Read Banggai NAHUM 1 Bible Online

NAHUM 1 - Banggai bible

NAHUM 1

¹ Naiamokai ko Mian Bisa nateteba kokaliangano doi Niniwe. Tetebadoo inokitakon doi batokitaan mo bineekon doi Nahum, meeng konabii kona asal luwedoi Elkos.

²TEMENENO Mian Bisa aki nayase modaano konasaingan, mian mo lawane tantu malaat ukuman. Tukon nggimalo tuuno, Yana balase namasakitan konoano doi yanila.

³Memang TEMENENO aki namosobit nggimal: bai Yana koidan balakuasa tuuno tobikon indee mokubai kasalahan aki naikon Nasinodii luwedoi ukuman. Doiyaa TEMENENO ampakon idoo lubat kosokoi doi aino natampat batudangan, idoo ambata teali bunom.

⁴Yana ancame kotobun tukon yana kotuuliyo. Samba kopaisu batango teali kabus kopaisuno. Bunggul Karmel tukon padang-padang doi Basan teali motuul tuuno tukon doi Libanon saibino kobunga molooyu.

⁵Bungkul-bungkul mbombokon doi Yana salaano: tukon bunggul kai teali saibino eemo. Kalu TEMENENO okitakon mbombokon, dunia tukon saibino komo dungoliyo mbombokon.

⁶Indee komomoola taanggene kalu TEMENENO nggimal? Akiyo komomoola luput luwedoi Nanggimalan? Yana sabukene Kona nggimalan mo kait batu manas tukon teali ambata doi salaa-No.

⁷TEMENENO doo monondok, Yana lindungiyo Kona Umat tempo yanila susah. Yana dagaiyo komian mo soop doi Yana.

⁸Bunokai eaba babasal mo lupayo, Namusuh-musuh manaseh. Yanila mobarani lawane Yana Nabinoboki tukon matea sampe silaka.

⁹Tetel oilanokai komu kinubai molawane ko TEMENENO, tantu naikon laate kona gagalan. Yana naikon aki nabalase Kona nggimalan polong lualunggon doi Namusuh-musuh.

¹⁰Ikoo naikon sinua buno laing mo motuul buno mosolot mopalatadian mopokalo-kalo.

¹¹Luwedoi komuyu, he Niniwe, lapamo lubat komeeng komian kona tetel molokis. Yana kubaiyo konatetel tuuk lawane ko TEMENENO.

¹²Maka TEMENENO bantile doi Israel, Naumat, “Maukai ko Asyur mian-mianno doi napobukuan tukon badaangila, bai yanila naikon minanas ikabus. He, kobangsa Yaku lapamo naikon Kubaiyo komuyu posakisaa, bai yanila naikon lakukene koidan.

¹³Diabudodoo Yaku naikon opupusuno ko Asyur nakuasa doi komuyu, tukon Kubentele, korante pokooto komuyu.”

¹⁴Naiyamo ko TEMENENO Nakaputusan kalianyano doi bangsa Asyur, “Yanila aki naikon namototoli katurunan sulano naperjuangkanggene kona bangsa. Pilogot timbang-timbanglango mo daano doi bonua ila-ila lalomo, naikon Kumanase. Kibul motuuk doi bangsa Asyur daano Yaku mosiapkanggene, sabab yanila akimo namoola tubo!”

¹⁵Kitayokai, komeeng kobito-bito molubat loloiyo kobunggul-bunggul, mababa bilita monondok, bilita manaangan. He bangsa Yehuda, lamekenekai komuoloyo lamean tukon bealemo komuniat doi Mian Bisa. Komutano akimokai koidan komian lokis naalayo. Yanila lapamo minanas tuuno.