Read Banggai LUKAS 19 Bible Online

LUKAS 19 - Banggai bible

LUKAS 19

¹Salataa Yesus polong doi Yerikho, yana ampakon banggadudul pintosiiyo do kotadoo.

²Doi kotadoo daano komeeng kopakabi lulu kapalano mo kaasa. Kosambuno Zakheus.

³Yana yase kitayo indee komiano doi Yesusoo, bai sabab komian todudul badaang tukon yana susuungo pepende, maka yana aki namoola kitayo Yesus.

⁴Jadi, yana obulen mantailukonio domianoo maka liba doi meeng kokayung, sulano namoola kitayo Yesus naapa koidan naikon mo alon idoo.

⁵Sambuno Yesus polong doi kayungo, yana kitayo doi bungkuk maka bantile, “Zakheus, obulus mosobit! Sabab Yaku sio kulubat doi mubonua oloyo nia.”

⁶Zakheus moso-mosobit obulus maka talimayo Yesus tukon sanaang.

⁷Sasaibino komian mo kitayo do langgedoo tambuuno mondommuk. Yanila bantile, “Sse! Yana ampakon sambu doi mianoo mo aki namonondok nabonua!”

⁸Doibundu doi nabonua, Zakheus kokondong tukon bantile doi Yesus, “Temeneno, sembeleng daku buat naikon yaku beekene doi mian motalalais; tukon doi indee komian mo biasamo yaku tipuwo, naikon yaku bayare koidan doi yana sangkap luunggon kolipato!”

⁹Maka Yesus bantile, “Naiya kooloyono ikoo tukon sasaibino boloki tukon labuk Mian Bisa salamatenemo tukon binee tuboan mo boolu, sabab ikoo koidan Abraham nakaturunan.

¹⁰ Manusia na Pau lubat sulano umboliiyo tukon salamatene komian mo tapa.”

¹¹ Daano komian momondongolii Yesus mobasilingan, Yana basalitakene komeeng koandean. Sabab, doiya kosinggatoo Yana daano moloolani ko Yerusalem, tukon komian aanggene baikon ko Mian Bisa mosobit naikon namaparenta buno Tomundo doi dunia.

¹²Yesus bantile, “Daano komeeng komian moinodotii mo ampakon doi lipu mo odoon sulano nabiningkat teali tomundo, doibundu abali.

¹³Akiyoon naluwe yana uange songulo komian napeleleani, maka beena yanila meeng-meeng posindool doy mosoni. ‘Pobadagango tukon nia doy nia modaanon yaku moampakon,’ konabantilano doi yanila.

¹⁴Bai do lipudoo tumbuno misikitene yana. Jadi sambuno lapa yana luwe, yanila makapatu sosumbolii sulano napopitoikene, ‘Kami aki nayase namian nia nateali mai tomundo.’

¹⁵Bai do moinodotidoo biningkato teali tomundo, doibundu abali doi nalipu. Soisobiton yana uange kona peleleani-peleleani namangadap, sulano natoiyo bulaa kona untung yanila mo lapamo talimayo.

¹⁶Peleleani tumbeno lubat tukon bantile, ‘Tuan, meeng komu doy mosoni Tuan nabineekon, yaku lapamo tealikene songulo.’

¹⁷‘Monondok,’ tuanoo bantile, ‘ikoo peleleani momondok! Sabab langge-langge mo poipoisik ikoo moolamo inangga, yaku naikon tealikene ikoo kapalaiyo kosongulo kota.’

¹⁸Peleleani koluano lubat tukon bantile, ‘Tuan, meeng kodoy mosoni Tuan nabineekon, yaku lapamo tealikene lima.’

¹⁹Tomundodoo bantile doi peleleanidoo, ‘Ikoo naikon teali kapalaiyo lima kokota.’

²⁰Peleleani bailon lubat tukon bantile, ‘Tuan, naiya Tuan nadoy; yaku abese doi lenso lalomo.

²¹Yaku matakutene doi Tuan, sabab Tuan mian mobarani. Tuan alayo oila komo bolikon Tuan koona, tukon Tuan mangala hasil doi lipu Tuan mo aki nabasakakon.’

²²Tomundodoo bantile doi yana, ‘Ikoo peleleani mo lokis! Pokokonoi tukon mubantilan-bantilan susuumu yaku naikon ukume ikoo. Ikoo toiyo yaku mian mobarani: yaku alayo oila komo bolikon koonggunan tukon mangala hasil doi lipu mo aki kubasakakon.

²³Kalu buno doiya bulaa ikoo aki muusekene do doydoo doi bank sulano kalu naikon yaku abalimo yaku moola mantalima do doydoo tukon bungano?’

²⁴Doibundu tomundodoo bantile doi mianoo mo kokondong idoo, ‘Alayo do doydoo doi yana tukon beekene doi peleleanidoo mo daano songulo kona doy maasoo.’

²⁵Bai mianoo bantile, ‘Tuan, yana anomo kosongulo.’

²⁶ Tomundodoo timbiliyo, ‘Neneeke: mian mo lapamo daano, doi yana naikon binee lobian badaang koidan. Bai mian mo aki nadaano mau meeng, oila komo daano doi yana inala koidan doi yana.

²⁷Tukon diabudodoo babayomo doi sumai daku musu-musudoo mo aki nayase yaku kuteali tomundo. Akateyo yanila sasaibino doi salaanggu!’ ”

²⁸Salataa Yesus bantilemo sasaibino doiya Yana ampakon lolukoniyo yanila moampakon doi Yerusalem.

²⁹Salataa loolanimo ko Betfage tukon Betania doi Zaitun Bunggulo, Yana sumboliiyo kolua kona pololaing ampakon loolukon.

³⁰“Poampakono doi kampungoo doi salaanggitadoo,” Yesus bantile doi yanila, “kalu naikon komuyu usok imbali, komuyu naikon kitayo komeeng koadalan napau motokooton. Do adalanoo akiyoon nabiasa mian lokitiyo. Liate doi nakinootonan do adalanoo tukon babayo doi sumai.

³¹Kalu mian mansadai doikoo, ‘Bulaando komuyu mosodiiyo do adalanoo?’ bontiikene, ‘Temeneno palaluuwo.’ ”

³²Yesus napololaingoo molua ampakono, tukon laate sasaibino bisa buno Dona binantiloo.

³³Sodo yanila sodiiyo do adalanoo napau, kotumbuno bantile doi yanila, “Bulaando komuyu mosodiiyo do adalanoo?”

³⁴Yanila timbiliyo, “Temeneno palaluuwo.”

³⁵Maka yanila babayo do adalanoo napau doi Yesus. Doibundu yanila abese kona jubah doi adalanoo bungkuto maka tomboniiyo Yesus molakit doi bungkono.

³⁶Salataa Yana alon tukon molokiti adalanoo, komian ambasene kona pai jubah doi loloon.

³⁷Salataa Yesus adukono polong doi Yerusalem, doi loloon mo tinokolui ko Zaitun Bunggulo, sasaibino kona pololaing-pololaing mo badaangoo tambuuno nggele-nggeleamon nggaale ko Mian Bisa tukon bakinatauwan doi Yana sabab sasaibino komo minasaindinggon lapamo yanila kitayo.

³⁸ Yanila nggeleamon, “Binalakaati ko Tomundo mo lubat tobikon Temeneno sambuno! Namonondokan doi surgaa, tukon natanggaalan ko Mian Bisa!”

³⁹Bubula ko Parisi miano doi antara mianoo badaang bantile, doi Yesus, “Tama Guru, sumboliiyo Tama napololaing-pololaing natade.”

⁴⁰Yesus timbiliyo, “Poanggayomo! Kalu yanila tade, batu-batu nia naikon nggeleamon.”

⁴¹Salataa Yesus loolaniyomo tuuno ko Yerusalem, tukon kitayo do kotadoo, Yana kokiiliyomo.

⁴²Bantile, “Mbalais, bulaando kona monondokan kalu oloyo nia ikoo toiyo oila komo moola lubatene kopodamean! Bai diabudodoo ikoo aki namoola kitayo.

⁴³Ikoo naikon toupiyo komeeng koloonu, naando komu musu kubaiyo kohalangan-halangan potikunggon ikoo; yanila naikon lobosiyo ikoo tukon desaake ikoo doi sasaibino kopasu.

⁴⁴Yanila naikon akabuse ikoo polong sasaibino komu mian; tukon akiyo komeeng kobatu naikon yanila mosodiikene natosusun doi natangabosan, sabab ikoo aki mupalatikanggene kotempono ko Mian Bisa nalubatan sulano nasalamatene ikoo!”

⁴⁵Yesus usok doi Temeneno Na Bonua tukon tambuuno siikayo kopadagang-padagang idoo.

⁴⁶ “Doi Kitab Moliyous lalomo,” yana bantile doi yanila, “totulis buno naiya: Mian Bisa bantile, ‘Daku bonua teali bonua sambeangan.’ Bai komuyu tealikene tampat pondikukan!”

⁴⁷ Samba kooloyo Yesus mongotunggul doi Temeneno Na Bonua lalomo. Imam-imam kapalano, tukon guru-guru agama, tukon katua-katua Yahudi yase akateyo Yana,

⁴⁸bai aki namalaat loloon sulano nalakukanggene do langgedoo, sabab sasaibino komian banggadudul mondongolii Yana, tukon tatarik doi nabantilan-bantilan.