Read Banggai ZAKHARIA 1 Bible Online

ZAKHARIA 1 - Banggai bible

ZAKHARIA 1

¹ Doi bituwon koaluno taun koluano lalomo Tomundo Darius namaparentaan doi Persia, TEMENENO pelenggene nateteba nia doi yaku, Nabi Zakharia Berekia napau tukon Ido natumbu.

²TEMENENO parentayo yaku sulano kubantile bunonaiya doi Naumat, “Doi tempo loluk Yaku, TEMENENO Mobabasal Konakuasa, nggimal tuuno doi mumbumbu.

³Bai diabudodoo Yaku bantile doikoo: Abalimo doi Yaku, maka Yaku koidan naikon abali doikoo.

⁴Inaikai buno mubumbu. Lolukoo saibino konabi pelenggene Daku teteba doi yanila sulano yanila inaimo namokubai lokis tukon mokubai lalim. Bai yanila aki napaduliyo tukon aki nayase taat doi Yaku.

⁵Inandokai komumbumbu tukon nabi-nabidoo diabudodoo? Yanila akiyono koidan.

⁶Lolo doi sasaibino konabi Dakupeleleanidoo, Kupelenggene ko parentah-parentah tukon Kupoingoti-poingoti doi napomubumbu. Bai yanila aki napopusinggone tobikon yanila sio natanggunge kobalino. Maka yanila manasal tukon mangakukene baikon Yaku, TEMENENO Mobabasal Konakuasa, ukumemo yanila pokakana tukon yanila nakasalahan tukon pololoi Daku katantuan.”

⁷Doi oloyo 24 bituwon Syebat, doiyamo bituwon kosongulono meeng, doi taun koluano lalomo Tomundo Darius namaparentaan, TEMENENO pelenggene Kona teteba doi yaku. Meeng kobatokitaan lalomo doi tempo popook,

⁸ yaku kitayo ko TEMENENO namalaekat molokitio koadalan meeng memela. Yana tade doi meeng kopepelako doi antara murad batang-batango. Doi tonggulungo bubula koadalan mokokondong kobailon, daano komomemela, momela jambu tukon moute.

⁹Yaku masadai doi yana, “Tuan, oilano koalatino saibino naadalan nia?” Yana timbiliyo, “Naikon kutudoikene koalatino doikoo.

¹⁰Yanila TEMENENO kapatuwo sulano napalesayo kodunia.”

¹¹Adalanno saibino lapurkanggene doi malaekat, “Kami lapamo boilingiyo posaapon kodunia bunggono, tokita nadunia nia tanaang tukon akiyo konggabutan.”

¹²Maka malaekatoo bantile, “TEMENENO Mobabasal Konakuasa, pitu kolono kotaun konakalumbit Ikoo nggimoliyo ko Yerusalem tukon kota-kota doi Yehuda. Polong oila kotempono Ikoo naikon tataap nggimal tukon aki muompuniyo yanila?”

¹³TEMENENO timbiliyo domalaekatoo tukon bantilan-bantilan mohibure,

¹⁴tukon domalaekatoo sumboliyo yaku pelenggene oila ko TEMENENO Mobabasal Konakuasa nabantilan, “Yaku seseange tuuno tukon palaatikanggene kota Yerusalem, Daku kota-kota momoliyous.

¹⁵Bai Yaku nggimal tuuno doi bangsa-bangsa moaman tukon akio konggabutan. Sabab salataa Yaku taane, Daku nggimalan doi bangsa-bangsa doo sungiyo Daku umat nasakisawan.

¹⁶Diabudodoo Yaku abali doi Yerusalem tuuk mo ompunio dokota doo. Daku Bonua naikon kinokondong koidan tukon kota Yerusalem naikon inalapa koidan.”

¹⁷Malaekatoo sumboliyo yaku pelenggene teteba nia koidan, “TEMENENO Mobabasal Konakuasa berjanjimo baikon Nakota-kota nia naikon abali teali monondok tukon baikon idan koidan Yana naikon tulungio ko Yerusalem tukon akuiyo salaku Kona susuungo.”

¹⁸Batokitaan lalomo kobailon, yaku kitayo sangkap kosaapi tanduko.

¹⁹Yaku masadai doi malaekat mo lapamo basilingan doi yaku, “Oilano koalatino doo tanduk-tandukkoo?” Yana timbiliyo, “Tanduk-tandukkoo daanon palosan batomundoan-batomundoan mo monggol mo poalas-alasene komodungoliyo ko Yehuda, Israel tukon Yerusalem.”

²⁰Maka ko TEMENENO okitakene doi yaku sangkap komian mo mokubai besi mo makanggi martelu.

²¹Yaku masadai, “Oila konaminakasuti yanila molubat?” Yana timbiliyo, “Tuuk monggabute tukon monggiyeke kobangsa-bangsa molapamo manase ko Yehuda tukon poalasene komo dungoliyo.”