Read Banggai LUKAS 13 Bible Online

LUKAS 13 - Banggai bible

LUKAS 13

¹Doiya kosinggatoo komian salitaikene doi Yesus manganai bubula ko Galilea miano Pilatus mo akateyo, singgatoo yanila daano mososubakene kona pososubakon doi Mian Bisa.

²Pikikene do salitadoo Yesus bantile, “Sabab do Galileadoo miano moinakate buno doiya, komuyu aanggene doiya kolimbako yanila lobian kona lalim doi sasaibino ko Galilea miano bailon?

³Tutuu aki! Bai poneneeke: kalu komuyu aki pobadodoloon doi polalim-lalim, komuyu sasaibino naikon mate koidan, buno yanila.

⁴Bulaando kai koidan tukon songulo alu komian mo mate doi Siloam, singgatoo do menaradoo natikalano yanila? Komuyu aanggene doiya otudoikene yanila lobian kona lalim doi sasaibino komian bailon mo dungol doi Yerusalem?

⁵Tutuu aki! Idan koidan Yaku bantile: Kalu komuyu aki pobadodoloon doi polalim-lalim, komuyu sasaibino naikon mate koidan buno yanila.”

⁶Lapa doiya Yesus basalitakene koidan koandean nia, “Daano komeeng komian mototooli kayung ara doi anggur asino. Oloyo meeng Yana ampakon moumbolii do kayungo saono, aki namoposuunggon mau nabaino meeng kosaono.

⁷Jadi, Yana bantile doi molimangedoo kona asi, ‘Kitayo, lapamo tolu kotaun daku lubatan momoumbolii doaradoo saono doi ara batango nia, bai aki kumoposuunggon meeng kosaono. Tapeyomo koiya kayungo! Yana tongo akabuse kozat kinaan doi buta!’

⁸Bai do polimang asidoo timbiliyo, ‘Sobiikenemo yana natubo meeng kotaun nia koidan, Tuan. Yaku naikon pacele kobuta potikunggon tukon obosiyo pupuk.

⁹Naanggo kai yana sao doi taun salaando nia. Bai kalu aki, moolamo Tuan namosumbolii natinape.’ ”

¹⁰Doi meeng kooloyo Tadean, Yesus mongotunggul doi meeng kobonua kaleda.

¹¹Idoo daano koboine mo masakit songulomo alu kotaun, sabab daano koibiliis doi butongo lalomo. Do boinedoo bobungkuto tukon aki namoola kokondong kokoloyos.

¹²Salataa Yesus kitayo, Yana nggeleamon doi yana, “Tina, ikoo tangalino doi mupanakit!”

¹³Maka Yesus binggakene kolimano doi boinedoo bungguno, tukon doiya kosinggatoo yana kokondong kokoloyos maka nggaale ko Mian Bisa.

¹⁴ Mokapalaiyo do bonua kaledadoo nggimal, padungga Yesus moaline komian moseselon doi oloyo Tadean, tobikon doiya yana bantile doi mian-mian, “Daano noom kooloyo tuuk balimangan; polubat doi oloyo-oloyodoo sulano poinalin, inai doi oloyo Tadean!”

¹⁵Temeneno timbiliyo, “Munafik komuyu nia! Doi oloyo Tadean sasaibino komian sodiiyo kona saapi kai naadalan doi natondok tukon babayo tobuat sulano nabeena monginum paisu doi nasaapi tukon naadalan.

¹⁶Nah, diabudodoo diimbaa daano komeeng koboine Abraham naturunan, mo songulomo alu kotaun kona kalumbit Ibiliis nakuasaiyano. Oilakai yana aki namoola inosodiikon doi kuasadoo doi oloyo Tadean?”

¹⁷Yesus napotimbilidoo doiya kubaiyo Yesus namusu-musu mamaa tuuno; bai sasaibino komian bailon sanaang momokita sasaibino komo minasaindinggon Yesus mo kubaiyo.

¹⁸Yesus mansadai, “Kalu baikon ko Mian Bisa maparenta, bulaando kai kondondoongo? Tukon oilakai Yaku moola mopokakanakene?

¹⁹Kondondoongo buno andean koidan: Meeng komostor batuno inala meeng komian maka sakakene doi naasi. Do kalibuangoo tubo maka teali kayung, tukon kotomisi-tomisi mokubai telea doi kayung langa-langaanodoo.”

²⁰Idan koidan Yesus mansadai, “Kalu ko Mian Bisa maparenta, tukon oilakai Daku pokanakanano kona bunoan?

²¹Kondondoongo buno ragi meeng koboine mo alayo maka inaduk tukon sangkap kolono koliter kotarigu polong tuboi sasaibino.”

²²Ampakonan doi Yerusalem, Yesus lolo doi kota-kota tukon kampung-kampung maka mongotunggul.

²³Maka daano komian momansadai doi Yana, “Tama, oilakai tongo soisik tolong komian naikon mo sinalamaton?”

²⁴Yesus timbiliyo, “Pokakaate sulano pousok doi tataapon mo madipot. Sabab, neneeke! Badaang komian mokakaate usok bai aki namoola.

²⁵Doiya kosinggatoo dobonuadoo tumbuno bangun tukon taapikene kona tataapon, komuyu kokondong doi tonggulung tukon tambuuno batoki-toki maka bantile, ‘Tuan, bukayo kotataapon tuuk kami!’ Tuanoo naikon timbiliyo, ‘Yaku aki kutoiyo komuyu doi yaando!’

²⁶Komuyu naikon timbiliyo, ‘Kami lapamo kaan monginum polaing Tuan, tukon Tuan lapamo mongotunggul doi loloon-loloon doi mai kota!’

²⁷ Bai do Tuanoo naikon bantile koidan, ‘Yaku aki kutoiyo komuyu doi yaando. Dampas naimbaa, komuyu mo kubaiyo kokulokisan!’

²⁸ Singgatoo doiya komuyu kitayo Abraham, Ishak tukon Yakub tukon sasaibino konabi mombesi doi Mian Bisa na Dunia Boolu lalomo, komuyu naikon kokiil tukon balasusa sabab komuyu susuumuyu siniika tobuat!

²⁹Komian badaang naikon lubat doi tolopot tukon doi talise, doi lembet tukon doi lalom, tukon naikon mbesi-mbesi doi Mian Bisa na Dunia Boolu.

³⁰ Kona tutuuwan, daano komian doibundu naikon teali mian tumbeno, tukon daano komian tumbeno naikon teali mian doi bundukon.”

³¹Doiya kosinggatoo koidan, daano kobubula ko Parisi miano molubat doi Yesus tukon bantile, “Inai podungol naimbaa! Podampas doi tampat bailon, sabab Herodes yase akateyo Ikoo.”

³²Yesus timbiliyo, “Poampakono bontiikene doi mian mo akiyo kona totuukoo, ‘Oloyo nia tukon namodoa Yaku siikayo koibiliis tukon aline komian moseselon, bai doi oloyo kotoluno, Yaku naikon alapayo Daku limang.’

³³Mau kai nabuno doiya Yaku sio kubanggadudukene koidan Daku ampakonan oloyo nia, modoa tukon modoa niuwan, sabab aki namonondok komeeng konabi moinakate doi Yerusalem tonggulungo.

³⁴Yerusalem, Yerusalem! Nabi-nabi ikoo akateyo! Mian Bisa nasosumbolii ikoo sakule batu polong pomatekon! Bulaamo luunggon yaku yase modagaiyo sasaibino komu mian buno manuk tinano soloupiyo kona pau doi kapilo adeno, bai ikoo aki muyase!

³⁵ Tobikon doiya ko Mian Bisa akimo koidan nalolainge ikoo. Potoiyo, tambuun diabudodoo ikoo akimo naikon mukitayo Yaku koidan, polong ikoo bantile, ‘Binalakaati Yana mo lubat tukon Temeneno sambuno!’ ”