Read Banggai ZEFANYA 1 Bible Online

ZEFANYA 1 - Banggai bible

ZEFANYA 1

¹ Zefanya daanon Kusyi napau. Kosalitano tinambuun luwedoi namulaian polong doinapupusan Kusyi, minulai luwedoi Gedalya, Amazia tukon Tomundo Hizkia. Naiyamo ko TEMENENO nateteba doi Zefanya doi tempo Tomundo Yosia Amon napau nabapamarentaan doi Yehuda.

²TEMENENO bantile, “Yaku naikon manasemo sasaibino kolobo doi dunia:

³Sasaibino kobanggapi tukon iyayon, tongosokona kotomisi tukon ikan. Komian lokis naikon Kulopuwo. Sasaibino koumat naikon Kuakabuse, akiyo komeeng komian kai naikon Kusodiiyo motubo. Yaku, TEMENENO, lapamo basilingan.

⁴Yaku naikon ukume komudongoliyo ko Yerusalem tukon Yehuda. Mosinosubakon doi Baal labi-labino naikon Kuakabusemo luwedoi tampat-tampatoo. Imam-imam mo meleani Baal naikon tinoliminggon tuuno.

⁵Yaku naikon sapuwo bilisii indemo komoliba doi ato sulano nasosubayo kooloyo, bituwon tukon mandala-mandala. Naikon Kuakiyenggene koidan yanila mososubayo Yaku tukon setia maka napobatotopi doi Yaku, bai koidan yanila tolongo batotopi tukon Ilah Milkom sambuno.

⁶Yaku naikon kulokisene yanila moaki nalubat doiya-Ku, kai makabi Kuotunggul tukon mo lapamo tinggale Yaku tukon aki yase koidan lolainge Yaku.”

⁷TEMENENO Naoloyo lolanimo, doi oloyo doo Mian Bisa naikon mokubai tindakan; tobikon doiya inai pobiok doi salaano. TEMENENO daanon mobasa-basadia tuuk mokolotio Kona umat buno sosubakon mosinosubakon tukon Yana lapamo mongundang musuh-musuh Yehuda.

⁸“Doi oloyo bakolotanoo,” TEMENENO bantile, “Yaku naikon ukume sasaibino kosambu, sasaibino kotomundo namalane tukon sasaibino komian moloingio komian molubat naadat.

⁹Yaku naikon ukume sasaibino komian mobakakala buno mian moaki natingonio Yaku tukon mopondikuk tukon momangkate sulano nakonoiyo konapotuan nabonua tukon barang-barang morinampas.”

¹⁰“Doi oloyo doo, “TEMENENO bantile bunonia,” naikon tololongol komokokiil doi Ikan Tataapono babasal. Lalo Komandaungan alalo tololongol luwedoi bakampungan moboolu, tukon kolipu motabaak koalalo lubat moluwedoi bunggul-bunggul.

¹¹Mandaungon tukon dokokiilanoo doi tempodoo polongolono, he komodungoliyo kota taikon doi bilit, sabab kopadagang sasaibino tukon mian-mian mobainggotiiyo komuyu doy inakatemo kabus!

¹²Doi tempodoo Yaku naikon mangala pausona, tukon Kubongkare kota Yerusalem. Naikon komodungoliyo Yaku hukume sabab aki napopusinggon doi Yaku, tukon tolongo yanila pikikene baikon Yaku, ko TEMENENO aki Kumokubai tindakan bunonia kai bunodoiya.

¹³Konapobuat rinampas tukon Konapobonua-bonua minanas. Yanila naikon mokokondong bonua, bai aki nadungoliyo. Yanila naikon mokubai anggur asino bai aki namonginum naanggur.”

¹⁴Ko TEMENENO mbahukuman oloyono lolanimo, ode, lolanimo tuuno, ode naikon mosobit lubat. Oloyodoo susa tuuno, tobikon doiya kosuludadu-suludadu mobukuan tuuno naikon wowokon sabab mamaamo!

¹⁵Oloyo doo oloyo nggimalan, sulito tukon susamo, oloyo otuwongan tukon namanasan, oloyo mokalipookan tukon kabut.

¹⁶Posopokon dooloyodoo tollongol kotorompet alalo tukon pojuang-pojuang kokuweis doi napolobosian molobosiyo kokota-kota modaano konabenteng tukon namenara-menara motatandak.

¹⁷TEMENENO bantile, “Yaku naikon lubatene badaang kosilakaan doi banggapi, tobikon yanila naikon taataap buno mian piit. Yanila baladosamo doiya-Ku, tukon diabudodoo yanila sauno naikon tokundang buno paisu, tukon konapomayat-mayat boaan doi buta bunggono.”

¹⁸Doi oloyo mobahayadoo TEMENENO naikon tudoikene Konangimalan, maka sasaibino komosoni tukon suasa aki napomoola salamatene. Poosaapon kodunia naikon manas tuuno tosua sabab aung namonasan. Tukon sosinggat naikon Nakibute koansang doi dunia nia.