Read Banggai MIKHA 2 Bible Online

MIKHA 2 - Banggai bible

MIKHA 2

¹Silakamo kai komian momokubai tetel mokulokis yanila mopiki-pikikene doi napomoolon popook; salataa dodowa soono yanila lakukenemo sabab yanila danoon mobukuan.

²Kalu yanila yase komeeng komian naasi, yanila rampase. Kalu yanila yase komeeng kobonua, yanila halangiyo. Mau buat mau puli, akiyo komo aman.

³Tobikon doiya TEMENENO bantile, “Yaku pikikene kosilakaan doi komuyu, tobikon doiya aki poluput. Doi tempo mosoe doo komuyu naikon aki namoola ampakon tukon babanggaal koidan.

⁴Mutuboan naikon mian pakeyo buno sindilan, tukon yanila naikon mokubai nyanyian poloonan nia, ‘TEMENENO lapamo ukume komai tano nia tukon bekeene doi mo tawane kami. Kami manaso tuuno.’ ”

⁵Tobikon doiya kalukai lubato kotempono dotanodoo inabalinggon doi TEMENENO Naumat, akiyokai komeeng komian mo luwedoi komuyu nakon matalima naobos.

⁶Mian-mian mongotunggul doiyaku, bantile, “Inai mongotunggul doi kami. Inai mongotunggul tentang doiya sasaibino. Kami naikon malaat mamaa.

⁷Inai moanggene ko umat Israel lapamo TEMENENO kutuki! TEMENENO aki nalakukene kai kolangge-langge bunodoiya. Yana akiyon nalapus Kona sabaran. Bolikonokai Yana basilingan tukon monondok doi mian-mian molakukene komokana.?”

⁸TEMENENO timbiliyo, “Komuyumo komolobosiyo Dakuumat buno musuh. Mian moabali luwedoi polobosian tukon moinikene naikon moaman doi nabonua, banggokai indaa komuyu totiliyo sulanopo lampase konabonua.

⁹Boi-boine doi antara Daku umat komuyu sikayo luwedoi bonua nakinilakon, tukon komuyu rampase tuuk sidutu-posidutukon balakaat Kubineekon doi yanila napau-pau.

¹⁰Kokondongo tukon tauso; dimbaa akiyo konaamanan. Mudomba-domba lubatenemo kosilakaan mominatakuton doi tampat nia bunggono.

¹¹Komuyu yase konabi mobakala-kala tukon batipu maka naramalkanggene baikon komuyu naikon daanomo kopoanggur tukon inuman cap tikus molobi-lobian.”

¹²TEMENENO bantil koidan, “He umat Israel labino! Komuyu tantumo naikon Kupotolongikene tukon Kupomeenggene buno domba moabali doi nakandang. Buno bulung doi padang momoono tukon domba, bunomo doiya koidan komutano naikon moono tukon mian mobadaang.

¹³Yaku naikon bukayo kololoon tukon babayo komuyu sumbut luwedoi masakukonan. Komuyu naikon dumboyo kotataapon-tataapon babasal tukon bebaso motaus. Yaku, TEMENENO susungo, daanon mu Tomundo, tukon Yaku naikon antekene komuyu sumbut.”