Read Banggai MARKUS 8 Bible Online

MARKUS 8 - Banggai bible

MARKUS 8

¹Aki namalumbit doimbaa, daano koidan komeeng komian tambuno badaang molubat pototongi. Sabab yanila akiyo kona kinaan, Yesus uange Kona pololaing-pololaing tukon bantile,

²“Yaku mamaasikene namian nia badaang. Lapamo tolu kooloyo kona kalumbit yanila napolaing-laingan Yaku, tukon diabudodoo yanila akiyono kona kinaan.

³Kalu Yaku sumboliiyo yanila namule tukon tiano malaal, yanila naikon padut doi loloon tanga. Tukon koidan doi yaniladoo daano komo lubat doi naodoonan.”

⁴Yesus napololaing-pololaing timbiliyo, “Doi lipu mo tambasiil nia, inaando komian namoola malaat kinaan mosabe motuuk sasaibino namian nia?”

⁵“Daano kobulaa kona kadaang koroti doi komuyu?” Yesus mansadai. “Pitu,” yanila timbiliyo.

⁶Maka Yesus sumboliiyo do mianoo badaang osulang doi buta bunggono, maka Yana alayo do rotidoo mopitu tukon berdoa doi Mian Bisa. Doibundu Yana bisi-bisiliyo do rotidoo tukon limano maka beekene doi Napololaing-pololaing moebe-ebese doi mian-mianoo. Maka Dona pololaing-pololaing lakukanggene.

⁷Yanila daano kobubula kona pai ikan popoisik koidan. Yesus doakene doi Mian Bisa do ikan-ikanoo, maka sumboliiyo kona pololaing-pololaing moebe-ebese do ikan-ikanoo koidan.

⁸Yanila kaan polong bobosul — daano uga-ugaate sangkap koloon komian mo kaan. Doibundu Yesus napololaing-pololaing pototongikene kolabino — pitu kobois komo moono. Maka Yesus sumboliiyo do mian-mianoo namule,

¹⁰tukon Yana maka Napololaing-pololaing banggadudul lakit doi duangan tukon ampakon doi lipu Dalmanuta.

¹¹ Bubula ko Parisi miano molubat doi Yesus, tukon ponggeeleki Yana sulano tongodinggala. Yanila kabiyo Yesus nakubaiyo komo minasaindinggon salaku meeng kotanda Yana baikon molubat doi Mian Bisa.

¹² Yesus basilingan maka timbiliyo, “Oila kosababpo komian natempo nia mokabiyo Yaku kubaiyo komo minasaindinggon? Aki! Yaku aki kumebeekon kotanda mobuno doiya doi yanila!”

¹³Maka Yesus tinggale yanila, tukon usok doi duangan lalomo; doibundu Yana ampakono doi paisudoo sembeleng.

¹⁴Yesus Napololaing-pololaing toliminggene momakanggi roti mosabe. Yanila tongo meeng koroti modaano doi duangan.

¹⁵ “Pobada-badagai doi Parisi mian-miano naragi tukon Herodes naragi,” Yesus bantile doi yanila.

¹⁶Maka Yesus Napololaing-pololaingoo tambuuno mosalitayo do langgedoo. Yanila bantile, “Yana bantile buno doiya, sabab kita akiyo konda roti.”

¹⁷Yesus toiyo oila yanila napinobantikon. Tobikon doiya Yana mansadai doi yanila, “Bulaando komuyu mopobantikenggene sabab moakiyo kopo roti? Oilakai komuyu aki potoiyo tukon akiyoon pomangalatikene koidan? Buno doiya kona mokisulan komu pikiran?

¹⁸ Komuyu daano komatamuyu — bulaando moaki pokitayo? Komuyu daano kotolingaimuyu — bulaando moaki pomolongol? Aki kai komuyu poneneeke

¹⁹naikon do rotidoo molima Yaku mo bisi-bisiliyo motuuk doi lima koloon komian? Bulaando kobois komoono kolabino dokinaanoo komuyu pototongikene?” “Songulo lua,” yanila timbiliyo.

²⁰“Tukon dotempodoo Daku bisi-bisiliyano dorotidoo mopitu motuuk doi sangkap koloon komian,” Yesus sadaiyo koidan, “bulaa kobois kolabino dokinaanoo komuyu mo pototongikene?” “Pitu,” yanila timbiliyo.

²¹“Eh, akiyoon kai komuyu pomangalatikene koidan?” Yesus bantile koidan.

²²Yanila polong doi Betsaida. Idoo komian babayo komeeng komian mopiit doi Yesus, tukon kabiyo sulano Yana nataape do mianoo mopiit sulano naaline.

²³Maka Yesus taaniyo do mianoo mopiit limano tukon tandane yana natobuat doi kotadoo. Doibundu Yesus tupeiyo do mianoo matano. Yana abese kolimano doi mianoo matano, maka sadaiyo doi yana, “Moolamo kai ikoo kitayo komeeng kolobo diabudodoo?”

²⁴Mianoo kitayo doi salaano, maka bantile, “Oode. Yaku kitayo komian mopapakon; bai yanila tokita buno kayung.”

²⁵Yesus taapene kolimano koidan doi mianoo mopiit. Naiya nia do mianoo mopiit kakabukuan sulano namoolakene mongkita. Komatano mopiit tangalino, tukon yana kitayomo sasaibino tukon tontong tuuno.

²⁶Maka Yesus bantile doi yana, “Mulemo, tukon inaimo moabali doi kotadoo.”

²⁷Yesus tukon napololaing-pololaing ampakon doi kampung-kampung moloolani ko Kaisarea Filipi. Doi loloon tangano Yesus mansadai doi yanila, “Mololoi komian nabantilano, indee kai na Yaku nia?”

²⁸ Yanila timbiliyo, “Daano komo bantile: Yohanes Pasau Mian; daano koidan komo bantile Elia, tukon kobailon koidan bantile: daano komeeng konabi.”

²⁹ “Bai mololoi komuyu susuumuyu, Yaku nia indee?” Yesus mansadai. Petrus timbiliyo, “Tama doiyamo ko Tomundo Pasalamat!”

³⁰Maka Yesus ingotiikene yanila, sulano naaki napopitoikene doi inde-indee komiano tentang kobutongo.

³¹Lapa doiya Yesus tambuunemo kona mongotunggulan doi napololaing-pololaing baikon Manusia na Pau sio nasinakisaa tuuno, tukon binamusukon doi tua-tua, imam-imam kapalano, tukon guru-guru agama. Yana sio nainakate, bai doi oloyo kotoluno Yana tubo koidan.

³²Tukon tontong tuuno Yesus popitoikene do langgedoo doi Napololaing-pololaing. Maka Petrus kedele Yesus doi bibilo, tukon anukene Yana.

³³Maka Yesus mbaleng tukon kitayo Kona pololaing-pololaing, maka anukene Petrus, “Saakon naimbaa, Ponggoda! Komu pikiranoo pikiran banggapi; bolikon Mian Bisa Napikiran!”

³⁴ Doibundu Yesus monguang mian badaang mo daano idoo posinggat-singgat tukon Napololaing-pololaing. Maka Yana bantile doi yanila, “Komian mo yase lainge Yaku sio natoliminggene kona limang susuungo, doibundu tanggunge kona kayung sempang, tukon banggadudul lolainge Yaku.

³⁵ Sabab komian mo yase salamatene kona tuboan, naikon lapus kona tuboan. Bai komian mo salakanggene kona tuboan motuuk doi Yaku tukon motuuk doi Bilita Monondok moluwedoi Mian Bisa, komo salamatene.

³⁶Oila kona linaat doi meeng-meeng komian, kalu sasaibino nadunia nia teali nalobo, bai yana lapus kona tuboan?

³⁷Moola kai do tuboanoo sinoboli tukon langge-langge?

³⁸Kalu meeng-meeng komian mamaa momangakukene Yaku tukon kuotunggul doi tempo nia molokis, Manusia na Pau koidan mamaa mangakukene do mianoo, doi tempo nalubatan naikon tukon Tamano nakuasa, linolaing malaekat-malaekat mo moliyous.”