Read Banggai MALEAKI 1 Bible Online

MALEAKI 1 - Banggai bible

MALEAKI 1

¹Naiamokai TEMENENO nateteba doi Maleaki tuuk Israel miano.

² TEMENENO bantil doi Namian, “Yaku mamaasikene komuyu.” Bai yanila timbiliyo, “Bulaandokai TEMENENO momamaasikene kami.” TEMENENO timbiliyo, “Bolikonkai Esau Yakub utuso langgongo? Bai Yakub Yaku mamaasikene,

³sedangkai Esau Kumosikitene. Esau nalipu mobunggul lapamo Kumanase, tukon butano Kusalakanggene doi iyayon-iyayon mobarani doi padang lalomo.”

⁴Kalu bantil Esau nakaturunan, Edom mian-miano doo bantil, “Komai kota-kota lapamo minanas, bai kami naikon bangune koidan,” maka TEMENENO naikon timbiliyo, “Yanila moola bangune koidan, bai Yaku naikon lubange. Yanila naikon sinumbuikon ‘Tano Lokis’ tukon ‘Bangsa mokanakon TEMENENO nanggimalan tuuk sidutu-posidutukon!’ ”

⁵Bangsa Israel naikon kitayo susungo, tukon bantil, “Tutuumo babasalo ko TEMENENO; Nakakuasaan polong doi mobolikon Israel nabuta.”

⁶TEMENENO Mobabasal Konakuasa bantil doi sasaibino ko imam, “Meeng kopau moodotiyo kotamano, tukon meeng kopeleleani moodotiyo konatuan. Yaku nia mumajikan; bulaando moaki mumatakutana-Ku? Komuyu botulai Yaku, bai komuyu daano momansadai doi Yaku, ‘Tukon cara bulaando komai totulaiyano Ikoo?’

⁷Tukon sosubakene kokinaan moaki namoola sinosubakon doi Kubalaban bunggono. Maka komuyu masadai, ‘Tukon cara inde mailakukon moaki napalatikanggene Ikoo?’ Tukon mokodikitio Daku balabaan.

⁸ Kalu komuyu sosubakene doi Yaku iyayon mopiit, momasakit kai molemat, bolikonkai doiya kokubai mosalah? Soba beena iyayon mopokana doiya doi Gubernur! Oilakai yana naikon sanaang tukon lakukene komuyu tukon monondok?”

⁹Diabudodoo he imam-imam soba kabiyo doi Mian Bisa sulano Yana naseseange kita. Yana aki naikon namotimbili komu sambeang; tukon doiya musala susuumu.

¹⁰TEMENENO Mobabasal Konakuasa bantil, “Lobian komonondok Kubonua tataapono tinutup, sabab akiyo kotakoso komuyu mangakait aung doi Kubalaban bunggono. Yaku aki kuyase doi komuyu, tukon aki yase matalima musosubakon.

¹¹Kobangsa-bangsa posaapon kodunia odotiyo Yaku. Doi yaa-yaa kokamangian sinua tuuk odotiiyo kosambunggu tukon sinosubakon kososubakon-sosubakon motalakana, sabab saibino kobangsa odotiiyo Yaku!

¹²Bai komuyu totulaiya-Ku sabab anggene Kubalaban akiyo koanggano, tukon mososubakon idoo kinaan komuyu mo akikene.

¹³Mubantilan, ‘Kita bantalakenemo tukon sasaibino doo’, tukon komuyu moaki napalatikanggene Yaku. Kumuyu mababa iyayon moindikuk, iyayon molemat kai momasakit tuuk sinosubakon doi Yaku. Komuyu pikikene Yaku yase matalima musinosubakonoo?

¹⁴Kinitukokai komo bakokoli mososubakene doi yaku iyayon moakiyo koanggano, kalu doi antara iyayon mopiniala daanon iyayon monondok molapamo nadinondikon doi Yaku! Sabab Yakumo Tomundo mo Kinabasal, tukon sasaibino kobangsa odotiyo.”