Read Banggai ZAKHARIA 5 Bible Online

ZAKHARIA 5 - Banggai bible

ZAKHARIA 5

¹Yaku palatikanggene koidan, tukon diabudodoo nia yaku kitayo komeeng kokitab gulungo doi dapang.

²Malaekatoo masadaikene oila daku kinita. Kupotimbili, “Meeng kokitab gulungo mobenga doi dapang. Konakobulus sio kometer tukon kokinobintingo sangkap maka sembeleng kometer.”

³Maka nabantile doiyaku, “Doi kitab gulungodoo totulis katotopi doi sasaibino kotano nia. Doi meeng konamuka koidan totulis baikon sasamba komian mopondikuk naikon siniika luwedoi tano nia. Tukon doi namuka bailonggon totulis baikon indee komo batotopi tukon kala-kala mau yanila bai siniika koidan. Samba komian mobatopi kalah koidan naikon kinalualo.

⁴TEMENENO Mobabasal Konakuasa bantile baikon dototopidoo naikon sinokulikon sasamba kopondikuk nabonua bunggono tukon sasamba komian nabonua mobatotopi kala-kala. Bonua-bonuadoo naikon banggadudul kanakon dototopidoo sampe teali bonua lapono motatimbun.”

⁵Malaekatoo lubat koidan tukon bantile, “Kitayo! Daano koidan komo lubat!”

⁶“Oila doiya?” dakupasadai. Konapotimbili, “Meeng kobois. Doiyamo lalim paloosano luwedoi posaapon natano nia.”

⁷Doboisoo daano kotutupo luwedoi tima. Daano yaku palatikanggene dopotutupodoo tongoluwey tukon tokita doi boisoo lalomo daano komeeng koboine mo osulang.

⁸Malaekatoo bantile, “Boine nia kulokisan paloosano.” Maka boinedoo dinodokon koidan doi bois lalomo tukon doboisoo tinutup koidan.

⁹Yaku kitayo doi bungkuk lua koboine benga dosumai yaku. Yanila daano kokapilo momoonggol buno tomisi kolong kapilo. Doboisoo budoo yanila alayo maka yanila babayo benga.

¹⁰Yaku masadai doi malaekatoo, “Doiyaa kopobabaano doboisoo?”

¹¹Napotimbili, “Doi Babel, indaa yanila naikon bangune konapo bonua bapilogotan. Kalu lapamo lapu, doboisoo yanila abesemo idoo maka napososubaiyo.”