Read Banggai LUKAS 11 Bible Online

LUKAS 11 - Banggai bible

LUKAS 11

¹Daano kooloyo meeng Yesus sambeang doi meeng kotampat. Lapa sambeang, daano komeeng Kona pololaing-pololaing mobantile, “Temeneno, coba otunggule kami mosambeang buno Yohanes mootunggule kona pololaing-pololaing mosambeang.”

²Maka Yesus bantile doi yanila, “Kalu komuyu sambeang, pobantile buno naiya, ‘Tama, Ikoomo ko Mian Bisa mo Meeng. Boliisi ikoo musinosubai tukon muinodotii.

³Beena sasamba kooloyo kokinaan kami mo palaluuwo.

⁴Ompuniyo kombai lalim-lalim, sabab kami koidan ompuniyo samba komian mo daano kona sala doi kami. Tukon inai mobatadikene nalapus komai manganggaan salataa kami sinobai.’ ”

⁵Yesus bantil doi napololaing-pololaing, “Kalu andeno meeng komian doi komuyu nokon ampakon doi tulano nabonua doi popook pintanga, tukon bantile, ‘Tulando, binggotiiyaku tolu koroti,

⁶sabab tulanggu daano doi naampakonan, sodo nasampu doi bonua tukon akiyono daku kinaan motuuk doi yana!’

⁷Kalu andeno do tulamudoo ikoo mo lubotiiyo timbiliyo buno naiya, doi nabonua lalomo, ‘Inai mokubaiyo yaku susa! Tataapon tokuncimo yaku tukon kupau-pau moolomo. Yaku aki namoola bangun tukon mebee oioila doikoo!’ ”

⁸“Maka bulaandomo?” Yesus bantile banggadudul. “Yaku bantile, oode! Mau kai ikoo nadaanoan kotulano, yana aki naikon nayase bangun tukon mebee oioila doikoo. Bai tobikon ikoo aki mumarasa mamaa sulano momangkabi doi yana sidutu momeeng, maka yana naikon bangun koidan tukon beena doikoo oila komo ikoo palaluuwo.

⁹Jadi, yaku bantile doikoo: Manggabimo, maka komuyu naikon binee; umboliiyo, maka komuyu naikon malaat; tokiyo, maka kotataapon naikon binukakon doikoo.

¹⁰Sabab komian mo mangkabi naikon mantalima; mian mo moumbolii naikon malaat, tukon mian mo batoki naikon binukakon kotataapon.

¹¹Doi antarano komuyu oilakai daano kotama komo beekene kobinda doi mupau, kalu yana mangkabi ikan?

¹²Kai beena manda sopit, kalu yana mangkabi nggalau?

¹³Mau kai komuyu polokis, komuyu toiyo koidan beekene komo monondok doi mupau. Baino kai koidan ko Tamamu doi surgaa! Yana naikon beekene Kona Roh doi yanila mo mangkabi doi Yana!”

¹⁴Daano komeeng kooloyo Yesus siikayo ibiliis natobuat doi meeng komian moponga. Salataa do ibiliisoo tobuato, do mianoo tambuuno mobasilingan. Badaang komian momasainding,

¹⁵ bai daano komo bantile, “Yana moola siikayo koibiliis sabab kuasa Beelzebul do ibiliisoo kapalano.”

¹⁶ Daano koidan komian bailon mo yase dinggabaiyo Yesus, jadi yanila kabiyo Yana nakubaiyo komeeng mo minasaindinggon buno tanda baikon Yana molubat luwedoi Mian Bisa.

¹⁷Bai Yesus toiyo yanila namakisuut. Maka Yana bantile doi yanila, “Kalu meeng konegara motongobos-oboso doi golongan-golongan mo pomusu-musu, do negaradoo akimo naikon nabataanggon. Tukon meeng kobonua tumbuno mo tongobos-oboso tukon pomusu-musumo meeng tukon bailon, naikon silakamo.

¹⁸Bunomo koidan doi Ibiliis lalomo nabatomundoan; kalu meeng kotambuno poakate tukon tambuno bailon, do batomundoanoo naikon tolubang. Komuyu bantile baikon Yaku siikayo koibiliis sabab kuasa Beelzebul.

¹⁹Kalu buno doiya, tukon indee nakuasa komu pololaing-pololaing mosiikayo do ibiliisoo? Komu pololaing-pololaingoo susuungo komo okitakene baikon komuyu sala!

²⁰Bai Yaku siikayo koibiliis tukon kuasa Mian Bisa, tukon doiya koalatino baikon ko Mian Bisa lapamo atambuune Kona baparentaan doi komuyu.

²¹Kalu meeng komian mo bukuan, tukon sukup kona sanjata, totooliyo kona bonua susuungo, sasaibino kona langge naikon salamat.

²²Bai kalu meeng komian lobian kona bukuanan molobosiyo yana tukon lungguiyo yana, maka do mianoo mo lobian kona bukuanan naikon lambasemo sasaibino kona sanjata binalaanggon do bonuadoo tumbuno, maka ebe-ebesemo sasaibino kona langge-langge.

²³ Mian mo aki naloingiyo Yaku tutuu lawane Yaku, tukon mian mo aki natomboniiyo Yaku tutuu lusayo Daku limang!”

²⁴“Kalu naikon koibiliis otinggalemo memeeng komian, do ibiliisoo boilingiyomo kolipu-lipu mo motuul sulano namoumbolii lipu natade-tadean, bai yana aki namalaat. Tobikon doiya, yana bantile, ‘Yaku naikon abali doi bonua mo lapamo yaku tinggale!’

²⁵Salataa yana polong imbali, yana laatemo do bonuadoo bilisii tukon taatul.

²⁶Maka yana ampakon tukon babayo kopitu koroh bailon mo lobian kona kulokisan doi yana. Doibundu yanila usok doi mianoo lalomo maka dungol idoo. Tukon doibundu do mianoo ndondoongo teali lobian kona kulokisan doi tumbeno.”

²⁷Salataa Yesus bantile buno doiya, meeng koboine doi antara mian badaangoo bantile doi Yesus, “Bisa kona monondokan koboine mo suunge tukon susuwe Ikoo!”

²⁸Bai Yesus timbiliyo, “Lobian kona monondokan koidan komian mo molongol Mian Bisa nabantilan tukon moampakonggene!”

²⁹ Daanoon komian motokuuniyo Yesus, Yana banggadudulkene kona salita, bantile, “Bisamo kai kona kulokisan komian doi lounu nia. Yanila kabiyo komeeng komo minasaindinggon sulano yanila namoola manganggaa doi Yaku; bai yanila aki naikon nabinee meeng komo minasaindinggon, tongo masaindinganano Nabi Yunus.

³⁰ Bunomo lakon Nabi Yunus teali meeng komasaindingan doi kota Niniwe miano, bunomo lakon koidan Manusia na Pau naikon teali meeng komasaindingan motuuk doi mian doi lounu nia.

³¹ Doi Oloyo Nakiamatan, Tomundo moluko moluwedoi lipu Lalom naikon nggimal polaing komian doi lounu nia, tukon tuduwo yanila. Sabab, sulano namondongolii Salomo napandoiyan mongotunggul, do Tomundo boinedoo kubaiyo kona ampakonan mo dodoon tuuno luwedoi dunia bunduno. Bai dimbaa diabudodoo daano komo lobian kona babasalan doi Salomo!

³² Doi Oloyo Nakiamatan, Niniwe miano naikon nggimal polaing komian doi lounu nia, tukon tuduwo yanila, sabab do Niniwe mianoo badodoloono doi yanila nalalim-lalim salataa Yunus mongotunggul doi yanila. Bai dimbaa diabudodoo daano komo lobian kona babasalan doi Yunus!”

³³ “Akiyo komian mo suayo kona posi maka naseekene kai kukupe tukon gumbang. Yana naikon abese do posidoo doi aino, sulano komian mo usok namoola kitayo kona madialanan.

³⁴Mata daano posi tuuk butonggita. Kalu komatamu molino, sasaibino kobutomu madialan tuuno. Bai kalu komatamu songgoliiyon, sasaibino kobutomu teali kalipookan tuuno.

³⁵Tobikon doiya, pobada-badagai, inai do madialanoo mo daanomo doikoodoo nateali kalipookan.

³⁶Kalu sasaibino kobutomu madialan, tukon akiyo kosoobos komo kalipookan, maka sasaibino kobutomudoo madialan tuuno buno diniolii posi panano.”

³⁷Sambuno Yesus basilingan, meeng ko Parisi miano uange Yana kaan doi nabonua. Maka Yesus ampakono kaan idoo.

³⁸Parisi mianoo masainding mokitayo Yesus kaan tukon aki nakumesiyo kolimano looluk monurut paraturan agama.

³⁹Tobikon doiya ko Temeneno bantile doi yana, “Takainomo komuyu Parisi mian-miano kopo kabiasaan mokumesi manggo tukon pinggan tongo doi tonggulungo, bai doi butomuyu susuumu lalomo moono tukon matikasan tukon nakulokisan.

⁴⁰Komuyu longas! Bolikon kai Mian Bisa komo kubaiyo doi bagian tonggulungodoo, lapamo kubaiyo koidan doi lalomodoo?

⁴¹Komo daano doi manggodoo lalomo tukon doi mupingganoo doiyamo komo sio pobeekene doi mian motalalais. Tukon do caradoo, sasaibino naikon teali bilisii doikoo.

⁴² Silakamo komuyu, Parisi mian-miano! Komu sinakakon hasilo buno selasi tukon inggu tukon rampa-rampa bailon, komuyu beekene kosongulo koobos doi Mian Bisa, bai kokaadilan tukon seangano ko Mian Bisa komuyu aki popusinggene. Padahal doiyamo komo sio polakukanggene; tukon aki potoliminggene kobai-bailon koidan.

⁴³Silakamo komuyu, Parisi mian-miano! Komuyu yase kotampat-tampat mo monondok doi bonua kaleda lalomo, tukon yase inodotii doi labotan-labotan.

⁴⁴Silakamo komuyu! Komuyu buno kibul mo akiyo kopaliasano, mo tinudo-tudongii mian bai aki nasinadari.”

⁴⁵Meeng koguru agama bantile doi Yesus, “Tama Guru tukon do bantilan-bantilanoo, Tama totulaiyo kami koidan!”

⁴⁶Yesus timbiliyo, “Silakamo komuyu koidan, guru-guru agama! Komuyu tuntute kolangge-langge mo maaling tukon mebee paraturan-paraturan mo babalat, bai komuyu susuumuyu mau natongo kai soisik aki poyase tulungiyo komian moampakonggene.

⁴⁷Silakamo komuyu! Komuyu bangune kokibul motuuk doi nabi-nabi, mumbumbu looluk moakateyo.

⁴⁸Jadi komuyu susuumuyu akuiyo baikon komuyu satujuiyo oila komo lapamo pombumbu looluk kubaiyo; sabab takainomo yanilamo komo akateyo do nabi-nabidoo tukon komuyumo kai komo kubaiyo kona kibul.

⁴⁹Doiyamo kosababpo ko Mian Bisa Napandoiyan bantile, ‘Yaku naikon makapatu doi yanila nabi-nabi tukon kusosumboliiyon; kobailon naikon inakate tukon kobailon naikon linoilokis!’

⁵⁰Mian Bisa kubaiyo doiya sulano komian nai lounu nia inukum sabab mangakatean mo kinubai doi sasaibino konabi salataa dunia napinasitakaan,

⁵¹ mangatambuun Habel nainakatean polong doi Zakaria nainakatean, kona tealian doi pokalatanan kobalabaan tukon Temeneno Na Bonua. Poanggayomo: Komian doi lounu nia bisa naikon inukum sabab sasaibino doiya.

⁵²Silakamo komuyu, guru-guru agama! Kunci sulano nabukayo kotataapon motoiyan inabos doi komuyu, bai komuyu susuumuyu aki poyase usok doi lalomo sulano poumboliiyo do motoiyanoo. Bai komuyu semba-sembange komian mo kakaate mousok doi lalomodoo!”

⁵³Salataa Yesus otinggale do tampatoo, guru-guru agama tukon Parisi mian-miano nggimoliiyo Yesus tutuuno. Yanila tambuuno mopeka-pekaiyo Yana sulano Yana nayase basilingan tentang badaang kolangge.

⁵⁴Tukon daanoon mobuno doiya yanila perhatikanggene Yana mono-monondok sulano napo lakoyo komeeng kolangge mo sala konabantilano.