Read Banggai HABAKUK 2 Bible Online

HABAKUK 2 - Banggai bible

HABAKUK 2

¹Yaku yase liba doi kusandung badagaian, tukon motiili oila ko TEMENENO nabinontikon doiyaku, tukon bulaando Konapotimbili daku kakabi.

²TEMENENO timbiliyo yaku bunonia, “Botikemo tukon tontong doi buta tuu bisilo, oila Dakukinilakon doi komuyu, sulano namoola binaca tukon gampang.

³ Catatemo doya, sabab diabudodoo konatempo akiyoon nalaate. Bai tempo doiya mosobit lubat, tukon oila Dakuinokitakon doi komuyu bisa naikon teali. Maukai natokitaan danoon malubit, bai totiliyomo kai! Tempo doya tantu naikon lubat tukon akimo naikon natinotili.

⁴ Tukon neneke; Mian molokis aki naikon salamat, bai mian molakukene Mian Bisa namongiasan naikon tubo sabab nakesetiaan doi Mian Bisa.”

⁵Kasaan sidutu kokoliyo komian. Mian mo modokoo sombong tukon balisa. Buno matean, yana kai aki napuas; bangsa tukon bangsa yana kuasaiyo.

⁶Bai saibino konalunggui doo naikon sindiri tukon sosiboliyo-sosiboliyo. Yanila naikon bantile, “Kinutuko ikoo sabab mumangatambunan barang mobolikon koomu! Bulaa konakalumbit ikoo mokubaiyo kaasa kobutomu tukon pakisayo komian-mian mobasamea doikoo sulano bayare konaposameaya?”

⁷Bai aki musadario, ikoo molapamo lungguiyo komian bailon, naikon basamea koidan tukon pinakisaa sulano nabeale konabunga. Mumusuh-musuh naikon lubat tukon kubaiyo ikoo matakut. Yanila naikon rampeke komubuat!

⁸Badaanoo komubangsa rinampok, bai kobangsa-bangsa moluput naikon rampeke ikoo, sabab ikoo lapamo mangakate, tukon sabab komukolokisan tuuno motuuk doi tano-tano, kota-kota tukon komodungoliyo.

⁹Takutuko ikoo. Ikoo kubaiyo kaasa komukaluarga tukon komuuntung ikoo molaate secara kejam, sulano komubonua susuumu aman tukon akiyo kosusaan tukon bencana.

¹⁰Bai domuteteloo tolongo babayo komaa doi mukaluargaa. Tukon nabadaangan kobangsa murinampak, doiya tolongo kubaiyo rugi kobutomu.

¹¹Tukon kobatu-batu doibeton kabi-kabiyo kutukio ikoo, tukon bonua sudong-sudongo pelenggene dosomanoo.

¹²Tokutuko ikoo! Ikoo bangune kota luwedoi mukulokisan tukon komubangunano luwedoi mumangakatean.

¹³Bangsa-bangsa ikoo molungguiyo yanila berusaha bai akiyo konatotuuk, tukon sasaibino kolobo yanila mokekendenge kabus mosua doiaung. Sasaibino doiya daanon TEMENENO Mobabasal Konakuasa.

¹⁴ Bai buno tobun momoono tukon paisu, bunomo koidan kobuta sakian kinonoy pengetahuan tentang TEMENENO tukon Nakuasa.

¹⁵Kinutuko ikoo! Ikoo botototulai tukon mokubaikene maa komupokolanian-pokolanian; ikoo kabaiyo yanila toyuyuunggon buno mian malangu.

¹⁶Diabudodoo laatemo komugiliran moinakamaa, jadi akimo muinodotu. Komuinodotiyan teali potatulai. TEMENENO naikon pakisaiyo ikoo monginum luwedoi cangkir koantoko ukuman tuuk ikoo. Ikoo naikon monginum tukon toyuyuunggon.

¹⁷Ikoo tapeyo kokayung-kayung doi Libanon bonggulo, tukon diabudodoo ikoo susuumu naikon komotinape. Ikoo akateyo konapo iyayon-iyayon, bai diabudodoo ikoo matakutenemo doiyayon-iyayonoo. Sasaibino doiya teali sabab mangakatean tukon mukokejaman molapomo ikoo lakukene doi tano-tano, kota-kota tukon komodungoliyo.

¹⁸Kinutuko ikoo! Ikoo bantile doi meeng kopatolo kokayung, “Banguno!” kai doi meeng kobatu babasal, “Luwemo!” Molakai komeeng kotimbalang momabantil komeeng kolobo doikoo? Molakai nateali dotimbalangoo nalinapis tukon mosoni kai suasa, bai konaansang akiyo doiyana. Oila kotakoso dopilogotoo timbalango? Doiya tolongo bangkapi komokubaiyo tolong. Komu linaate doiyana tolongo bakala-kalaan. Akiyo kogunano kita moanggayo domo kubaiyodoo kotimbalang sabab doiya tolongo limano komo kubaiyo, tukon aki nabantil-bantil.

²⁰TEMENENO daano doi Na Bonua lalomo moliyous; tadukai sasaibino komian doi dunia naimonabiok doi Salaano.