Read Banggai ZEFANYA 2 Bible Online

ZEFANYA 2 - Banggai bible

ZEFANYA 2

¹He bangsa moaki natoiyo komaa, sadaro

²moakiyoon kumuyu pomoloiyu tukon motuul buno bunga! Posadaro mokiyoon nalubat ko TEMENENO nakutuk moakiyo konapupusan tukon komuyu kanakon TEMENENO nakutuk moakiyo konapupusan.

³Abalimo doi TEMENENO, he sasaibino komian mokependeo konoano doi tano nia, tukon sasaibino komian motaatio Kona parenta-parenta. Poloingiyo ko TEMENENO namongiaasan, tukon kependeo kobutomu doi Salaano. Todubaanggon komuyu naikon luput luwedoi TEMENENO naoloyo bahukuman motudoikene Konangimalan.

⁴ Doi kota Gaza akiyo komeeng komian kai naikon mosalamat. Askelon kiis akiyo kopodungolino. Modungoliyo ko Asdot, naikon siniika doi meeng komolobosian mososinggot doi dodoa tuuno tukon komodunggoliyo ko Ekron naikon sinumboli taus luwedoi yanila nakota.

⁵Tokutoku komuyu, he Filistin miano, bangsa modungol popuson kopante. TEMENENO tataapkenemo koukuman doikoo. Yana naikon silakaiyomo komuyu, akiyo komeeng komian kai luwedoi komuyu naikon moluput.

⁶Mulipu lolani kotobun teali padang rumput, sandung-sandung badagaian tukon domba nakandang-kandang naikon kinokondong idoo.

⁷Modungoliyo ko Yehuda momoola luput, naikon dungoliyo domulipudoo. Yanila naikon mopiara iyayon doi lipudoo, tukon doi popook oloyo yanila koidan moola doi Askelon, miano nabonua-bonua. Sabab TEMENENO, Mian Bisa naikon lindungiyo yanila koidan tukon tealikene yanila abali tubo monondok.

⁸ TEMENENO Mobabasal Konakuasa bantile, “Lapamo Kulengele kobangsa-bangsa Moab tukon Amon mototulaiyo tukon sosiboliyo Daku umat. Yanila babanggaal naikon molaate Daku mian nalipu.

⁹ Tolongo Yaku motubo, Mian Bisa bangsa Israel, Yaku naikon sapuwo kabus ko Moab tukon Amon buno Sodom tukon Gomora. Tano-tanodoo naikon moono tukon bubung-bubung timuson tukon bakas-bakas momalumbito motealimo mosolot lalomo. Daku mian labino moluput naikon ndikukiyo kotumbuno, tukon lambase yanila nalipu.”

¹⁰Bunomokai komodungoliyo ko Moab tukon Amon naikon inukum sabab nasombongan tukon yanila nabanggaalan, koidan sabab yanila totulaiyomo ko TEMENENO Mobabasal Konakuasa.

¹¹TEMENENO naikon kubaiyo yanila matakut. Yana naikon manasemo koila-ila doi buta. Maka sasaibino kobangsa naikon bakaleda doi TEMENENO, suwe-suwele doi natano susuungo.

¹² Koidan komodungoliyo ko Sudan naikon TEMENENO tuwongikene koukuman mate.

¹³ Lapa doiya TEMENENO naikon gunakanggene Konakuasa tuuk momanase ko Asyur. Kota Niniwe naikon teali kiis tuuno tukon teali bunggul mokindolon.

¹⁴Idoo koiyayon tambuno tukon sasaibino koiyayon kalianggano uba-ubanggon tukon tademo. Tomisi-tomisi Kaas naikon mokubai telea doi bakas-bakas doo tukon wowokon-wowokon luwedoi jendela-jendela. Tomisi gagak naikon kakaakon doi tataapon salaano. Kayung cemara doi bangunan-bangunan kota doo naikon kabus ndinikuk.

¹⁵Doiyamo naikon komoteali doi kota motedes-tedesoo tukon yanila anggape baikon tongo napokota komobabasal tuuno doi dunia. Bukamaen konakiisan lipudoo, akiyo komodunggolio kacuali iyayon-iyayon mosolot mo makubai telea idoo! Sasamba komian moolo doi kota doo naikon ngginggim tukon raseyo momatakut.