Read Banggai MALEAKI 2 Bible Online

MALEAKI 2 - Banggai bible

MALEAKI 2

¹TEMENENO Mobabasal Konakuasa bantile doi sasaibino ko imam, “Naiyamo Daku parentah doi komuyu:

²Odotiiyo kai Yaku tukon mukakabai. Kalu komuyu aki poyase mondongolii Kubantilan, komuyu naikon Kukutuke. Saibino komuyu motalimayo salaku reseki naikon tobolii teali kutuk. Konatutuwan saibino komondok lapamo Kukutuke, sabab komuyu aki popusinggene Daku parentah.

³Mupau-pau naikon Kuukume, tukon dudusomu Kukodikitiyo tukon iyayon nakotoran komuyu mososubakene, tukon komuyu naikon inabas doi kotoran nainatambunan.

⁴ Maka komuyu toiyomo kai baikon parentah nia lapamo Kubeekene, sulano Kuperjanjian tukon saibino ko Imam Lewi nakaturunan tataap kinonoi.

⁵ Perjanjianoo lalomo Yaku janjikene doi yanila tubo moaman tukon monondok, tukon Kusumboliyo yanila odotiyo Yaku. Doi tempodoo yanila daanon moodotiyo Yaku tukon matakutan doi-Ku.

⁶Yanila otunggulikene komo bisa, tukon bolikon mosalah. Yanila kilakana-Ku tukon jujur loingiyo Kumongiasan. Yanila koidan badaang komian natinulungi tuuk aki koidan lakukene komo lokis.

⁷Bisa saibino ko imam nakawajiban tuuk mongotunggul mobisa tentang Yaku, TEMENENO Moinakatandak Tuuno. Doi yanilamo korayat sio namasadaikene oila Daku mongiasan, sabab yanila doo Kubito-bito.

⁸Bai diabudodoo nia, komuyu, imam-imam, liaso luwedoi loloon mobisa. Muotunggul-otunggul babayomo badaang komian tuuk mokubai salah. Komuyu manasemo koperjanjian Yaku tukon komuyu mokabaiyo.

⁹Maka Yaku doo naikon kubaiyo komuyu umat Israel aki napalatikanggene sabab komuyu aki potaatio Daku mongiasan, tukon sabab komuyu pobeda-bedakanggene komian mootunggule Daku mian doi tempodoo.”

¹⁰Bolikono kita saibino mototoli Tama mopokana? Bolikono kita saibino Mian Bisa mopasitakayo pokana? Kalu buno doiya, bulaando kita moakiyenggene perjanjian Mian Bisa tukon tumbunggita mokubaiyo?

¹¹Yehuda miano langgalemo ko Mian Bisa naperjanjian doi yanila tukon lakukene kolangge-langge mominatakuton doi Yerusalem tukon posaapon kotano. Yanila lapamo kodikitio TEMENENO Na Bonua mo kilakene tukon osowan boi-boine mososubaiyo kobangsa bailon napilogot-pilogot.

¹²Boliisi mian-mian momokubai buno doiya TEMENENO alaase luwedoi Israel miano. Biliisi yanila akimokai namalaing dobangsa doo mososubakon sosubakon doi TEMENENO Mobabasal Konakuasa.

¹³Tukon naiya mukokubai bailon. TEMENENO Nabalabaan komuyu obosiyo tukon paisu; komuyu kokil tukon mandaung sabab TEMENENO akimo napokonoi koidan matalima musosubakon-sosubakon.

¹⁴Komuyu sasaibino bulaando Yana aki nayase momatalima. Sabab TEMENENO toiyo komuyu aki pomolole doi boine komuyu mokilayo doi tempo mutabokonan. Boine doo mutuboan tulano, bai komuyu lapamo hianatio yana, maukai doi Mian Bisa salaano komuyu lapamo berjanji tuuk tataap molole doi yana.

¹⁵Bolikino Mian Bisa Mo Meeng motealikene komuyu meeng kobutong tukon meeng koansang tukon boinedoo? Oilanokai ko TEMENENO namakisuut tukon doiya? Akiyo kobailon sulano komuyu malaat pau-pau moteali Mian Bisa namian motulen. Jadi dagaiyo kobutomu inai nadaano doi antara komuyu moaki molole doi naboloki.

¹⁶“Yaku mosikitene kopotinggalan,” TEMENENO Mian Bisa Israel bantile, “Yaku misikitene kalu daano komeeng komian luwedoi komuyu mokubai lokis doi antara naboloki. Maka dagaiyo kai kobutomu tukon inai mohianatio tuuno muboloki.”

¹⁷Komuyu kubaiyo ko Mian Bisa pastiu tukon mubasilinganan. Bai komuyu masadai, “Bulaando kami mokubaiyo pastiu ko TEMENENO?” Tukon bantile, “Saibino komian mokubai lokis TEMENENO anggene monondok tukon Yana pokonoi doi yanila.” Kai tukon masadai, “Yaando ko Mian Bisa moinaanggon adil doo.”