Read Banggai MALEAKI 3 Bible Online

MALEAKI 3 - Banggai bible

MALEAKI 3

¹ TEMENENO Mobabasal Konakuasa timbiliyo, “Yaku naikon kapatuwo Daku bobitokon tuuk mosadaiyo kololoon tuuk Yaku. TEMENENO komuyu mounggoliyo, naikon lubat doi Kubonua. Daku bobitokon komuyu molindukene doo naikon lubat tukon popitoikene Daku perjanjian.”

² Bai indee moola tiliyo doi TEMENENO naoloyo lubatan tukon okitakene kobutongo? Sabab Yana buno aung tukang mokindeke kotambaga, tukon buno sabun pobusoi pakean.

³Yana lubat tuuk moukumiyo, buno mian mo mokumesi mokindok suasa, bunomo doiya TEMENENO nabobitokon naikon mokindedeke saibino komian sulano yanila mososubakon sosubakon tukon cara TEMENENO namongiasan.

⁴Maka buno doi tempo loluk, TEMENENO naikon pokonoi doi sosubakon mosinosubakon luwedoi umat Yehuda tukon Yerusalem doi Yana.

⁵TEMENENO matano Mobabasal Konakuasa, “Yaku naikon lubat doikoo tuuk moukume Yaku naikon mosobit teali sakisii motuuk doi tolosupa-tolosupa, mian-mian mobaloloa, mobasakisii kala-kala; mokubai lokis doi nabenano tambo doi mian monggitambo, mopipiike sasaibino kobalu, moakiyo kotamano-tinano tukon mian molulubaton; motuuk doi saibino komian moaki naodotiyo Yaku.”

⁶“Yakumo ko TEMENENO, tukon Yaku aki natobolii. Tobikon doiya komuyu, Yaku nakaturunan, aki nasinilakakon.

⁷Buno tumbumuyu looluk, komuyu saibino lapamo lias luwedoi Kuukum-ukum tukon aki nasetia ampakokene. Abalimokai doi Yaku maka Yakukai naikon abali doi komuyu. Bai komuyu masadai, ‘Oila komo sio kami lakukene tuuk abali doi komuyu?’

⁸Diabudodoo Yaku masadai doi komuyu: Moolakon kai banggapi bangokolii doi Mian Bisa? Tantu aki. Bai komuyu koidan tipuwo Yaku. Komuyu masadai, ‘Bulaandomokai?’ Kupotimbili: Meeng koobos luwedoi sangulo koobos mobineal tukon mobeena meeng koobos luwedoi songulo koobos.

⁹Posaapon kobangsa tipuwo Yaku, maka komuyu kanakon balaa.

¹⁰ Babayomo meeng koobos doi songulo koobos sasaibino doi kubonua sulano nadanon kokinaan molobian indaa. Undiyomokai Yaku, maka komuyu naikon kitayo baikon Yaku mobukayo tataapon-tataapon surgaa tukon lobiyonio komuyu tukon saibino monondok.

¹¹Yaku aki naikon sodiikene kocara momanase mudunia hasilo; muanggur batang-batango naikon badaang kosaono.

¹²Maka komuyu naikon saibino kobangsa bantile monondok, sabab mutano teali tampat monondok tuuk dinungoli.”

¹³TEMENENO bantile, “Mubantilan-bantilan tutuu totulai Yaku. Bai komuyu masadai, ‘Oila kami nabinantil tentang ikoo?’

¹⁴Komuyu bantile, ‘Palasumakai bakaleda doi Mian Bisa. Oila kotakoso kita lakukene kuajiban tuuk TEMENENO Mobabasal Konakuasa, kai tudoikene doi Yana baikon kita manasakene konda kasalahan.

¹⁵Kita kitayo baikon komian-mian mobabanggaal sanaang. Komian lokis aki natolongo tosuungi monondok, bai kalu yanila ujiyo ko Mian Bisa nasabaran tukon mokubaiyo lokis, yanila koidan luput.’ ”

¹⁶Maka mian-mian momatakut doi TEMENENO basilingan meeng tukon bailon. TEMENENO ndongoliyo tukon palaatikanggene oila yanila nabinatil. Mian-mian moodotiyo Yana tukon matakutene doi Yana tinulis kosambuno doi meeng kokitab lalomo sasatan modano doi salaano.

¹⁷TEMENENO Mobabasal Konakuasa bantile, “Yanila naikon teali Kuumat. Doi oloyo Yaku tindokiyo, yanila naikon teali konggu Kusineang. Yaku naikon mamasikene yanila, buno meeng kotama moseseange konapau mosatia doi Yana.

¹⁸Kuumat naikon kitayo koidan konabeda antara mian monondok tukon mian lokis, antara mian mo bakaleda doi Yaku tukon moaki.”