Read Banggai HABAKUK 3 Bible Online

HABAKUK 3 - Banggai bible

HABAKUK 3

¹Naiyamo Nabi Habakuk nasambeang:

²Ode TEMENENO, yaku lengele tentang Mukakabai, maka kurayo sanaang tuuno konoanggu. Do kakabaidoo babasal tadukai Mukuaikene tukon ikoo okitakene doi kami nia naloonu. Tadukai ikoo mamaasikene kami maukai konoa-Mu namoonas.

³Ikoo Mian Bisa Mo moliyous lubat luwedoi Teman, Ikoo lubat luwedoi bunggul Paran. Timbu tinutupi luwedoi Mubabasalan; dunia moono tukon panggaal tuuk Ikoo.

⁴Ikoo lubat tukon lalaangan momotontilang, luwedoi limamu sumbut kopana montontilang, idoomo komukuasa Musokanano.

⁵Ikoo sumboliiyo kopanakit ampakon doi salaa-Mu, tukon matean lainge doi tonggulu-Mu.

⁶Kalu Ikoo tade, kodunia mbombokon; kalu Ikoo kitayo, kobangsa-bangsa nggabut. Bunggul-bunggul momonggol taba-tabatai; bunggul-bunggulo momonggol tealino penda, doi bunggul-bunggulo doiyamokai Komu ampakonan salataa doilooluk.

⁷Kukitayo korayat Kusyan konakon matakutan, tukon Midian miano mbombokono.

⁸Oh TEMENENO, bulaandokai motolongo dotobunoo kubaiyo konoa-Mu nggimal? Paisu-paisunobatangokai mokubaiyo Ikoo nggimal? Ikoo lokitiyo kobunom salaku adalan tukon kareta polobosian, salataa Ikoo beena Komuumat kamanaangan.

⁹Mupana lapamo Ikoo sadiayo, Mupana sadia sulano nasinodikon. Maka kodunia kubatayo teali paisu-paisunobatango.

¹⁰Kitayo Ikoo, bunggul-bunggul unggot luwedoi timbu nalubatan koudan buno tokundang. Doi dunia adeno kopaisu momuuk koalalo, kobokolo bagulung-gulung tukon liaakon.

¹¹Mupana-pana laango ampakon mosobit, Mupandang mangkilat-kilat, maka kooloyo tademo tukon bituwon doi natampat.

¹²Tukon nggimal Ikoo ampakon solidikiyo kodunia; bangsa-bangsa Ikoo tudo-tudongiyo tukon noa moonas.

¹³Ikoo laakon maju sulano Muosodiiyo Komuumat tukon tuuk salamatene Komutomundo linilik. Ikoo umbase otuwong komian lokis nakatua, Ikoo sapuwo kabus sasaibino konapololaing.

¹⁴Komupanah-panah taduke komo katuaiyo komusuh tempo konasuludadu nalubatan, napasukan buno sokoi, sulano mai topobabandakon. Yanila kokumbit tukon sanaang pokakana komian moaki nabiok-biok pipiike komian mokakurangan.

¹⁵Tukon Komoadalan Ikoo tudo-tudongiyo kondalangon tukon tobun dapango moute babukal.

¹⁶Molongolii doiya noanggu mbombokon tukon bibilonggu mbombokon. Yaku teali miuk akimoo nabukuan, koainggu takait doi yayaando daku ampakonan. Yaku naikon mototiili tukon tanaang Mian Bisa naukuman doi sasaibino momolobosi.

¹⁷Maukai ara batango akiyo ko saono tukon anggur batango akiyo konaanggur, maukai kobapupuian zaitun napakokonoi kona gagalan tukon gandum hasilo doiasi kubaiyo kacewa, maukai kodomba-domba namate sasaibino tukon iyayon piniala nakandang akiyo kopatotuino,

¹⁸yaku naikon sidutu tedes, sabab Ikoo TEMENENO Mian Bisa mosalamatene yaku.

¹⁹ Ikoo beena bukuan yaku buno donga aino, ainggu Ikoo konggolio. Ikoo lolainge yaku sulano kuaman tempo ampakon doi bunggul.