Read Banggai LUKAS 14 Bible Online

LUKAS 14 - Banggai bible

LUKAS 14

¹Doi oloyo Tadean Yesus ampakon kaan doi meeng kopau langkai Parisi miano nabonua. Idoo komian palatikanggene Yesus tukon mono-monondok.

²Maka lubat doi Yesus komeeng komian mo seselon balat koaino tukon limano boboongan.

³Maka Yesus mansadai doi guru-guru agama tukon doi Parisi mian-miano mo daano idoo, “Manurut nda agama naaturan, moola kai kita aline komian moseselon doi oloyo Tadean kai aki?”

⁴Guru-guru agama tukon Parisi mian-miano aki nabiyok. Maka Yesus uange do mianoo tukon aline yana, doibundu sumboliiyo yana ampakono.

⁵ Lapamo doiya Yesus bantile doi mian, “Kalu andeno meeng komian doi komuyu daano komeeng kona pau kai meeng kosapi mo otuwong doi bubung lalomo doi oloyo Tadean, oilakai yana aki naikon namosobit kibute natobuat do paudoo kai do saapidoo doi oloyodoo koidan?”

⁶Bai akiyo komeeng komian momoola timbiliyo Yesus tentang do langgedoo.

⁷Yesus kitayo daano komian lubat mo molilik tampat-tampat mo monondok tuuno. Tobikon doiya Yana beekene naotunggulia doi yanila sasaibino.

⁸ “Kalu kai komuyu kinolo doi lamean baasowaanan, inai poampakon osulang doi kursi momonondok. Sabab inai-inaikene daano komeeng komian bailon mo lobian ponting doi komuyu molapamo kinolo koidan,

⁹maka do bonuadoo tumbuno mo lapamo koloyo komuyu lolua, yana lubat doi ikoo tukon bantile, ‘Maaf, tampatia lapamo sinadiakon tuuk doi mian molubatoo.’ Maka tukon mamaa tuuno ikoo tapakisaa osulang doi tampat mo bunduno tuuno.

¹⁰Tobikon doiya kalu komuyu kinolo, piliyo kotampat mo doibundu tuuno, sulano kobonua tumbuno naikon nalubat tukon bantile doikoo, ‘Tulanggu mai osulang doi tampat mo lobian kona monondokan.’ Tukon kalu buno doiya komuyu inodotii doi sasaibino komian molubat bailon salaano.

¹¹ Sabab meeng komian mo katandake kobutongo naikon inekepende, bai komo ekependeyo kobutongo naikon inakatandak.”

¹²Maka Yesus bantile doi bonuadoo tumbuno, “Kalu kai ikoo koloyo komian motuuk doi lamean kaanan oloyo kai kaanan popook, inai mokolo tulamu kai utus, kai puli-puli, kai mupokoolanian mo kaasa. Sabab yanila naikon koloyo ikoo koidan, tukon kalu bunomo doiya ikoo mantalimamo posobolino domu kokubaidoo.

¹³Jadi kalu ikoo mokubai lamean, koloyo komian motalalais, mian mosasaton, mian molemat, tukon mian mopiit.

¹⁴Ikoo naikon binalakaati, sabab do mianoo aki naikon namoola soboliyo komu monondokan. Komu monondokan naikon Mian Bisa komo soboliyo doi tempo komian monondok nainotuboiyan doi matean.”

¹⁵Doiya singgat daano komeeng komian mo kaan polaing-laing idoo molongol Yesus nabantilan, yana bantile, “Untung tuuno komian naikon mo kaan polaing tukon ko Mian Bisa kalu Yana lubat buno Tomundo!”

¹⁶Bai Yesus bantile doi mianoo, “Daano kotempono meeng daano komeeng komian mokubai lamean mo babasal tukon mokoloyo badaang komian.

¹⁷Salataa laatemo kotempono motuuk doi natambuunano kona lamean, do mianoo sumboliiyo kona peleleani ampakon doi mokinolo tukon bantile, ‘Polubato, sasaibino lapamo tasadia!’

¹⁸Bai yanila sasaibino, meeng komian doi meeng komian bailon tambuuno mangkabi maaf. Kotumbeno bantile doi peleleanidoo, ‘Yaku sodo mongoli meeng kobuta tambuno, tukon palaluu kuampakon mopalesayo. Maafkanggene yaku.’

¹⁹Kobailon bantile, ‘Yaku sodo mongoli lima kopasang kosapi, tukon yaku soba-sobayo do sapi-sapidoo. Maafkanggene yaku.’

²⁰Kobailon koidan bantile, ‘Yaku sodo osowaan, tobikon doiya yaku aki kumoola lubat.’

²¹Peleleanidoo mule tukon bontiikene do langgedoo doi natuan. Tuanoo nggimal tuuno, maka bantile doi napeleleani, ‘Kosobiton ampakon doi loloon-loloon tukon kasangan-kasangan doi kota. Babayo doi sumai komian motalalais, komian mosasaton, komian mopiit tukon mian molemat.’

²²Doibundu do peleleanidoo bantile doi natuan, ‘Tuan, tuan naparenta lapamo inapakonggon, bai kotampat daano badaang.’

²³Maka do tuanoo bantile, ‘Poampakono doi loloon-loloon mobabasal tukon doi kasangan-kasangan doi kota tonggulungo, tukon osinggaange komian nalubat, sulano daku bonua namoono.

²⁴Poneneeke! Akiyo komeeng komian doi antara mianoo molubat mo lapamo kinolo naikon momakaan kinaan doi kulamean nia!’ ”

²⁵Badaang komian moampakon polaing Yesus. Yesus mbaleng tukon bantile doi yanila,

²⁶ “Kalu komian molubat doi Yaku, bai lobian kona seseangano kotinano, tamano, kona boloki, napau-pau, utus-utuso, kai butongo susuungo, yana aki namoola teali kupololaing.

²⁷ Mian mo aki nayase tanggunge kona sinempangan tukon lainge Yaku, aki namoola teali kupololaing.

²⁸Kalu meeng komian doi komuyu yase kekendenge komeeng komenara, tantu yana naikon osulang moaite looluk kona ongkos sulano yana natoiyo oilakai kona doy sukup sulano nakekendenge do menaradoo kai aki.

²⁹Sabab kalu tokita yana aki namoola kekendenge, banggokai kona pandasi lapamo kinubai, maka sasaibino komian mo kitayo do limangoo naikon kokumbite.

³⁰Yanila naikon bantile, ‘Eh, namian nia kekendenge bai aki namoola alapayo!’

³¹Kalu meeng kotomundo mo daano kosongulo koloon kona suludadu yase poakate tukon tomundo bailon mo daano lua kolono koloon kona suludadu, tantu do tomundodoo naikon osulang pikikene looluk oilakai yana sukup bukuan sulano nalawane kona musudoo.

³²Kalu yana toiyo baikon yana aki nabukuan, tantu doi tempo namusu daano moodoon, yana naikon makapatu kona bito-bito sulano nakabiyo podame.”

³³Doibundu Yesus bantile, “Bunomo doiya koidan tukon komuyu. Akiyo komeeng komian doi komuyudoo momoola teali Kupololaing, kalu yana aki nakurbankanggene sasaibino.”

³⁴“Timusonoo monondok, bai kalu tealimo matabal, moola kai nakinotonoi koidan?

³⁵Akiyono kona totuuk koidan, mau motuuk doi asi, mau motuuk pupuk. Jadi tongo sinakukon tolong. Kalu daano kotolingaimuyu, ndongoliiyo!”