Read Banggai LUKAS 12 Bible Online

LUKAS 12 - Banggai bible

LUKAS 12

¹ Doi ribu-ribuno komian podipot-dipoti polong daano komo tinudang-tudang koaino. Daanoon do mianoo mopototongi, Yesus bantile doi Napololaing-pololaing, “Pobada-badagai ko Parisi miano napangaani, Daku makisuut, yanila nakadu-kadukonan.

² Akiyo komo tosookon mo aki naikon natokita, tukon akiyo komo linasiakanggon komo aki naikon natinoi.

³Komo komuyu bantile doi popook, naikon tololongolo doi namodoakonan; tukon komo komuyu polisaukene doi mian tolingaino doi kombiang motatutup lalomo, naikon pinolonggon doi namolo-moloasan.”

⁴“Poneneeke, tula-tulanggu! Inaikai pomatakutene doi yanila mo akateyo kobutonggita bai aki namoola kubaiyo lobian doiya.

⁵Tadukai Yaku tudoikene doikoo indee komo sio pomatakutene. Pomatakutene ko Mian Bisa! Sabab salataa lapa mangakate, Yana berkuasa sakukene doi naraka lalomo! Poanggayomo, Yana komo sio pomatakutene.

⁶Lima kotomisi peleet binalukon koolino lua kodoy mopoipoisik tuuno. Mau kai nabuno doiya akiyo komeeng kotomisi Mian Bisa motoliminggene.

⁷Buuk doi olumu lapamo inait sasaibino, tobikon doiya inaikai matakut, komuyu lobian mododoon koanggano doi tomisi pepeleet!”

⁸“Poneneeke mono-monondok: Mian mo mangakukene doi mian badaang salaano baikon Yana kupololaing, Yana naikon Manusia na Pau koidan akuiyo doi Mian Bisa namalaekat-malaekat salaano.

⁹Bai mian mo akiyenggene doi mian badaang salaano baikon yana Kupololaing, yana naikon Manusia na Pau akiyenggene doi Mian Bisa namalaekat-malaekat salaano.

¹⁰ Kalu naikon komian mabantil meeng kolangge tantange ko Manusia na Pau, yana moola inompuni; bai kalu yana totulaiyo ko Mian Bisa Na Roh, yana aki namoola inompuni.

¹¹ Kalu komuyu binaba doi bonua-bonua kaleda sulano poinadili doi pamarenta salaano kai ponguasa, inaikai pomatakut bulaando kaliangano komuyu naikon kopo belaano kobutomuyu kai naikon oila komo sio pobantile.

¹²Sabab oila komo sio pobantile doiya naikon Mian Bisa Na Roh otunggukene doikoo nalaate kotempono.”

¹³Meeng komian doi antara mian badaang bantil doi Yesus, “Tama Guru, coba Tama sumboliiyo koutusonggu nabeena yaku soobos doi tamanggami nabuat inotinggal.”

¹⁴Yesus timbiliyo, “Utus, indee kai komo bingkate Yaku teali pamarenta kai pongobos doi popusaka lua komuyu?”

¹⁵Doibundu doi sasaibino komian mo daano idoo Yesus bantile, “Pobada-badagai kai tukon pobaingotii kai, inai nasampe komuyu modoko. Sabab kobanggapi natuboan aki natokooton doi kaasaan mau kai kona buat nalobi-lobian.”

¹⁶Maka Yesus basalitakene naandean nia, “Daano komeeng komian mokaasa. Yana daano kona buta mo beena badaang kohasilo.

¹⁷Do mianoo mokaasa tambuuno pikikene doi noano lalomo, ‘Akiyono kotampat koidan daku abosano daku buta hasilo. Oila daku akal diabudodoo?’

¹⁸Doibundu yana bapikil koidan tukon bantile doi butongo susuungo, ‘Ah, yaku daano daku akal; daku gudang-gudang yaku sumboliiyo nalinopo maka kubangune komo lobian kona babasalan. Idoomo naikon daku abosano sasaibino daku gandum tukon daku langge-langge bailon.’

¹⁹Doibundu naikon yaku bantile doi butonggu susuunggu, ‘Ikoo untungo! Sasaibino komonondok lapamo daano doikoo tukon aki naikon nakabus doi taun-taunggon. Balasanaango diabudodoo! Kaan tukon monginum tukon lasakanggene doi mutuboan!’

²⁰Bai Mian Bisa bantile doi yana, ‘He longas! Popookia nia koidan ikoo naikon mate, maka indee naikon komo malaat sasaibino komu buat mo lapamo ikoo pototongikene tuuk doi butomudoo?’

²¹Bunomo doiya kona tealian tukon sasamba komian mo kakaate nateali kaasa motuuk doi butongo susuungo, bai aki nakakaate nateali kaasa doi Mian Bisa matano.”

²²Maka Yesus bantil doi napololaing-pololaing, “Doiyamo kosababpo Yaku bantile, ‘Inai molilikene tentang komu tuboan, doiyamo oila naikon kopokinaan, kai oilamo naikon kopopinake.’

²³Kotuboan daano molobian luwedoi kinaan, tukon butonggita lobian luwedoi pakean.

²⁴Popalatikanggene kotomisi-tomisi gagak! Yanila aki namasakakon, aki nabapupui, aki koidan nadaano kona gudang kai longgo. Bai ko Mian Bisa pialayo yanila! Komuyu lobian mododoon koanggano doi tomisi-tomisi!

²⁵Indee kai antara komuyu tukon namolilikanano moola nakobulusane kona umur mau kai tongo soisik?

²⁶Kalu langge mopoipoisikoo akimo namoola komuyu kubaiyo, bulaando molilikene tentang langge-langge bailon?

²⁷ Popalatikanggene bulaando kobunga-bunga bakung natubo; bunga-bungadoo aki nabalimang, aki koidan nabatonun. Bai Tomundo Salomo mo buno doiya kona kaasaan aki namapake pakean mo pokakana kona monondokan do bunga-bungadoo!

²⁸Bulung doi padang tubo oloyo nia bai modoa sinua kabus. Mau ko Mian Bisa nakindendeke do bulungoo buno doiya kona monondokan. Baimo kai komuyu! Bai komuyu soisik kopoo manganggaan!

²⁹Jadi, inai molilikene tukon bingung tentang oila naikon kopokinaan tukon poininum.

³⁰Langge-langge mobuno doiya linolonggon doi mian mo aki natingoniiyo ko Mian Bisa. Banggokai ko Tamamu toiyo baikon komuyu palaluuwo sasaibino doiya.

³¹Bai komuyu sio pokakaate sulano ko Mian Bisa namaparenta doi mutuboan, maka kobailonggon naikon ko Mian Bisa beekene koidan doikoo.”

³²“Komuyu mo tongo soisik kona kadaang, inai matakut! Sabab ko Tamamu sanaang mobeekene doikoo kobalakaat doi na Bapamarentaan.

³³Balukene komu langge tukon beekene kodoyno doi mian motalalais. Kubaiyomo doi butomu kodompet mo aki namoola mbules, doiyamo kobuat mo inabos doi surgaa. Do buatoo aki namoola lapus sabab kopondikuk aki namoola alayo tukon koatak aki namoola rusayo.

³⁴Sabab inaando komu buat, idoomo koidan konoamu!”

³⁵ “Pobada-badagai mosasalaane komeeng kolangge. Komuyu sio posidutu basadia mobapake tukon komu posi tataap inokoiti,

³⁶ pokakana buno kopeleleani-peleleani mo daano basadia totiiliyo kona tuan abali doi lamean baasowaanan, kalu do tuanoo abali tukon tokiyo kotataapon, yanila naikon mosobit bukayo kotataapon.

³⁷Bukan maen kona untungan do peleleani-peleleanidoo linaat mo daano totiiliyo kotempono kona tuan nalubatan. Poanggayomo: do tuanoo naikon basa-basadia tukon sumboliiyo kona peleleani-peleleanidoo osulang, maka Yana leleaniyo yanila.

³⁸Bukan maen kona untungan do peleleani-peleleanidoo kalu yaniladoo natuan laate yanila daano basadia mototiili, mau kai yana nalubat napintangamo kopopook kai lobiano kona talaatan doiya!

³⁹ Neneeke naiya! Kalu andeno kobonua tumbuno toiyo jam bulaa naikon kopondikuk nalubatan, yana naikon dagaiyo sulano kopondikuk naaki nausok doi nabonua lalomo.

⁴⁰Tobikon doiya komuyu koidan sio pobasa-basadia, sabab Manusia na Pau naikon lubat doi tempo komuyu mo aki posangka-sangkayo.”

⁴¹“Temeneno, oilakai do otungguloo Temeneno otuuke doi kami kai doi sasaibino komian?” Petrus sadaiyo.

⁴²Temeneno timbiliyo, “Indee kopeleleani mo totobos tukon mopandoi tobikon natuan bingkate teali kapalano doi peleleani bailon sulano yana beena kaan yanila tapaat kotempono?

⁴³Bukan maen kona sanaangan do peleleanidoo kalu naikon kona tuan abali tukon laate yana daano balimang!

⁴⁴Poanggayomo: Do tuanoo naikon monggidagaikene sasaibino kona buat doi peleleanidoo.

⁴⁵Bai kalu do peleleanidoo bantil doi noano lalomo, ‘Daku tuan daano momalumbit maka naabali,’ maka yana bobokiiyo sasaibino kopeleleani tukon kaan inum polong malangu,

⁴⁶maka kona tuan naikon lubat doi oloyo tukon jam mo aki natinoi-toi. Tukon do peleleanidoo natuan naikon bobokiiyo tutuuno tukon tinealikono pomeenggon nasib tukon domianoo bailon mo aki nataat doi Mian Bisa.

⁴⁷Peleleani mo toiyo kona tuan namongiasan, bai aki nabasa-basadia tukon aki nakubaiyo kona tuan namongiasanoo, naikon inumbas kinobukuanggon.

⁴⁸Bai peleleani mo aki natoiyo kona tuan namongiasan, doibundu kubaiyo komeeng mo sala tobikon sio nainumbas, naikon inumbas tongo mamalaan. Sabab mian mo lapamo binee badaang, doi yanadoo naikon tinuntut badaang koidan. Tukon mian mo lapamo kinuasaikon badaang, doi yanadoo naikon tinuntut badaang koidan.”

⁴⁹“Yaku lubat sulano kusumbetene kona sinuuwaan naiya dunia nia. Bukan maen kona monondokan kalu koaungoo lapamo kait!

⁵⁰ Daano kosusa tuuno mo sio Kuompokoniiyo. Tukon konoanggu susa tuuno kalu akiyoon doiya nateali.

⁵¹Katidoon kai komuyu aanggene yaku lubat sulano kubabayo kopodamean doi dunia? Bolikon, bolikon podamean, tongo pomusuan.

⁵²Tambuuno diabudodoo, doi lima komian dobonuadoo tumbuno naikon pomusumo, tolu musuwo kolua, kai lua musuwo kotolu.

⁵³ Tama naikon musuwo kona pau mala-malane tukon pau mala-malane musuwo kotamano. Tina lawane kona pau boine tukon pau boine musuwo kotinano. Kona monianan boine naikon musuwo kona monianan boineno tukon monianan boineno naikon musuwo kona monianan boine.”

⁵⁴Yesus bantile koidan doi mian badaang, “Kalu komuyu kitayo kobunom liba doi oloyo nasopokan sembeleng, komuyu banggadudul bantil, ‘Naikon udano.’ Tukon tutuu udan.

⁵⁵Kalu komuyu neemiyo kombombuul lubat doi lalom, komuyu bantile, ‘Naikon pintalo.’ Tukon tutuu pintal.

⁵⁶Komuyu mian mo yase kadu-kadukon! Komuyu moola tantukanggene kodapang tukon kitayo kotimbu ndondoongo tukon dunia. Bulaando koloonu nia palo-paloosano aki namoola komuyu tantukanggene?”

⁵⁷“Bulaando komuyu moaki poputusiyo oila komo bisa?

⁵⁸Kalu daano komian mokalaakene komuyu doi pangadilan pokakaate tutuuno sulano namoola poalapayo do palakaladoo tukon yana modaano komuyu doi loloon tangano. Kalu aki, naikon yana salakanggene komuyu doi hakim salaano tukon hakimoo naikon salakanggene komuyu doi polisi, tukon dopolisidoo usekene komuyu doi talunggu lalomo.

⁵⁹Poanggayomo! Komuyu aki naikon potobuat doi talunggu kalu akiyoon nakabus kona masakitan konoamu.”