Read Banggai LUKAS 15 Bible Online

LUKAS 15 - Banggai bible

LUKAS 15

¹ Daano kooloyo meeng, badaang kopakabi lulu tukon mian mo inaanggon lokis doi masarakat, lubat mondongolii Yesus.

²Parisi mian-miano tukon guru-guru agama mangatambuuno nggimal-nggimal. Yanila bantile, “Seh, namian nia mantalima mian mo aki namonondok tukon koidan kaan polaing yanila!”

³Tobikon doiya Yesus salitaikene doi yanila koandean nia,

⁴“Kalu kai meeng komian doi komuyu daano kosakat kona domba, maka nalapus komeeng — oilakai naikon kona kinubai? Tutuu yana naikon otinggale do dombadoo mo siokolo siodoo doi padang bulung, tukon ampakon mo umboliiyo domo lapusoo sampe laate.

⁵Tukon kalu yana pososuunggenemo koidan do dombadoo, yana sanaang tuuno, tobikon yana tanggunge dombadoo doi bengeno,

⁶maka nababayo mule. Doibundu yana uange kotula-tulano tukon napokoolanikonan, tukon bantile, ‘Mai kita nda laba-laba. Daku domba mo lapus lapamo kupososunggene koidan!’

⁷Nah, bunomo lakon koidan doi surgaa daano kolaba-labaan mo lobian kona babasalan doi meeng komian mobaladosa mo badodoloon, maka baino doi mo sio kolono siodoo komian mo lapamo monondok tukon aki napalaluu badodoloon.”

⁸“Kai ande kata meeng koboine daano kosongulo kona doy perak, maka nalapus komeeng — oilakai naikon kona kinubai? Yana naikon suayo kona posi tukon salake kona bonua tukon umboliiyo doi yayaa polong pososuunggene doydoo.

⁹Salataa yana pososuunggene doydoo, yana uange kotula-tulano tukon napokoolanian, maka bantile, ‘Yaku sanaang tuuno molapamo pososuunggene daku doy mo lapus. Mai kita nda laba-laba!’

¹⁰Bunomo lakon kai koidan ko Mian Bisa namalaekat laba-laba kalu daano komeeng komian molokis mobadodoloon doi nalalim-lalim!”

¹¹Yesus bantile koidan, “Daano komeeng kotama mo daano lua kona pau malaneno.

¹²Kopiyoto bantile doi yana, ‘Tama, beenggumo diabudodoo daku buat obos.’ Maka kotamano ebese kona buatoo doi napau molua.

¹³Bubula kooloyo doibundu do paudoo piyoto balukenemo kona obos pusakadoo maka ampakon doi lipu mo dodoon. Imbali yana akabusemo kona doy tukon tubo bebeamo.

¹⁴Sambuno kabuso kona doy sasaibino, teali doi lipudoo komalaalan tuuno, tobikon yana sakisaamo.

¹⁵Maka yana ampakon balimang doi meeng komian modungol idoo, mo sumboliiyo yana totooliyo kona babung doi naasi.

¹⁶Yana bunomo doiya kona malaalan maka baino kaane do babung-babungoo nakinaan. Mau kai yana namalaal, akiyo komeeng komian mobeena kaan doi yana.

¹⁷Doibundu yana toiyo tukon bantile, ‘Mian mo balimang doi tamanggu lobi-lobian kona kaanan, bai yaku dimbaa adukono mate laal!

¹⁸Yaku naikon lenggeto tukon ampakon doi tamanggu, tukon bantil doi yana: Tama, yaku baladosamo doi Mian Bisa tukon doi Tama.

¹⁹Akimo nateali koidan yaku inuanggon Tama napau. Anggapemo yaku meeng komian mobalimang doi Tama.’

²⁰Maka yana lenggeto mule ampakon doi tamano. Daano mododoon doi bonua, tamano kitayomo yana. Tukon napoloongganano tuuno tamano obulen mololobotiyo, maka lebeke tukon umayo.

²¹‘Tama,’ do paudoo bantile, ‘yaku baladosamo doi Mian Bisa tukon doi Tama. Akimo nateali koidan yaku binantil Tama napau.’

²²Bai kotamano uange kona peleleani-peleleani tukon bantile, ‘Mosobit! Mangala pakean mo monondok tuuno, maka popekeikene doi yana. Usokikene kosousolut doi limano saono tukon sapatu doi aino.

²³Lapa doiya mangala saapi napau mo malanak tukon keletemo. Kita naikon kaan tukon mbesi-mbesi.

²⁴Sabab daku pau nia lapamo mate, diabudodoo tubomo koidan; yana lapamo lapus, diabudodoo pinososuunggono koidan.’ Maka yanila tambuunemo kona balameanan.

²⁵Daanoon mobuno doiya, dopaudoo langgongo daanoon doi naasi. Salataa yana mule tukon loolanimo kobonua, yana lengele komusik alalo tukon osulengan.

²⁶Yana uange komeeng komian doi peleleanidoo, maka mansadai, ‘Oila naiya komo daano doi bonua?’

²⁷Peleleanidoo timbiliyo, ‘Tuan utuso piyoto abalimo! Tukon Tuan tamano mosumboliimo nakinolot kosaapi napau mo malanak, sabab yana lapamo laate kona pau daano mosalamat!’

²⁸Do pau langgongodoo nggimal tuuno tobikon yana akimo nayase usok doi nabonua. Maka kotamano tobuat tukon asi-asiyo yana nausok.

²⁹Bai yana bantile, ‘Doi taun-taun lalomo yaku balimang kokobukuan tuuk doi Tamanggu. Aki nasidutu yaku bantayo ko Tamanggu naparenta. Tukon oilakai ko Tamanggu nabineekon doi yaku? Mau nabaino meeng kodomba akiyoon nasidutu ko Tamanggu beena doi yaku sulano kulame tukon tula-tulanggu!

³⁰Do Tamanggudoo napau lapamo akabuse ko Tamanggu nabuat tukon moluko mobalowa, bai sambuno yana abali, Tama menggeletene sapi napau mo malanak tuuk doi yana!’

³¹‘Kupau,’ tamano timbiliyo, ‘ikoo daano sidutu dimbaa tukon yaku. Sasaibino daku lobo daano mulobo koidan.

³²Bai kita sio ndalame tukon tetedes, sabab doutusomudoo piyoto lapamo mate, bai diabudodoo lapamo tubo koidan; yana lapamo lapus, bai diabudodoo lapamo pinososuunggon koidan.’ ”