Read Banggai MIKHA 4 Bible Online

MIKHA 4 - Banggai bible

MIKHA 4

¹Doi oloyo-oloyo molubat bunggul, tampat TEMENENO Na Bonua, naikon kokondong kokoloyos tukon tatandak tuuno liise kobunggul-bunggul tukon bunggul-bunggul bungkono. Saibino kobangsa potutuundu dombalaa

²yanila saibino naikon bantile, “Maimo nda liba doi TEMENENO nabunggul doi Israel na Mian Bisa Na Bonua! Yana naikon otunggulikene doi kita oila komosio kita lakukene. Kita naikon ikutio Konaloloon sabab TEMENENO naotunggul lubat luwedoi Yerusalem; luwedoi Sion Yana basilingan doi Naumat.”

³ TEMENENO naikon putusiyo kopalakala antara bangsa-bangsa, antara negara-negara mokuat, moodoon maukai mololani. Yanila naikon mokubai sabel-sabel moteali pacol tukon yanila nakalait-kalait teali piso popatol. Bangsa-bangsa akimo kai napolobosi, akimo koidan nabasa-basadia mopolobosi.

⁴ Samba komian naikon tubo tanaang tukon monondok doi naasi anggur tangano tukon naasi asino; akiyo naikon komotokut-tokutio yana, doiyamo TEMENENO Mobabasal Konakuasa naperjanjian.

⁵Samba kobangsa doi buta bunggono sosuba tukon taat doi nailah susungo. Bai kita naikon taat doi nda TEMENENO Mian Bisa tukon sosubaiyo Yana tuuk sidutu posidutukon.

⁶TEMENENO bantil, “Naikon lubat kotempono Yaku pototongikene komian-mian Yaku moukume, doitempodoo napomonderitaan doi naposinakukonan.

⁷Yanila tinolunggono luwedoi doi kampuang. Bai luwedoi mian-mian labino Yaku naikon atambuunemo komeeng katurunan moboolu. Yanila naikon teali bangsa mobabasal tukon bukuan, Yaku naikon parentayo yanila doi Sion Bunggulo polong sidutu-posidutukon.”

⁸Tukon ikoo Yerusalem, Mian Bisa natampat dagaiyano Konaumat buno padagai modagaiyo konadomba tambuno, ikoo naikon abali teali muibukota batomundoan buno doi tumbeno.

⁹Bulaando ikoo mokokiil kokobukuan? Bulaando ikoo sakisaan buno boine moadakon mosuung? Akiyono kotomundo doi komuyu tanga-tangano, tukon mupongotinau-pongotinau matemo?

¹⁰He komodungoliyo ko Yerusalem, pomakaluatek tukon manggadidi buno boine momosuung. Sabab, diabudodoo sio komuyu tingale kota tukon dunggol doi padang. Komuyu sio potaus doi Babel tukon indaa TEMENENO naikon sodiiyomo komuyu luwedoi mumusu-musu.

¹¹Badaang kobangsa mopototongi sulano nalobosio ikoo, he Yerusalem! Yanila bantile, “Yerusalem sio naminanas! Kami naikon kitayo kota doo teali bakas!”

¹²Bai dobangsa-bangsadoo aki toiyo oilamo ko TEMENENO rencana. Yanila aki nasadario baikon yanila lapamo pinotongikon sulano nainukum, pokakana buno gandum pinotongikon sulano naginiling.

¹³TEMENENO bantile, “He komodungoliyo ko Yerusalem potauso tukon tudongiyomo komumusuh-musuh! Yaku naikon tealikene komuyu bukuan buno sapi modaano kotanduko besi tukon kolungguno tambaga. Badaang kobangsa pominanas tukon komuyu kaasa luwedoi pohasil rinampas maka pososubakene doi Yaku, TEMENENO sasaibino kodunia.”

¹⁴He komodungoliyo ko Yerusalem, kabiyomo kai sulano ko TEMENENO tulungiyo ikoo! Kita linubotiimo musu! Diabudodoo komusuh lobosiyo katua Israel!