Read Banggai LUKAS 18 Bible Online

LUKAS 18 - Banggai bible

LUKAS 18

¹Salataa lapa doiya Yesus basalitakene komeeng koandean sulano naotunggule kona pololaing-pololaing sulano yanila nasidutu sambeang tukon posusa konoamuyu.

²Yesus bantile, “Doi meeng kokota daano komeeng kohakim mo aki namatakutene ko Mian Bisa, tukon aki napopusinggon mau indee komiano koidan.

³Doi kotadoo daano koidan komeeng kobalu mo sidutu momeenggon mangadap doi hakimoo mokabiyo kona ulusan nabinela. ‘Tulungiyo yaku moposasalaan daku lawan,’ baludoo bantile.

⁴Bubula kona kalumbit do hakimoo aki nayase tulungiyo do baludoo. Bai doibundu do hakimoo bapikil, ‘Mau kai naaki kumatakutene ko Mian Bisa tukon aki kupopusinggon mau doi inde-indee komiano,

⁵bai sabab nabalu nia sidutu ngganggue yaku, tadukai yaku belayo kona ulusan. Kalu aki, yana naikon sidutu momeenggon lubat tukon kubaiyo susa yaku.’ ”

⁶Maka ko Temeneno bantile, “Popalatikanggene oila kona binantil do hakimoo mo aki naadil!

⁷Nah, oilakai ko Mian Bisa aki naikon nabelayo kona mian susuungo naulusan mo bantile doi Yana oloyo tukon popook? Oilakai Yana naikon tunda-tundayo kotempono sulano natulunge yanila?

⁸Anggayomo: Yana naikon belayo mosobit yanila naulusan! Bai kalu naikon Manusia na Pau lubat, oilakai naikon daano mopinososuunggon komian mo mangangga doi Yana doi dunia nia?”

⁹Yesus basalitakene koidan naandean nia mo inotuuk doi mian mo kitayo komian bailon aki nalobian doi yana, bai anggayo baikon kobutongo susuungo monondok.

¹⁰Yesus bantile, “Daano kolua komian mo ampakon doi Temeneno Na Bonua sulano napo sambeang. Komeeng Parisi miano, kobailon meeng kopakabi lulu.

¹¹Do Parisidoo miano kokondong basusuunganggon maka sambeang, ‘Oh Mian Bisa, yaku mopolonggon kinatauwan do Ikoo, sabab yaku aki kubuno mian bailon, mo modoko, bangakakon, kai balolowa. Yaku basukuur sabab yaku aki kubuno do pakabi luludoo.

¹²Yaku bangapatai lua luunggon meeng kominggu, tukon yaku sosubakene doi-Koo songulo koobos doi sasaibino daku pandapatan.’

¹³Bai do pakabi luludoo dodoon kona kokondongan tukon aki nabarani lelengea doi timbu. Tukon soiyo kooyopo yana bantile, ‘Oh Mian Bisa, seseange yaku, mian mobaladosa nia!’ ”

¹⁴ “Poanggayomo,” Yesus bantile, “salataa mule doi bonua, do pakabi luludoo doiyamo ko Mian Bisa natinalima tukon bolikon do Parisi mianoo. Sabab memeeng komian mo atandake kobutongo naikon inekepende; tukon memeeng komian mo ekependeyo kobutongo naikon inakatandak.”

¹⁵Daano komian mobabayo kona labuk-labuk pauno doi Yesus sulano Yana taape tukon balakaatiyo yanila. Salataa Yesus napololaing-pololaing kitayo doiya, yanila nggimoliiyo do mianoo.

¹⁶Yesus uange do labuk-labukoo maka bantile doi napololaing-pololaing, “Sodiiyomo kolabuk-labuk nalubat doi Yaku! Inai popantane yanila, sabab mian mobuno nia komo teali anggota Mian Bisa namian.

¹⁷Neneeke! Mian mo aki nalubat doi Mian Bisa buno meeng kolabuk, aki naikon nateali anggota Mian Bisa namian.”

¹⁸Meeng kotua-tua Yahudi mansadai doi Yesus, “Tama Guru mo monondok, yaku sio oila daku kinubai sulano namoola mantalima tuboan mobisa tukon posidutukon?”

¹⁹“Bulaando ikoo mobantile Yaku monondok?” Yesus sadaiyo doi yana. “Akiyo komo monondok, tongo Mian Bisa susuungo.

²⁰ Ikoo lapamo toiyo ko Mian Bisa naparenta-parenta: ‘Inai mobalolowa, inai mangakate, inai pondikuk, inai moteali sakisii mokala-kala, tukon odotiiyo kotamamu tukon tinamu.’ ”

²¹“Sasaibino do parentadoo lapamo yaku loingiyo salataa doi kupaumalanekonan,” do mianoo bantile.

²²Molongol doiya, Yesus bantile, “Daano komeeng kolangge mo sio ikoo kubaiyo: Balukene sasaibino komu buat, beekene kodoyno doi mian motalalais, tukon ikoo naikon malaat buat doi surgaa. Lapa doiya lubato lainge Yaku.”

²³Bai salataa do mianoo lengele doiya, yana susa sabab yana kaasa tuuno.

²⁴Yesus toiyo do mianoo susa konoano, tobikon doiya Yana bantile, “Maaling tuuno komian mokaasa nateali anggota Mian Bisa namian!

²⁵Tadukai meeng kounta gampang tuuno nausok doi pakaut buango, kalu baino meeng komian mokaasa nausok doi Mian Bisa na Dunia Boolu.”

²⁶Mian badaang mondongolii Yesus mobantile buno doiya mansadai, “Kalu buno doiya, indee komo moola salamat?”

²⁷Yesus timbiliyo, “Komo aki nateali doi banggapi, teali doi Mian Bisa!”

²⁸Maka Petrus bantile, “Kitayo! Kami lapamo tinggale komai boloki tukon labuk sulano mai malaing Tama.”

²⁹“Pomangangga!” Yesus bantile, “Mian mo lapamo tinggale kona bonua kai naboloki, kai utuso kai tamano tinano kai nalabuk-labuk sabab leleaniyo ko Mian Bisa,

³⁰do mianoo naikon sinoboli bulaa luunggon kolipato naiya budodoo, tukon doi loonu naikon molubat yana naikon bineekon kotuboan mobisa tukon posidutukon.”

³¹Yesus pototongikene kona pololaing-pololaing mosongulo lua, maka bantile, “Ndongoliiyo! Kita diabudodoo ampakon doi Yerusalem. Imbali, sasaibino konabi-nabi natinulis tentang Manusia na Pau naikon tealimo.

³²Yana naikon sinalakanggon doi mian mobolikon Yahudi, naikon mo sosiboliiyo, totulaiyo tukon tupeiyo Yana.

³³Yanila naikon sakisaayo tukon akateyo Yana, bai doi oloyo kotoluno, Yana naikon tubomo.”

³⁴Sasaibino doiya aki naminangalatikon mau soisik doi Yesus napololaing-pololaingoo. Koalatino dona bantilan-bantilanoo sinookonikon doi yanila. Yanila aki natoiyo Yana basilingan tentang oila.

³⁵Sambuno Yesus adukono polong doi Yerikho, meeng komian piit daano moosulang bakaikabi doi loloon bibilo.

³⁶Salataa yana ndongoliiyo komian mobadaangoo moalon, yana mansadai, “Daano kooila?”

³⁷“Yesus, Nasaret mianoo, alon,” yanila bantile doi yana.

³⁸Maka do mianoo mopiit nggeleamon, “Yesus, Daud napau! Seseange yaku!”

³⁹Mian-mian mo doi muka, nggimoliiyo tukon sumboliiyo yana natade. Bai yana kabasale kona nggeleamonan, “Daud Napau! Seseange yaku!”

⁴⁰Yesus tade tukon sumboliiyo komian babayo do mianoo mopiit doi Yana. Salataa yana polong Yesus mansadai,

⁴¹“Oila komu iniyas Yaku mo kubaiyo tuuk doikoo?” “Tuan,” do mianoo mopiit timbiliyo, “yaku yase mokita.”

⁴²Maka Yesus bantile, “Kalu buno doiya, kitayo! Sabab ikoo mangangga doi Yaku, ikoo tangalin.”

⁴³Doiya kotempono yana moolamo mokita, maka yana lolainge Yesus tukon bakinatauwan doi Mian Bisa. Sambuno do mianoo badaang kitayo do langgedoo, yanila sasaibino nggaale ko Mian Bisa.