yana loboson luwedoi Nadungolan mo moliyous tukon ampakon doi bunggul poputano-poputano bungono doi dunia.

⁴Bungguko-bungguko mou doi aino pallai-No, buno lilin doi aung lalomo mokait; kobutano molombo usuk doi pepelako-pepelako, buno paisu doi bunggul bunggono lomba doi bilit.

⁵Kalu doiya naikon teali konasabab ko Israel miano baladosamo tukon lawanemo ko Mian Bisa. Indeekai komo kubaiyo ko Israel mobaladosa? Bolikonkai Samaria naibukota susuungo? Indeekai komo kubaiyo sampe ko Yehuda sosubaiyo kopilogot? Bolikonkai Yerusalem susungo?

⁶Doiyamo kosabapo TEMENENO bantile, “Yaku naikon tealikene ko Samaria buno buta motatambun doi padang, tukon komian masakakon anggur batanggo. Kota doo momanaso naikon kusakukene doi motombinglalomo, tukon konadasar yaku bonggale.

⁷Ko timbalang-timbalango moano koanggano naikon minanas tukon sasamba kolobo mobineekon doi boi-boine mobalimang doi bonua bapilogotan naikon sinua, tukon sasaibino kopilogot minanas. Dobarang-barang doiya napo hasil sosubaiyono koilah kosuburan. Diabudoo sasaibino naikon namusuh-musuh akutemo tuuk sosubakon sukuur doi yanila nailah-ilah.”

⁸Tobikon doiya yaku, Mikha, susah konoanggu tukon bebe yaku ambakon balalau tukon aki kumapake sapatu tuuk natokitaan konoanggu nasusaan. Yaku toutodung buno asu mosolot tukon tataluang buno tomisi unta.

⁹Sabab ko Samaria pakol-pakolo aki namoola tangalin, tukon Yehuda naikon kanakon nasib mopokakana. Kosilakaan polongo doi Yerusalem, kubangsa nalipu tataapono babasal.

¹⁰Inaikai mopopitoikene doi ndamusuh-musuh doi Gat tentang ndasilakaan; inai mopataikene yanila nakitayo komuyu mokokiil. He komodungoliyo ko Bet-Le-Afra, molomo doi ambata lalomo salaku palosan mosusah!

¹¹Komuyu mondungoliyo ko Safir, poluwemo doi masakukonan aki pobapake tukon parasaan mamaa! Zaanan mian-miano aki nabarani tobuat luwedoi yanila nakota. Modungoliyo ko Bet-Haezel mau indaa bai kiyono kosoopan koidan.

¹²Silakaan moluwedoi TEMENENO polongo doi Yerusalem tataaponno babasal salaano! Tobikon doiya, aki namool ko Marot miano moinikene modaano kutulungan.

¹³Komuyu modongoliyo ko Lakhis, pasemo ko adalan doi kereta polobosian! Komuyu moloingikon lalim-lalim mokinubai doi Israel tobikon nateali sabab ko Yerusalem baladosa.

¹⁴Diabudoo he Yehuda mianno kopokota Moresyet-Gat lapus. Tomundo-tomundo Israel aki naikon namalaat potomboni koidan luwedoi kota Akhzib.

¹⁵He Maresya miano, TEMENENO naikon salakanggene ikomiyu doi musuh motaklukanggene komu kota. Katua-katua Israel mobalakuasa naikon basookon doi leng-leng Adulam lalomo.

¹⁶He Yehuda miano, patele komu buuk salaku paloosan mosusa doi mupau-pau komuyu momamasikene. Dalluwokai koolumu sampe namandaluk buno tomisi mokane kobunut, sabab komupau-pau naikon inakut doi masakukonan.