Read Banggai ZAKHARIA 11 Bible Online

ZAKHARIA 11 - Banggai bible

ZAKHARIA 11

¹He Libanon, bukayomokai komu tataapon, sulano aung suayo muaras batang-batango!

²He daru batango, mandaungokai, sabab lapamo tolubang kocara batang-batango, batango mo hebat-hebat lapamo tolubang. He kayung mobabasal kobatang-batango doi Basan kokilokai. Sabab mosolot-mosolot mobabasal lapamo tosua saibino.

³Ndongoliyokai mandaungan saibino mobalakuasa kabuso yanila namonondokkan! Ndongoliyokai kosinga-singa na ngatonan doi bonggulung, sabab manaso yanila nadungolan popupuson ko Yordan Paisunobatango.

⁴TEMENENO Mian Bisa bantil doi yaku, “Kubaiyomokai bunokai ikoo padagai mo padagaikai domba naikon motinembel.

⁵Saibino komo mongoli akateo domba-domba doo aki namalaat ukuman. Yanila momabalukon domba-domba sailo doo bantil. ‘Nggaalekai ko TEMENENO! Diabudodoo kita tosuungi kaasa!’ Padagai-padagai doo aki nalasayo seseange doi yanila nadomba-domba piniala.

⁶Yaku aki yase koidan moseseang doi indeeno doi tano nia. Yaku susuunggu naikon salakanggene sasaibino modungoliyo doi saibino mobalakuasa. Yanila doo naikon manase tano doo, tukon yaku aki naikon nalaate luwedoi yanila nakakuasaan.”

⁷Yaku, Zakharia, maka saibino kopadagang domba tambeo tuuk modagaiyo ko domba-domba naikon motinembel. Kongguna lua kotokon; ko meeng ku sumbuikene “Namamundaan” tukon mo meeng koidan “Poboboi”. Lapa doiya yaku tambuuno mojagaiyo tukon pialayo domba-domba doo.

⁸Tolu koidan padagai momisikitanaku akabuse naku sabaran. Yanila kusiikayo tempo meeng kobituwon lalomo.

⁹Lapa doiya yaku bantil doi dombadoo tambuuno, “Yaku aki kuyase momadagai komuyu koidan. Mosio namate, sobiyomo kai namate, tukon mosio na silaka, sobiyomokai nasilaka. Maka labino moola napokateo.”

¹⁰Maka tokon kusinumbuikon “Namamundaan” doo kuoloyo tukon kulotoyo tuuk mobatalkanggene koperjanjian TEMENENO mokubaiyo doi saibino kobangsa.

¹¹Doi oloyo doo koidan perjanjianoo binatalkanggon. Saibino kopadagang domba doo awasio yaku tukon yanila sadar baikon TEMENENO daanon bantil-bantil mololoi saibino daku kokubai.

¹² Yaku bantil doi yanila, “Kalu tuan-tuan satuju, bekenemokai daku tampo; kalu aki, inaimokai.” Maka yanila bekenaku tolu kolono kodoi suasa tuuk kotampo. TEMENENO bantil doi yaku, “Usokon doidoo doi Ku Bonua kasoo lalomo.” Jadi kuusekene tolu kolono kodoi suasa doo doi TEMENENO Na Bonua kaaso lalomo. Tolongo polong doiya yanila namoinian doi yaku!

¹⁴Lapa doiya ku lotoyo kotokon koluano, doiyamo kusinumbuikon “Poboboi”, maka pomeenggonan Yehuda tukon Israel nggabuto.

¹⁵Maka TEMENENO bantilo doi yaku, “Kubaiyomokai koidan bunokai ikoo padagai moaki namonondok.

¹⁶Sabab Yaku naikon tugaskanggene meeng kopadagai tuuk dagaiyo Kudomba tambuno bai yana aki napusinggene domba molapus, yana aki napondikuk domba mosasaat, aki koidan namapakuli domba mo daanon tubo. Baikai yana susuungo makaan domba doo sailo momalanak tuuno tukon kibute iyayondoo lunggu-lungguno.

¹⁷Takutukokai padagai moakiyo takoso doo! Yana tinggalemo nadomba tambuno. Polobosio naikon pongopusino nabalakuasaan. Botokono naikon teali miuk tukon matano bakalingano teali piit.”