Read Banggai LUKAS 16 Bible Online

LUKAS 16 - Banggai bible

LUKAS 16

¹Yesus bantile doi napololaing-pololaing, “Daano komeeng komian mokaasa. Yana daano komeeng komian kona pangabos doy mo ulusiyo kona buat. Do mianoo mokaasa malaat lapuran baikon kona pangabos doy akabusemo kona doy.

²Jadi yana uange dona pangabos doydoo tukon bantile, ‘Oila nia yaku mo lengele tentang ikoo? Diabudodoo salakanggene doi yaku kolapuran mosukup tentang mubalimangan moulusiyo daku buat. Ikoo aki namoola teali koidan pangabos daku doy.’

³Maka do pangabos doydoo bapikil, ‘Yaku sio oila daku kinubai diabudodoo? Daku tuan yase mobeletiyo yaku. Bapasolan, yaku aki kubukuan; bakaikabi, yaku mamaa.

⁴Yaku daano daku akal; kalu yaku naikon lapamo bineleti, yaku sio nadaano badaang kotulanggu mo yase asambuwo yaku doi yanila nabonua!’

⁵Jadi do pangabos doydoo uange memeeng komian mo basamea doi natuan. Doi mo tumbeno, yana bantile, ‘Bulaa komu samea doi kutuan?’

⁶Do mianoo timbiliyo, ‘Sakat kogumbang kolisison Zaitun.’ Do pangabos doydoo bantile doi yana, ‘Nia komu samea sulato. Osulango tukon mosobit mutulise; lima kolono.’

⁷Doibundu yana bantile doi mian koluano, ‘Tukon Utus, bulaa Utus nasamea?’ Do mianoo timbiliyo, ‘Sololoon kokalung gandum.’ Do pangabos doydoo bantile doi yana, ‘Nia komu samea surato. Tulisemo alu kosakato.’

⁸Maka dopangabos doydoo nadungolan mo aki najujur nggaalemo kona pangabos doydoo sabab dona tindakanoo mo pandoikene; sabab komian doi dunia nia lobian kona pandoiyan moature yanila naurusan doi mian mo tubo doi madialan lalomo.”

⁹Maka Yesus basilingan koidan, bantile, “Ndongoliiyo! Popakeyo nadunia nia nalobo sulano namalaat tulano, sulano kalu nadunia nia nalangge akiyono koanggano koidan, komuyu naikon tinalima doi lipu dungolan mo posidutukon.

¹⁰Mian mo moola inangga doi langge-langge mopoipoisik lalomo, moola nainangga koidan doi langge-langge mobabasal. Bai komian mo aki namoola inangga doi langge-langge mopoipoisik lalomo, aki namoola inangga doi langge-langge mobabasal lalomo.

¹¹Jadi, kalu manganai nadunia nia lalomo nalangge komuyu akimo namoola inangga, indee komo yase monggianggekene doikoo kokaasaan rohani?

¹²Tukon kalu manganai mian bailon nalangge, komuyu tokitamo aki namoola inangga, indee kai komo yase mebee doikoo oilamo komo teali mulangge?

¹³ Akiyo komeeng komian moola balimang tuuk doi lua kobalimangan. Sabab yana naikon lobian kona seangano komeeng tukon doi mobailonggon, kai yana naikon lobian kona setiaan doi nabalimanganoo mo meeng tukon doi bailonggon. Bunomo lakon doiya koidan tukon komuyu. Komuyu aki namoola balimang motuuk doi Mian Bisa tukon motuuk doi buat.”

¹⁴Parisi mian-miano ndongoliiyo sasaibino komo Yesus bantile. Maka yanila kokumbite, sabab yanila yase kodoy.

¹⁵Bai Yesus bantile doi yanila, “Komuyumo komian motokita talakana doi mian bailon salaano, bai ko Mian Bisa toiyo konoamu antoko. Sabab oila kobanggapi nainaanggon tatandak, ko Mian Bisa napokita pepende.

¹⁶ Musa naatulan bineekon tukon nabi-nabi naotunggul, tataap pinake polong doi tempo Yohanes Pasau Mian. Salataa doiya kosinggatoo Bilita Monondok tentang bulaando ko Mian Bisa namaparentaan pokakana ko Tomundo binabilitakon banggadudul. Tukon komian pakisaayo kobutongo sulano nateali Mian Bisa namian.

¹⁷ Bai tadukai timbu tukon buta komo mumuda kona lapusan, luwedoi meeng kohuruf ko Mian Bisa naukum lalomo aki nateali.

¹⁸ Indee komo tinggale kona boloki maka naosowaan doi boine bailon, do mianoo balolowa. Tukon komian mo osowaan tukon boine mo lapamo tininggal, balolowa koidan.”

¹⁹“Daano komeeng komian mo kaasa. Kona pakean pomaalingi, tukon kona tuboan samba kooloyo sanaang.

²⁰Doi nabonua tataapono salaano inosulang komeeng komian motalalais kosambuno Lazarus. Kobutongo moono dedeng.

²¹Yana yase totuiyo kotiano tukon ndemel puputo mo otuwong doi mianoo mokaasa nameja. Koasu lubat modalepe kona dedeng.

²²Mian motalalaisoo doibundu mate maka malaekat babayo doi tampat mosanaang doi Abraham bibilo doi surgaa. Mianoo mokaasa mate tukon tinadin.

²³Doi dunia mian momate yana sakisaa tuuno. Tukon do tempodoo yana mbalenge imbali doi bungkuk, yana kitayo Abraham doi tampat mo odoon tukon Lazarus daano doi Abraham bibilo.

²⁴‘Tama Abraham!’ do mianoo mokaasa nabantilano. ‘Seseange yaku. Sumboliiyo Lazarus nasemeke kolimano saono doi paisu lalomo maka nalubat mbetokiiyo koaleponggu. Yaku sakisaa tuuno doi aung lalomo nia!’

²⁵Bai Abraham timbiliyo, ‘Neneeke ikoo daku pau: doi mutuboan ikoo lapamo laate sasaibino komo monondok, bai Lazarus laate komo lokis. Diabudodoo yana sanaang dimbaa, tukon ikoo sakisaa.

²⁶Sangalaasan doiya doi nda pokalatanan ikoo tukon kami lapamo kinubai komeeng komotombing mo babasal, sulano komian dimbaa aki namoola ampakon indokon tukon mian indokon aki namoola lubat doisumai!’

²⁷‘Kalu buno doiya, Tama,’ do mianoo mokaasa nabantilano, ‘yaku kabiyo tukon tutuu Tama nasumboliiyo Lazarus doi tamanggu nabonua.

²⁸Daano kolima koutusonggu idoo. Sumboliiyo Lazarus naingotiikene yanila, sulano inai napolong yanila otuwong doi tampat mosakisaa nia.’

²⁹Abraham timbiliyo, ‘Doi yanila daanomo Musa nabuku-buku tukon nabi-nabi! Sodiiyomo yanila naloingiyo oila komo totulis doi bukudoo lalomo!’

³⁰Bai do mianoo mokaasa timbiliyo, ‘Doiya aki nacukup, Tama Abraham. Bai kalu daano komian momate motubo koidan tukon lubat doi yanila, yanila naikon badodoloon doi yanila nalalim-lalim.’

³¹Bai Abraham bantile, ‘Bai kalu yanila aki napopusinggene Musa naparenta tukon nabi-nabi, pasti yanila aki naikon namangangga koidan, mau nadaano komian momate mo tubo koidan.’ ”