Read Banggai HAGAI 2 Bible Online

HAGAI 2 - Banggai bible

HAGAI 2

¹Doi tanggal 21 bituwon kopituno doi taunoo lalomo koidan, TEMENENO basilingan koidan lolo doi Nabi Hagai.

²TEMENENO sumboliyo Hagai basilingan doi Gubernur Zerubabel, Imam Babasal Yosua, tukon narayat pelenggene nateteba nia,

³ “Daanokai doi antara komuyu komo danoon moneneeke bulaando kona monondokan Daku Bonua nia lolukoo? Diabudodoo bulaandomo kona ndondoong, menurut komupandapat? Dilakai doiya aki nasanaanggene konoanu?

⁴Mau nabuno doiya, inaikai pomanasal, he komuyu sasaibino! Banggadudukenemo dopolimangoo, sabab Yaku naikon tataap tomboniiyo komuyu.

⁵ Salataa komuyu sumbut luwedoi Mesir, Yakukai berjanjiino naikon molindungiyo komuyu. Tukon diabudodoo kai Yaku daanon molindungiyo komuyu. Jadi aki napalalu komuyu manasal.

⁶ Doitempo lalomo mololani Yaku naikon nggiyeke kotimbu tukon dunia, butatina tukon tobun.

⁷Sasaibino ko bangsa naikon Kunggabute tukon yanila nabuat naikon binaba dosumai; maka Daku Bonua naikon moono tukon donapobuatoo.

⁸Sasaibino komosoni tukon salaka doi dunia nia danoon Konggu?

⁹Ku Bonua moboolu naikon lobian kona monondokkan luwedoi mololukoo, tukon dimbaa Yaku naikon beena damai tukon konasanaangan doi Kubangsa.” TEMENENO Mobabasal Konakuasa lapamo basilingan.

¹⁰Doi tanggal 24 bituwon ko siono taun koluano lalomo Tomundo Darius namaparentaan, TEMENENO Mobabasal Konakuasa basilingan koidan doi Nabi Hagai.

¹¹Nabantilano, “Kabiyokai kokaputusan sasaibino ko imam tentang napalasoalan nia.

¹²Kalu kai daanon komian momangala meeng kopatolo kosail moluwedoi sosubakon doi TEMENENO, maka namulekene tukon abese doi najubah lipatano lalomo, tukon kalu donajubahdoo singgile koroti kai lobo mosinaang, kai anggur kai likison zaitun kai oila-oila komo kinaan, doiya sasaibino naikon teali moliyous koidan?” Salataa Hagai kamukakene kona pasadai doi saibino komian motimbili, “Aki.”

¹³ Lapa doiya Hagai masadai koidan, “Kalukai daanon komian moteali lokis sabab yana singgili kobajano, tukon lapa doiya yana singgile komeeng luwedoi mokinaanoo, oilakai dokinaanoo teali lokis koidan?” Saibino ko imam timbiliyo, “Ode, tantumokai!”

¹⁴Lapa doiya Hagai bantile koidan, “TEMENENO bantile baikon doparaturanoo belayo koidan tuuk Israel miano doi lipunia tukon sasaibino kolangge yanila mohasilkanggene. Jadi, oila konapo sinosubakon doi balaban nia modaanon molokis.”

¹⁵TEMENENO bantile, “Coba palatikanggene oila ko molapamo teali akiyon nalaate doioloyonia, bai Daku Bonua nia akiyoon nakininondok! Bulaandomo kai komu ndondoong doi tempodoo?

¹⁶Komuyu tauso kitayo kogandum nainatambunan tukon sangkayo malaatene 200 kokilogram gandum, bai tokita tolongo 100 kokilogram komodaano. Komuyu taus tuuk matauk 100 koliter anggur luwedoi tong anggur, bai komo dadaano tolongo 40 koliter.

¹⁷Yaku lebesenggene komombuul moonas tukon udan batu sulano namanase saibino komuasi hasilo, bai komuyu aki poyase koidan abali doi Yaku.

¹⁸Doi oloyo nia tanggal 24 bituwon kosiono, Daku Bonua betonno lapamo bininggakon! Palaatikanggene oila naikon komoteali natempo nia.

¹⁹Maukai nakiyono koidan kogandum mototinggal tukon anggur batango ara batango, delima batango tukon zaitun batango akiyon nasao bai temponia tambuuno. Yaku naikon balakaatio komuyu.”

²⁰Doi oloyodoo koidan, doiyamo tanggal 24 bituwon kosiono, TEMENENO bateteba koluano lunggon doi Hagai,

²¹sulano napinolonggon doi Gubernur Zerubabel. TEMENENO bantile, “Akimo namalumbit koidan timbu tukon dunia naikon Kunggiyeke;

²²batomundoan-batomundoan Kulubange tukon yanila nakuasa Kumanase. Kereta-kereta polobosian tukon natolopuus naikon Kuduekene sulano natanggalaup; saibino koadalan naikon mate tukon polokiti-polokitino naikon poakate.

²³Doi oloyo doo ikoo Zerubabel, Kuata, naikon Kubinggate sulano mubapamalentah luwedoi sambung-Ku. Sabab ikoo lapamo Kulilike.” TEMENENO Mobabasal Konakuasa lapamo basilingan.