Read Banggai NAHUM 3 Bible Online

NAHUM 3 - Banggai bible

NAHUM 3

¹Silakamokai kota nia momoono bakakalaan tukon mangakatean; moono barang molinambas kai mondinikuk.

²Ndongoliyomokai kopangumbas tukon roda nabulunganan, adalan mobulen bulungan tukon kareta nangiyokai.

³Adalan pasukano molobosi moono samangat, sabel daano kolaango tukon pandong mangkilat. Komain mate aki natangait, yanila bajano popisa-pisai, kubaiyo komian-mian takait.

⁴Niniwe baloloa yana bine ukuman. Kona monondokkan kubaiyo tagoda komian. Badaango kobangsa naginuna-gunai, tukon nababujukan maka narayuan.

⁵TEMENENO Mobabasal Konakuasa bantile, “He Niniwe, ikoo naikon Kusakisakon! Mutoik Kubukayo doi bangsa-bangsa salaano, tobikon mukasalahan yanila kitayo.

⁶Kulakukene ikoo bunokai barang momadikit, Kusokulikene ikoo tukon kotoran; Kutealikene ikoo bahan mokitaan.

⁷Komokitakon naikon dedenggene kobutongo tukon bantilane, ‘Niniwe komo totinggal baino buta tatimbun! Indee komoiyase susa tukon yana? Akiyokai komoiyase beene hiburan doi yana.’ ”

⁸He Niniwe; aki namungkin komu mondondokan molobiyoniiyo ko Tebe, pusat kota luwedoi Mesir? Tebe koidan natobinggakonan doi paisunobatango bibilo molindungiyo bunokai beton. Ya, Nil Paisunobatango doi yamo kobenteng palatahanan.

⁹Tebe maparentah doi Sudan tukon Mesir, tukon konakuasa akiyo kobataso. Libia tukon Put daanon nasekutu.

¹⁰Maukai nabuno doiya komodunguliyo ko Tebe tinawan tukon inakut doi masakukonan. Doi saibino koliasan kona pau-pau inumbosi pomatekon. Saibino komo babasakene binoboi tukon rante tukon inobos-obos doi antara saibino komo tawane.

¹¹He Niniwe, Ikoo kai naikon padut sabab malangu. Ikookai naikon kakaate sulano muluput luwedoi mumusuh-musuh.

¹²Saibino komubenteng naikon buno ara batango mobadaang kosao-saono momeo. Kalu dobatangodoo linundok kosao-saonoo naikon otuwong doi mian suungo lalomo moyase kaane!

¹³Musuludadu suludadu miuk buno moluko momotuamo moakiyono kona daya mohadapio kona musuh. Aung naikon okopule koposupat-posupat mutataapon babasal.

¹⁴Motambukokai paisu tuuk palasadiaan doi tempo mulinobosian, tukon kenggele kai komubenteng-benteng! Tudo-tudongiio kolapetak sulano mokubai tela, tukon sadiayomokai komaal-maalo!

¹⁵Oilanokai komukinubai, naikon kabus tosua kai mate doi polobosian lalomo. Ikoo naikon lapus buno asi hasilo betek mokaane. Ikoo lapamo mosuung pau buno betek!

¹⁶Mupadagang-padang lobian kona kadaang koiyayon-iyayon doi timbu! Bai diabudodoo yanila lapus buno betek mobelekayo kokapilo maka nabenga lapus.

¹⁷Sasaibino komo babasalkene tukon musambu bailon buno betek tambuno mosoop doi beton-beton doi tempo nakumelonan. Bai sambuno kooloyo matano sumbot, yanila mosobit benga lapus akiyo komeeng komiankai mutoiyo maando konapotausang.

¹⁸He tomundo tano Asyur! Sasaibino komugubernur matemo, tukon sasaibino komubupati molomo tuuk sidutu-posidutukon, tukon akiyo ko meeng komiankai momoola babayo yanila abali mule.

¹⁹Musilakaan akiyo kopakulino, tukon mupakol-pakol akimo kai natangalin. Saibino komian momolongol bilita doi muminanasan yanila balano-lano sabab napolaba-labaan. Sabab saibino komian lapamo sakisaa sabab komukulokisan moakiyo kona pupusan.