Read Banggai ZAKHARIA 8 Bible Online

ZAKHARIA 8 - Banggai bible

ZAKHARIA 8

¹TEMENENO Mobabasal Konakuasa mobeekene nateteba nia doi yaku,

²“Yaku yase tuuno tulungiyo ko Yerusalem sabab Yaku seseange tuuno kopodungolino, tukon sabab Kuseangano, konoanggu moonas tuuk doi napomusu-musu nakota.

³Yaku naikon abali doi Yerusalem, Kukota momoliyousoo, tukon dungol idoo. Yerusalem naikon tiningoni salaku kota mosetia, tukon bunggul TEMENENO Mobabasal Konakuasa naikon sinumbuikon Bunggul Moliyous.

⁴Doi kintal Yerusalem, naikon osulang koidan kotauwa-tauwa tukon taate-taateno motuamo tuuno kalu napoampakon sio namapake tokon.

⁵Loloon-loloon doi kota naikon moono koidan tukon labuk-labuk mokambakan.

⁶Langgedoo moola tokita aki nabisa doi mian-mian modaanon tubo luwedoi bangsa nia, mau naaki nabisa tuuk Yaku.

⁷Yaku naikon salamate Daku umat luwedoi tano-tano yanila natampat lapamo biningkat,

⁸tukon babayo yanila abali luwedoi tolopot tukon luwedoi talise, tobikon yanila dongol doi Yerusalem koidan. Yanila naikon teali Kuumat tukon Yaku yanila na Mian Bisa. Yaku naikon kabiyo yanila nasetia tukon adil.”

⁹TEMENENO bantile doi Na umat, “Kenggelekai konoamo! Diabudodoo komuyu mondongoli bantilan-bantilan koidan molapamo sasaibino konabi bantile doi tempo nabininggakonan kobeton, tuuk bangune koidan Daku Bonua.

¹⁰Do tempodoo doiya akiyo komomoola sabele kobanggapi bukuno kai iyayon, tukon akiyo komorasayo aman luwedoi musuh nagangguan. Yaku lapamo lapure komeeng komian nadomba tukon bailonggon.

¹¹Bai diabudodoo mian-mian modaano motubo luwedoi bangsa nia Kulakukanggene posasala tukon lolukoo.

¹²Yanila naikon motipas kolibuang tukon aman. Yanila na anggur batang-batango naikon saomo, buta naikon mobeekon hasilo, tukon udan naikon lubat tokon lobi-lobian. Sasaibino dobalakaatoo Kubeekene doi mian-mian modaano tubo luwedoi bangsa nia.

¹³He modungoliyo ko Yehuda tukon Israel! Doi tempo mololukoo, kalukai mian-mian molulubaton pokutuke, yanila bantile, ‘Bolisii silakadoo molupaiyo ko Yehuda tukon Israel lupayo koidan ikoo!’ Bai Yaku salamatene komuyu, tobikon komian molulubaton naikon bantile doi yanila pobatiyonggon, ‘Bolisii kobalakaat moloboson doi Yehuda tukon Israel naloboson koidan doi butomu!’ Sabab kobukuanggene konoamu tukon inaikai mumatakut!”

¹⁴TEMENENO Mobabasal Konakuasa bantile, “Salataa mumbumbu kubaiyo Yaku nggimal, Yaku putusiyo tuuk hukume tuuno yanila. Yaku aki kuboliyo Daku kaputusan, baimokai nalakukanggene.

¹⁵Bai diabudodoo Yaku naikon balakatio komodungoliyo ko Yerusalem tukon komodungoliyo ko Yehuda. Jadi, inaikai mumatakut.

¹⁶ Naiyamo koparentah-parentah mosiopo lakukene: Kalu basilingan, bantilemokai komobisa doi tulamu. Beenamo kaputusan pangadilan mo adil tukon mobabayo kopaladamean.

¹⁷Inaimokai baniatene mokulokis doi tulamu. Inaimokai mobatotopi moakiyo kotakoso. Yaku mosikitene kobakokolian tukon naakian naadilan tukon namotikasan.”

¹⁸TEMENENO Mobabasal Konakuasa bekeene nateteba nia doi yaku tuuk Naumat,

¹⁹“Puasa molinakukanggon doi bituwon kosanggapo lalomo, kolimano, kopituno tukon kosongulono naikon teali lamean-lamean momoono tedesan tukon kasanangan tuuk komodungoliyo ko Yehuda. Kilakenekai komo bisa tukon podamean!”

²⁰TEMENENO Mobabasal Konakuasa bantile, “Natempo naikon lubato luwedoi kota-kota badaang naikon lubat doi Yerusalem.

²¹Modungol luwedoi kota komeengo naikon bantil doi modungoliyo kota bailon, ‘Maimo nda taus sosubaiyo ko TEMENENO Mobabasal Konakuasa tukon makabi Nabalakaat. Lainggamimokai!’

²²Maka badaang komian tukon badaang kobangsa mobukuan naikon lubat doi Yerusalem tuuk sosubaiyo Yaku TEMENENO Mobabasal Konakuasa tukon mokabi Kubalakaat.

²³Doi oloyo-oloyo doo songulo komian molulubaton naikon lubat doi meeng ko Yahudi mianno tukon bantile, ‘Kami yase koidan laba buno komuyu; sabab kami mondongoli baikon Mian Bisa balakaatio komuyu.’ ” TEMENENO Mobabasal Konakuasa lapamo basilingan.