Read Banggai HAGAI 1 Bible Online

HAGAI 1 - Banggai bible

HAGAI 1

¹ Doi taun koluano Tomundo Darius nabapamarentaan doi Persia doi tanggal komeengo bituwon konoomo. TEMENENO basilingan tukon parantaraan Nabi Hagai. TEMENENO nateteba kona tujuan doi Zerubabel Sealtiel napau, gubernur Yehuda tukon doi Imam Babasal Yusua Yosadak napau.

²TEMENENO Mobabasal Konakuasa bantile doi Hagai, “Bangsa nia bantile baikon akiyoon nalaate kotempono tuuk mokekendenge koidan Daku Bonua.”

³Lapa doiya tukon luwedoi Nabi Hagai TEMENENO bantile doi Naumat.

⁴“He Daku umat, oilakai lapamo kotempono komuyu tuuk dungol doi pobonua lalomo momoonggol tuuno, baikai Daku Bonua baino buno bonua lapono?

⁵Coba, palaatikanggene komundondoong!

⁶Komuyu lapamo motipas badaang kolibuang, bai mopinadak soisik. Komuyu daanon kopokinaan, bai aki nacukup tukon aki pobobosul. Komuyu daano kopoanggur, bai pomonginum aki pobiai. Komuyu daano bapake, bai aki nasabe tuuk mokonasio kobutomu. Tukon tambo mian mobalimang natinalima aki nasabe napopakayo doi napotuboan?

⁷Komuyu aki pomangalatikene, bulaakai dolanggedoo natealian?

⁸Diabudodoo potolibomo doi bunggul-bunggul tuuk mangala kayung, maka pobangune Daku Bonua; maka yaku naikon rasayo sanaang tukon yaku naikon sinosubai koidan tukon cara motutuu. Soba palatikanggene komu ndondoong!

⁹Komuyu moinikene kobapupuian hasilo molobi-lobian, baikai komuyu tolongo malaat soisik tuuno; komuyu babayo mule, bai mubapupuian hasilo Yaku puule, tobikon kabus mombuul kanggiyo. Bulaando Yaku molakukene doiya? Potimbilino doiya: Sabab Daku Bonua baino buno bonua lapono, baikon komuyu tolongo sibuk mobangune kopobonua suwe-suwele.

¹⁰Doiyamo kosababpo udan akimo nalubat tobikon komosinakakon akiyo komotubo.

¹¹Yaku lubatenemo komotuulan doi buta tukon doi bunggul-bunggul, doi gandum asi-asino tukon doi anggur asi-asino tukon zaitun asi-asino tukon sasaibino kolangge motubo doi buta nia, tukon koidan doi banggapi tukon iyayon tukon sasaibino kolangge komuyu mousahakanggene.”

¹²Lapa doiya Zerubabel tukon Yosua tukon sasaibino ko Israel miano moabalimo luwedoi masakukonan doi Babel, taatio Hagai nabantilan-bantilan, TEMENENO nabobitokonoo. Yanila lakukene oila ko TEMENENO napinarentakon doi yanila, sabab matakut doi TEMENENO.

¹³Maka Hagai pelenggene ko TEMENENO nateteba doi rayat baikon ko TEMENENO lapamo berjanji naikon molindungiyo yanila.

¹⁴Bunomodoyakai ko TEMENENO nanggiyokano Gubernur Zerubabel noano, Imam Babasal Yosua tukon sasaibino komian mo abalimo luwedoi masakukonan, sulano napobangune ko TEMENENO Mobabasal Konakuasa Na Bonua napo Mian Bisa.

¹⁵Konapomulaiyan limange doi tanggal 24 bituwon konoomo taun koluano doi tempo Tomundo Darius namaparentaan.