Read Banggai ZEFANYA 3 Bible Online

ZEFANYA 3 - Banggai bible

ZEFANYA 3

¹Yerusalem kinutuko, dokotadoo morusak moiyase banggabut tuuk doi TEMENENO tukon mopipiike domodungoliyodoo susuungo!

²Silakamo kota moaki naiyase motalimayo ko TEMENENO napoingotii tukon aki koidan naloingiyo Konapanganuukon-panganuukon, moaki nasalakanggene kona nasib doi TEMENENO, tukon aki namatalima tulung doiya-Na!

³Mobabasakene-babasakene kota doo buno singa mongangaton. Kona Hakim-Hakim buno serigala momalaal; yanila modoko tobikon meeng kobuku akiyono komo totinggal sabab napomodokoan.

⁴Kona Nabi-nabi akiyo konatanggung jawab tukon akimo nainangga; sasaibino koimam kodikitiyomo oila komo inalas tuuk doi TEMENENO tukon mopobalikene ko Mian Bisa Naukum-ukum tuuk doinapo nakauntungan.

⁵Bai ko TEMENENO daanon doi kotadoo; Yana sidutu lakukene komo kana tukon akiyo komosala. Samba kododoa tantumo Yana beena kaadilan doi Naumat. Maukai, mian moaki tingoniyo kokaadilan doi kotadoo tataap mokubai lokis aki natingoniyo komaa.

⁶TEMENENO bantile, “Yaku akabusemo badaang ko bangsa; yanila nakota-kota Yaku manasemo, tukon yanila nabeton-beton maka namenara-menara kutealikene manas totimbun. Yanila nakota-kota kiis akiyo komo dungol tukon naloloon-loloon kiis.

⁷Kupikikene, ‘Diabudodoo tantumo Daku mian odotiyo Yaku tukon loingiyo sasaibino Daku panganuukon. Tantumo yanila neneekemo Dakuotunggul bineekon doi yanila.’ Bai konatokitaan, yanila babuku tuuno koidan mokubai lokis luwedoi naakiyonan.

⁸Bai ingat! Totiili tolong kooloyono Yaku kokondong salaku momalapur. Sabab lapamo Kuputuse tuuk mopotongikene kobangsa-bangsa tukon batomundoan-batomundoan sulano kulubatene Daku nggimalan doi yanila. Posapoon kobuta naikon kabus tosua doi aung Kunggimalan.

⁹Bai doibundu Yaku naikon boliiyo kobangsa-bangsa noano sulano naposambeang doi Yaku tolong, tukon aki nadoi ilah-ilah bailon. Bangsa-bangsa doo sasaibino naikon loingiyo Yaku.

¹⁰Oode luwedoi Sudan modoon, Daku mian mopoalas-alasoo naikon lubat tukon mososubakon sosubakon doi Yaku.

¹¹Doi tempodoo, he Kumian, komuyu aki napalaluu momamaa koidan sabab lapamo nggabuta-Ku. Yaku naikon siikayo samba komian mobabanggaal. Tukon komuyu naikon banggabuto koidan motuuk doi Yaku doi Kubunggul momoliyous.

¹²Indaa naikon Kusodiikene natataap komeeng kobangsa mopependeo konoano, mobalaanggene Daku tomboniano. Yanila moola dungol indaa.

¹³ Israel miano modaano kolabino, akimo namokubai lokis koidan indee; yanila aki naikon nabakala-kala koidan tukon akimo napobatipu. Yanila naikon tubo monondok tukon sanaang, tukon akiyo konapominatakuton doi inde.”

¹⁴He Israel, pokokuweis tukon manyanyi! He Yerusalem, potedeskai tukon noamiu sasaibino!

¹⁵Sabab TEMENENO berentimo moukume komuyu. Yana sikayomo sasaibino Komu musuh. Komuyu tomundo Israel dagaiyo mu TEMENENO susumu. Diabudodoo komuyu akimo pomatakut koidan.

¹⁶Naikon lubat ko tempono mian daango naikon bantilo, “He Yerusalem, inaimo matakut tukon manasal konoamu.

¹⁷Komuyu TEMENENO mu Mian Bisa motambongan. Komuyu manaang sabab Nakuasa. TEMENENO sanaang tukon balasanaang sabab komuyu, Namaasi lalomo Yana beena komuyu tuboan boolu.

¹⁸Sabab komuyu, Yana sanaang momanyanyi buno balameanan.” TEMENENO bantile, “Silakaan molubotio komuyu Kuakienggene. Mutinotulaian Yaku hapusemo.

¹⁹Kotempono sakisaawan nalubatan naikon Kumanase, tukon mian lemat Kusalamatene; sasaibino mosinakukon Kubabayo mule. Yanila tinotulaian Kuboliyo teali nainodotiian; doi yando tukon doi posaapon ko dunia, yanila naikon inakabasal tukon ngginaal.

²⁰Tempono naikon lubat, modungolikon mosasabul Kuandane mule. Komuyu kukubayo totoi posaapon doi dunia nia bunggono, tukon komumonondokkan naikon Kukindendeke koidan.” TEMENENO basilingano.