Read Banggai ZAKHARIA 6 Bible Online

ZAKHARIA 6 - Banggai bible

ZAKHARIA 6

¹Yaku malaat batokitaan bailon. Naiya koidan sanggap kokereta polobosian mosumbut luwedoi antara lua kobunggul tambaga:

² Kereta-keretadoo adalan komo tandane, kotumbeno adalan memela, kokoluano adalan mopook,

³ kokotoluno adalan moute tukon kosanggapo adalan mokambang.

⁴Yaku sadaiyo doi malaekatoo, “Tuan oila koalatino naiya kereta-kereta polobosian nia?”

⁵ Yana timbiliyo, “Salataa lapa yanila mangadap doi TEMENENO motealikene kodunia yanila ampakono doi sanggap kojurusan.

⁶Kereta polobosian adalan mopook matandane konapinakatuu doi Babel taikon lembet. Adalan moute konapinakatuu taikon talise tukon adalan mokambang kona tujuan doi tano talikon lalom.”

⁷Salataa doadalanoo mokambang tobuato, yanila akimo nasabar tuuk taus palesayo kodunia. Malaekatoo bantile, “Potauso sulano popalesayo kodunia!” Maka yanila tauso.

⁸Lapa doiya domalaekatoo masadai doi yaku, “Adalan motauso doi Babel lapamo atasio ko TEMENENO nanggimalan.”

⁹TEMENENO bekeene teteba nia doiyaku.

¹⁰Nabantilano, “Alayomokai doi Heldai nasosubakon, Tobia tukon Yedaya, doiyamo mian-mian mosodo abali luwedoi masakukonan doi Babel. Babayomo mosobit yanila nasinosubakonnoo doi Yosia nabonua Zefanya napau.

¹¹Luwedoi mosoni tukon suasa yanila doo nabinekon, kubaiyomokai meeng kosonggo tukon paasemo doi Imam Babasal Yosua oluno Yosadak napau.

¹² Pelenggene doi yana baikon Yaku TEMENENO Mobabasal Konakuasa bantile, ‘Mian mosinumbuikon Sang Tunas naikon berhasil, doi tampat nadaanoan yana tukon yana naikon bangune koidan ko TEMENENO Na Bonua.

¹³Yanamokai naikon komobangune Daku Bonua tukon matalima pongodotian buno kai meeng kotomundo, tukon yana naikon teali pamarentah doi narayat. Meeng koimam naikon lolainge yana tukon yanila naikon balimang posinggat tukon monondok.’

¹⁴Songgodoo inabos doi Ku Bonua tuuk nonookano mopelingatio Heldai, Tobia, Yedaya, tukon Yosia.

¹⁵Mian naikon molubat luwedoi tampat moodoon tukon motomboni mobangune Daku Bonua. Kalu dobangunanoo lapamo, yanila naikon toiyo baikon Yaku TEMENENO Mobabasal Konakuasa lapamo mobitokon ikoo doi yanila. Sasaibino doo naikon teali kalu yanila bisa-bisa anggayo Daku parentah-parentah, yanila na TEMENENO Mian Bisa.”