Read Banggai LUKAS 17 Bible Online

LUKAS 17 - Banggai bible

LUKAS 17

¹Yesus bantile doi napololaing-pololaing, “Langge-langgedoo mo mangaanikene komian mokubaiyo kolalim tutuu naikon daano. Bai silakamo kai komian mo mangaanikene!

²Tadukai kalu kobatu gilingan nabinoboikon doi bulungo, maka nasinakukon doi tobun lalomo kalu baino yana mangaanikene komeeng komian doi mian-mian mopoipoisik nia mokubaiyo kolalim.

³ Tobikon doiya, pobadagai! Kalu koutusomu baladosa, anuukene yana. Kalu yana manasal, ompuniyo yana.

⁴Kalu yana baladosa doikoo pitu luunggon meeng kooloyo tukon samba-samba luunggon nalubat doikoo tukon bantile, ‘Yaku mangkabi maaf,’ ompuniyo yana.”

⁵Korasul bantile doi Temeneno Yesus, “Temeneno, ekeenggele komai manganggaan.”

⁶Temeneno timbiliyo, “Kalu komuyu kopo manganggaan kona kabasalan buno mostor batuno, komuyu moola pobantile doi kayung murbei nia batango, ‘Ikoo tokibut tukon tatanom doi tobun,’ pasti do kayungo batango nia naikon loingiyo komu parenta.”

⁷“Kalu andeno meeng komian doi komuyu daano kopeleleani mo bapajeko doi asi kai padagai domba. Kalu naikon do peleleanidoo abali, oilakai yana bantil doi yana, ‘Mai mosobit kaan’?

⁸Tantu aki! Kobalino yana naikon bantile doi yana, ‘Sadiayo daku kinaan. Pakeyomo kopakean mo bilisii tukon totiiliyo yaku daano yaku mokaan tukon monginum; salataa lapa doiya ikoo moolamo mukaan.’

⁹Peleleanidoo aki napalaluu nanggimal sabab lapamo loingiyo kona tuan naparenta, bolikon?

¹⁰Bunomo koidan komuyu. Kalu komuyu lapamo lakukene sasaibino komo pinarentakon doikoo, bantile, ‘Kami tolongo peleleani biasa; kami tongo lakukene komai limang!’ ”

¹¹Yesus naampakonan doi Yerusalem, loloiyo kosipato kolipu Samaria tukon Galilea.

¹²Salataa usok doi meeng kokampung, Yana linubotii songulo komian mo seselon kokulito mo minosikiton. Yanila kokondong doi naodoonan

¹³tukon nggeleamon, “Yesus! Tuan! Seseange kami!”

¹⁴ Salataa Yesus kitayo yanila, Yana bantile, “Poampakon doi imam, kabiyo yanila napalesayo kobutomuyu.” Daano yanila moampakon, lapuso yanila nasesel.

¹⁵Salataa meeng komian doi yanila toiyo baikon Yana lapamo tangalin, yana abali laba-laba nggaale ko Mian Bisa.

¹⁶Maka doi Yesus salaano, Yana sosuba tukon bakinatauwan doi Yana. Do mianoo meeng ko Samaria miano.

¹⁷Doibundu Yesus bantile, “Bolikon kai daano kosongulo komian komo inalin? Inaando domo siodoo koidan?

¹⁸Bulaando motongo namian nia mo lubat komo abali bakinatauwan doi Mian Bisa?”

¹⁹Maka Yesus bantile doi mianoo, “Banguno, tukon ampakono. Sabab ikoo manganggamo doi Yaku, ikoo tangalin.”

²⁰Bubula ko Parisi miano mansadai doi Yesus koiyano ko Mian Bisa nalubatan sulano namaparenta. Yesus timbiliyo, “Mian Bisa namaparentaan aki natambuune tukon palo-paloosan mo moola mian kitayo,

²¹tobikon komian moola bantile, ‘Mai kitayo, naiyamo Yana!’ kai, ‘Imbali Yana!’ Sabab ko Mian Bisa lapamo atambuune kona namaparentaan doi komuyu.”

²²Salataa lapa doiya Yesus bantile doi napololaing-pololaing, “Naikon lubat kotempono komuyu yase mokita meeng kooloyo moluwedoi Manusia na Pau naoloyo-oloyo, bai komuyu aki moola kitayo.

²³Sio mian naikon nabantile doikoo, ‘Kitayo, idoo!’ kai, ‘Kitayo, dimbaa!’ Bai inaikai potobuat umboliiyo Yana.

²⁴Buno kai kodidip tebeas doi timbu, tukon lalaangan doi samba kolipu, bunomo koidan kondoongo Manusia na Pau doi oloyono.

²⁵Bai kotumbe-tumbeno Yana sio nasinakisaa badaang tukon aki natinalima doi mian mobadaang doi loonu nia.

²⁶ Doi oloyono Manusia na Pau nainokitakonan, kondoongo buno doi loonu Nuh looluko.

²⁷ Mian kaan monginum, tukon osowaan; bunomo doiya kai banggadudul-banggadudul polong Nuh nausokon doi kapal lalomo tukon kolomba lubat tukon komian sasaibinodoo mate.

²⁸ Koidan buno doi loonudoo Lot. Komian kaan monginum, poboluki, basakakon tukon mokubai bonua.

²⁹Bai salataa Lot tobuat doi Sodom, doiya oloyodoo aung tukon balerang obulus luwedoi timbu tukon akateyo yanila sasaibino.

³⁰Bunomo lakon kondondoongo naikon kooloyono Manusia na Pau nainokitakonan.

³¹ Doi oloyodoo komian mo daano doi nabonua atono bunggono inaimo naobulus sulano naalayo kona lolonggu doi nabonua lalomo. Bunomo koidan komian mo daano doi naasi inaimo naabali doi nabonua.

³² Neneeke oilamo komo lapamo teali tukon Lot naboloki!

³³ Mian mo kakaate mosalamatene kona tuboan, naikon lapus kona tuboan. Bai komian mo lapus kona tuboan naikon salamat.

³⁴Anggayomo: Doi popookoo, lua komian daano momoolo doi meeng kokoi, meeng komian naikon binaba tukon komeeng komian koidan inotinggal.

³⁵Lua koboine daano mobagiling gandum, meeng komian naikon binaba tukon komeeng komian koidan inotinggal. [

³⁶Lua komian daano balimang doi naasi, meeng komian naikon binaba, tukon komeeng komian koidan inotinggal.]”

³⁷Yesus napololaing-pololaing mansadai, “Naando doiya naikon kona tealian, Temeneno?” Yesus timbiliyo, “Naando kona daanoan kobajan, idoo daano kotomisi mokaane kobajan.”