Read Banggai ZAKHARIA 14 Bible Online

ZAKHARIA 14 - Banggai bible

ZAKHARIA 14

¹Oloyo TEMENENO Nabahakiman lolanimo. Maka Yerusalem naikon indikuki, tukon nahasil naikon inobos-obos doi matamu salaano.

²TEMENENO naikon pototongikene saibino kobangsa tuuk lobosiyo Yerusalem. Kota doo naikon linambas, kona bonua-bonua rinampok, tukon sasaibino kona boine pinalakosa. Sembeleng luwedoi modungoliyo naikon biningkat doi masakukonan, bai kolabino naikon dungol doi kota doo.

³Maka TEMENENO naikon maju tukon polobosi lawane ko bangsa-bangsa doo, buno mo nailakukon doi tempo lolukoo.

⁴Doi oloyo doo Yana naikon kokondong doi Bunggul Zaitun, taikon doi tolopot doi Yerusalem. Maka Bunggul Zaitun naikon sembeleng doi pepelako mo bebelan tabata, tambun luwedoi tolopot polong doi talise. Sembeleng luwedoi bunggulo naikon palabiok doi lembet, tukon koidan taikon doi lalom.

⁵Komuyu naikon obulen lolo doi pepelako mo ebese bunggulo teali lua. Komuyu naikon obulen buno tumbumuyu salataa teali koleali doi tempo Usia nabamarentaan, tomundo Yehuda. Maka lubato ko TEMENENO Mian Bisa saibino komalaekat lolainge.

⁶Kalu dooloyodo lubat, akiyono koidan kodapang momemel kai es.

⁷Doi oloyo doo akiyonokai koidan kokalopookan. Oloyo tataap madialan, koidan doi tempo popook. Bai komo toiyo tongo TEMENENO oila kotempono dooloyodoo nalubatan.

⁸ Doi oloyo doo, paisu monondok naikon lomba luwedoi Yerusalem; kosembeleng luwedoi paisu doo naikon natoduan doi Tobun Mate tukon sembeleng koidan doi Tobun Tanga. Paisu doo naikon lomba popupuson kotaun, maukai doi tempo udankai doi tempo pintal.

⁹Maka TEMENENO naikon maparentah bunokai tomundo doi posaapon doi dunia bunggono; samba komian naikon sosubaiyo Yana bunokai Mian Bisa tukon tingonio Yana tukon sambuno mo pokakana.

¹⁰Posaapon kotano luwedoi Geba doi lembet polong Rimon taikon lalom, naikon teali pepelako. Bai ko Yerusalem naikon tatandak tuuno, lobian kona katandak luwedoi buta potikunggon; kotadoo naikon bebelan luwedoi Benyamin Natataapon Babasal polong doi Tataapon Babasal Pasuno, doiyamo tampat tataapon babasal Tumbeno tukon luwedoi Menara Hananel polong doi tampat bapisan anggur tomundo koona.

¹¹ Komian-mian naikon dungol tukon aman doi kotadoo, akiyo kosilakaan mobananas.

¹²TEMENENO naikon lubatene kopanakit mominatakuton doi saibino ko bangsa bungguno mo lapamo polobosi lawane ko Yerusalem. Maka tukon alepoila tukon posaapon yanila butongo naikon booan maukai yanila daanon motubo.

¹³Doi oloyo doo TEMENENO naikon kubaiyo kobangsa-bangsa binggung tuuno tukon matakut tobikon samba komian naikon lakoyo kotulano modaanon doi sembeleng tukon namolobosi.

¹⁴Komian-mian malane doi Yehuda naikon polobosi tuuk belayo ko Yerusalem. Bunokai barang morinampas yanila naikon alayo saibino ko bangsa-bangsa nabuat buno mosoni, suasa tukon pakean doi tambun-tambuno.

¹⁵Meeng kopanakit molokis koidan naikon lupayo koadalan, bagal, unta, tukon sasaibino koiyayon doi musuh nabasandungan.

¹⁶ Lapa doiya saibino komian daanon tubo antara kobangsa-bangsa molobosiyo ko Yerusalem naikon taus doi kota doo tuuk mososubaiyo ko Tomundo, TEMENENO Mobabasal Konakuasa tukon tuuk lamekene ko Lamean Sandung moinalatoi Loon.

¹⁷Kalukai akiyo kobangsa moaki naiyase taus doi Yerusalem tuuk mososubaiyo ko Tomundo, TEMENENO Mobabasal Konakuasa, maka doi natano aki naikon nalubat koudan.

¹⁸Tukon kalu Mesir aki naiyase lamekene ko Lamean Sandung moinalatoi Loon, maka yanila naikon linupa panakit TEMENENO molubatene doi samba kobangsa mo aki naiyase taus bakaleda.

¹⁹Doiyamo ukuman tuuk Mesir tukon saibino kobangsa moaki naiyase lamekene ko Lamean Sandung moinalatoi Loon.

²⁰Doi oloyo doo ko lonceng-lonceng adatan adalan napinake naikon binotik tukon bantilan-bantilan “Inalaasanggon tuuk TEMENENO”. Pang-pang doi TEMENENO Na Bonua naikon inangga buno mangko-mangko sosubakon doi balabaan salaano.

²¹Saibino ko paang doi Yerusalem tukon posaapon Yehuda naikon inalaasanggon teali TEMENENO Mobabasal Konakuasa koona. Podungolino mososubakene kososubakon naikon napakeyo tuuk motibulu sail mosinusubakon. Kalukai tempodoo lubat akiyonokai nadaano koidan kopadagang doi TEMENENO Mobabasal Konakuasa Na Bonua.