Read Banggai MIKHA 6 Bible Online

MIKHA 6 - Banggai bible

MIKHA 6

¹Ndongoliyomo oila ko TEMENENO nalaitano ko Israel. Bangunokai, ode TEMENENO, tukon mangadukenemo komupangaduan! Sodiiyomo kobunggul tukon bunggul bungkono namolonggol oilamo Daku binantil.

²He bunggul-bunggul, he kobuta alas-alaso, ndongoliyo ko TEMENENO napangaduan! Yana popalakai tukon Naumat Israel tukon yanila naikon tuntute.

³TEMENENO bantile, “He umat-Ku, oila komo lapamo Kukubaiyo motuuk doi komuyu? Oila kai kohaalo Yaku mokabaiyo susah komuyu? Timbiliyo Yaku!

⁴ Komuyu lapamo Kubabayo sumbut luwedoi Mesir, tukon Kusodiyo luwedoi baata-ataan: Yaku lapamo utuse Musa, Harun, tukon Miryam sulano nakatuaiyo komuyu.

⁵ Umat-Ku neneeke oila Balak tomundo Moab nabinatetelikon doi komuyu tukon oila Biliam napotimbili Beor napau doiyana. Neneeke oila komo teali doi ampakonan antara basandungan doi Sitim tukon doi Gilgal. Kalu komuyu neneeke saibinodoo, komuyu naikon sadariyo oila komolapamo Yaku kabaiyo sulano posalamat.”

⁶Oila konda sinosubakon doi TEMENENO, Mian Bisa doi surgaa, kalukai kita lubat mobakaleda doi Yana? Siokai kita ndamaba sapi mongula momonondok sulano ndasosubakene salaku sosubakon doi Yana?

⁷Oilakai ko TEMENENO naikon sanaang kalu kita babayo doi Yana doi libu-libuso kodomba kai lobi-lobian kozaitun lisisono? Siokai nda mososubakon doi Yana ndapau pioto salaku potolos ndalalim-lalim?

⁸Aki! TEMENENO lapamo akitaikene doi kita oila komo monondok. Kona tinuntut luwedoi kita: doiyamo sulano kita lakukene kokaadilan, sidutu amalkanggene komaasi, tukon monondok konoano tubu pomeengon tukon nda Mian Bisa.

⁹Sio ndabapandoikon momatakut doi TEMENENO. Yana uwang doi modungoliyo kota, “Ndongoliyo, he komuyu mopototongi doi kota!

¹⁰Doi mian-mian lokis nabonua talaat kobuat moilaat tukon batipu-tipu. Yanila pakeyo kobaukuran mokala; meeng kokakabai Yaku momosikitene. Mian molakukene naikon Kuukume.

¹¹Kabudoon Yaku ompunio komian momapake ukuran mokala?

¹²Mian-mian mokasaa doi mukota pipike komian motalalais, tukon komuyu saibino mokala-kala.

¹³Diabudodoo Yaku tambuno bobokiyo tukon momanase komuyu sabab mulalim-lalim.

¹⁴Komuyu naikon makaan, bai aki nateali bobosul tolongo tataap malaal. Komuyu naikon akute kobarang-barang, bai aki namoola poamankanggene. Oilamo tolong komuyu moamankanggene naikon Kumanase doi polobosian lalomo.

¹⁵Komuyu naikon motipas gandum, bai aki naikon pomopupui hasilo. Komuyu naikon mokubai likison luwedoi zaitun saono, bai aki namoola pomapakelisisono. Komuyu naikon piise koanggur paisuno, bai aki naikon poinume.

¹⁶ Saibino doiya teali sabab komuyu loingiyo ko Tomundo Omri tukon napau nakakabai-kakabai molokis, doiyamo Tomundo Ahab. Komuyu loingiyo yanila nacara-cara. Tobikon doiya Yaku naikon manasemo komuyu, tukon komuyu naikon sinosibolii tukon tinotulai saibino kobangsa.”