Read Banggai ZAKHARIA 9 Bible Online

ZAKHARIA 9 - Banggai bible

ZAKHARIA 9

¹ Naiamo ko TEMENENO nateteba. Yana lapamo putusiyo tuuk moukume kotano Hadrakh tukon kota Damsyik. Bolikon tongo bense-benseno Israel, bai koidan kota Siria uuno daanokai TEMENENO koona.

²Hamat mopokallatan tukon Hadrakh koidan TEMENENO koona, bunokai koidan kota-kota Tirus tukon Sidon tukon sasaibino kopodungolino pandoi.

³Tirus lapamo bangune kobenteng-benteng tuuk doi butongo tukon mangatambun badaang tuuno komosoni tokon suasa bai tonga buno barang biasa buno bone tukon lokutuk doi loloon.

⁴Bai TEMENENO tealikene talalais. Sasaibino kotadoo nakasaan naikon Yana sakukene doi tobun lalomo tukon kotadoo susuungo naikon kabus aung kaane.

⁵ Kota Askelon tukon Gaza naikon nakitayo tukon matakutene. Ekron naikon nakitayo koidan tukon lapus saibino kona minoinikon. Gaza naikon akiyono kona tomundo, tukon Askelon naikon teali kiis akiyono komodungoliyo.

⁶Asdod naikon miano moluwedoi bangsa-bangsa mopatongi komo dungoliyo. TEMENENO bantile, “Filistin miano mo babanggaloo naikon Kulopuwo.

⁷Yanila akimo naikon koidan napomakaan sail modaano kosauno kai kinaan bailon mo pinantanggong. Saibino komian mototinggal naikon teali Kuumat tukon inaanggon salaku obos luwedoi Yehuda benseno. Ekron naikon teali anggota Kuumat, buno mian Yebos doi tempo lolukoo.

⁸Yaku naikon dagaiyo daku buta tukon alangiyo kopasukan-pasukan molulubaton naikon moalon. Yaku naikon akimokai kupataikene sasaibino komo pipiike Daku umat. Sabab konaposakisawan Yaku kitayomo.”

⁹ He modungoliyo ko Sion, potetedeso! He modungoliyo ko Yerusalem, pokokuweiso! Kitayokai! Mu Tomundo lubat tukon manaang! Yana Tomundo moadil mobabayo kasalamatan. Bai aki nababanggaal konoano yana lubat molokiti meeng kokeledai, keledai mengula.

¹⁰ TEMENENO bantile, “Kereta-kereta polobosian luwedoi Efraim naikon Kusakukene, saibino koadalan doi Yerusalem naikon Kuakiyenggene tukon kopana naikon Kumanase. Mu Tomundo naikon umumkanggene kopaladamean antara bangsa-bangsa. Luwedoi tobun kotobun yana naikon balakuasa, luwedoi Efraim Paisunobatango polong doi dunia bunduno.”

¹¹ TEMENENO bantile doi Naumat, “Tolongo Yaku komokubaiyo koperjanjian tukon komuyu, perjanjian moinakui tukon sosubakon sauno, naikon Kubebaskanggene komu rayat komo sakisaa doi masakukonan lalomo bunokai mian motakurung doi bubung momotuul lalomo.

¹²Abalimokai he mian-mian mosinakukon, diabudodoo komuyu daano kopomoinian. Abalimo kai doi tampat musoopan, Yaku naikon tataap balakaatio komuyu. Ndongoliyokai: Komuyu naikon lua lunggon Kubalakaatio sabab saibino kosakisawan mo lapamo komuyu toupio.

¹³Yehuda naikon Kupakeyo bunokai talenga napanah; tukon Israel buno panah matano mo lapamo sinadia napinanakon. Modungoliyo ko Sion Kupakeyo bunokai sabel; tukon dosabeloo Yaku pakeyo polobosi Yunani mianno.”

¹⁴TEMENENO naikon okitakene kobutongo doi Naumat, bunokai didip Konapanah matano Napanakonano. TEMENENO Moinakatandak Tuuno naikon puuke kotrompet pongosi molobosian maka ampakon matailukon doi sokoi lalomo talikon lalom.

¹⁵Kona umat tantu Yana beena soopan, tobikon doiya sasaibino konapomusuh moola napolungguiyo. Buno mian momalangu mowowoakon, bunodoiyakai konapowowokonan doi polobosian lalomo. Bunokai sau sosubakon mokinundongikon doi balabaan bunggono bunokai doiya yanila namusuh sauno motokundang.

¹⁶Kalu kooloyono lubat, TEMENENO naikon salamatene Kona umat, buno padagai salamatene kona domba luwedoi silakaan. Yanila naikon sanaang doi TEMENENO Nabuta, buno songgo permata batomundoan motontilang.

¹⁷Bukanmain naikon konamonondokan ko TEMENENO Nabuta, bukanmain konamonondokan tukon natambonganan! Idoo koanggur tukon gandum tubo molumbang, Kubaiyo komalane-boine tosuungi bukuan.