Read Banggai MIKHA 7 Bible Online

MIKHA 7 - Banggai bible

MIKHA 7

¹Yaku silakamo! Yaku buno mian momalaal motaus mopupui tumbuhan saono bai toliiso kotempono. Akiyono koidan kosao-saono doi batang-batango. Anggur saono tukon ara saono momonondok kabuso pinupui saibino.

²Mian monondok kabuso luwedoi tano, komian mosetia doi Mian Bisa akimo napinosunggon koidan. Samba komian motiili kasampatan sulano namangakate. Suwe-suwele taane kona talong motuuk doi tulano.

³Saibino toiyo mokubai lokis. Sambu tukon hakim manggabi doy tempo, tukon laka-lakai doi masarakat pakesakene kona mongiasan, bunomolakon yanila pomeenggon polaing-laing.

⁴Komo monondok tuuno tukon mojujur tuuno luwedoi yanila bai bunomo mosolot mosoniton moakiyo kalakoso. Laatemo kotempono ko Mian Bisa naukumano Kona umat buno komolapamo Yana ingotiikene doi yanila lolo doi Nanabi-nabi. Diabudoo tealimo konggabutan doi antara yanila.

⁵Inaimo muanggayo doi mupokolanian, inai momoini doi tulamu. Poati-ati doi mubantilan-bantilan maukai komo lengele muboloki susuungo.

⁶ Sabab, doi tempo naia anggota kaluarga bai pomusuh-musuh: paumoluko lawane kotinano, tukon monianan moluko padangaani tukon tinano namonianan.

⁷Bai kita moinikene doi TEMENENO, tukon maangga tuuno kita motiili nda Mian Bisa. Yana naikon lengele konda sambeang tukon salamatene kita.

⁸Akiyo koalasan motuuk luwedoi nda musuh-musuh sulano natedes sabab nda hancuran. Sabab maukai nda otuwong, kita naikon bangun koidan. Diabudodoo kita danoon doi kalipookan lalomo, bai TEMENENO naikon kodiyoloniyo kita.

⁹Kita baladosamo doi TEMENENO, sabab diabudodoo kita sio ndarasakanggene Kona ngginimakon. Bai akimo namalumbit koidan Yana naikon belayo kita tukon beena kaadilan doi kita. Yana naikon babayo kita sumbut doi madialan; kita naikon alamio baikon Yana salamatene kita.

¹⁰Loolukoo komusuh totulaiyo kita tukon bantile, “Yandomo ko TEMENENO, Mian Bisa doo?” Bai diabudodoo yanila naikon kitayo oila ko TEMENENO nailakukon tuuk kita, tukon yanila naikon teali mamaa. Kita naikon sakisiyo konda musuh-musuh moilunggui tukon tinudang tinudang buno lapetak doi loloon.

¹¹He Yerusalem! Laatemo kotempono komuyu mobangune koidan kobeton-beton doi mukota. Doi oloyo doo komuwilaya naikon kinoloaso.

¹²Mumian-mian naikon abali doi komuyu luwedoi ya-yaa-luwedoi Asyur taikon doi tolopot, luwedoi Mesir taikon doi lalom, luwedoi tano Efrat Paisunobatango, luwedoi taikon doi tobun sembeang tukon luwedoi bunggul-bunggul modoon.

¹³Bai kobuta sakean naikon kindolono sabab kobanggapi nakulokisan doi dunia.

¹⁴Ode TEMENENO, leleani mokai Komu umat, Muumat linilik. Yanila dungol modoon doi bonggulung lalomo, doi buta momolumbang tangano. Sodiiyomo napo malaat kinaan doi padang rumput Basyam tukon doi Gilead buno doi loonu lolukoo.

¹⁵Kabaiyo komo minasaindinggon tuuk doi kami, ode TEMENENO, buno Ikoo molakukene doi lolukoo salataa Ikoo babayo kami sumbut luwedoi Mesir.

¹⁶Bangsa-bangsa naikon kitayo dolanggedoo tukon teali mamaa sabab yanila sadariyo baikon sasaibino kokakuatan akiyo koalatino oi-oila. Yanila lapuso naikon kona pikiran tobikon doiya akimo napomoola basilingan kabai mondongolii.

¹⁷Yanila naikon pokakana kobinda mototolondok doibuta. Sabab napomatakutan tukon napololondongan yanila naikon dampas luwedoi doinapobataanggonan, maka napolubat doi-Koo, maka napobantile oh TEMENENO komai Mian Bisa.

¹⁸Akiyo ko Mian Bisa buno Ikoo, ode TEMENENO, moomponio Kona umat pinili labino madosa. Aki nasidutu Ikoo nggimal; kobalino Ikoo sanaang motudoikene Komubahilakonan moakiyo konabatas.

¹⁹Ikoo naikon mamasikene koidan doi kami tukon moompunio kami. Komai lalim-laim naikon Ikoo tudo-tudongiyo tukon Ikoo sakukene doi tobun dumbakan!

²⁰Doi Muumat, nakaturunan Abraham tukon Yakub, Ikoo naikon tudoikene Komukasatiaan, tukon komubakilakonan moakiyo konabatas buno komo lapamo Ikoo janjikene domai mbumbu doi loolukoo.