Read Banggai LUKAS 2 Bible Online

LUKAS 2 - Banggai bible

LUKAS 2

¹Doiya kosinggatoo Tomundo Agustus maparentakene sulano sasaibino korayat doi Batomundoan Roma namonggitulisene kobutongo sulano natinulis.

²Natinulisan kobanggapi sambuno tumbeno nia singgatoo Kirenius natealian gubernur doi lipu Siria.

³Sasaibino komian doiya kosinggatoo ampakon sulano namonggitulisene kobutongo doi nakota suwe-suwele.

⁴Yusuf lakon luwedoi Nasaret doi Galilea ampakon doi Betlehem doi Yudea, Tomundo Daud nalipu sinuungan; sabab Yusuf Daud naturunan.

⁵Yusuf monggitulisene kobutongo polong Maria dona bibianoo mo daano motianan.

⁶Salataa yanila daanomo doi Betlehem laatemo kotempono Maria namosuungan.

⁷Yana suunge komeeng kopau malaneno, napau langgongo. Do paudoo binungus tukon toik, maka kinoolo doi kooloan lalomo koantoko limbut; sabab yanila akimo namalaat tampat dungolan.

⁸Doi popookoo daano kopadagai iyayon mo daano badagai domba doi padang lalomo doi lipudoo.

⁹Sosinggot ko Temeneno namalaekat okitakene kobutongo doi yanila, tukon madialan laango moluwedoi Temeneno motontilang motarangiyo yanila, tukon yanila matakut tuuno.

¹⁰Bai do malaekatoo bantile, “Inai matakut! Sabab yaku lubat babayo kobilita monondok tuuk doi komuyu — bilita mo sinanaanggon tuuno doi sasaibino komian.

¹¹Oloyo nia doi kota Daud lapamo tosuung ko Tomundo Pasalamat ikoo doiyamo Kristus, nda Temeneno.

¹²Naiyamo kopaloosano: Komuyu naikon pososuunggene komeeng kopau lumboon mobinungkus tukon toik, tukon moolo doi meeng kobasoan.”

¹³Sosinggot do malaekatoo linolaing badaang komalaekat bailon, mo nggaale ko Mian Bisa. Yanila bantile,

¹⁴“Tanggaalo ko Mian Bisa doi timbu mo tatandak! Tukon doi buta bungkono, kobanggapi namonondokan mo konoiyo ko Temeneno noano!”

¹⁵Salataa do malaekat-malaekatoo tinggalemo yanila tukon abali doi surgaa, do padagai-padagaidoo bantil meeng tukon bailon, “Mai nda ampakon doi Betlehem tukon nda kitayo do langgedoo mo teali, Temeneno mo popitoikene doi kita.”

¹⁶Yanila polaing ampakon tukon pososuunggenemo Maria tukon Yusuf, tukon do paudoo lumboon momoolo doi basoanoo lalomo.

¹⁷Sambuno dopadagaidoo iyayon kitayo do paudoo, yanila salitayo oila do malaekatoo nabinantil tentang dopaudoo.

¹⁸Tukon sasaibino komian masainding momolongol do padagaidoo iyayon nasalita.

¹⁹Bai Maria abese sasaibino doi noano lalomo tukon yana pikikene.

²⁰Padagai-padagaidoo iyayon abali doi padang lalomo maka nggaale tukon kabasale ko Mian Bisa, sabab sasaibino komo lapamo yanila lengele tukon kitayo, bisa bunomo domalaekatoo nabinantil.

²¹ Salataa alu kooloyo kona sinuungan, do paudoo sinunato. Tukon yanila sombuikene Yesus, sambu malaekat mo beekene doi Yana akiyoon tina-No natiananggene Yana.

²² Laatemo kotempono Yusuf tukon Maria nalakukanano koadat badodoloonau monurut Musa naukum. Maka yanila babayo do Paudoo doi Yerusalem sulano nasinalakanggon doi Temeneno.

²³ Sabab doi Temeneno na Ukum lalomo totulis buno naiya, “Samba-samba kopau malaneno langgongo, sio nasinalakanggon doi Temeneno.”

²⁴Yanila koidan kona makisuut mososubakon sosuba, doiyamo meeng kopasang kotomisi sapatau, kai lua kotomisi lapatiing mo mongula, bunomo komo tinantukon doi Temeneno na Ukum lalomo.

²⁵Doiya kosinggatoo doi Yerusalem daano komeeng komian kosambuno Simeon. Yana mian monondok, mo matakutene ko Mian Bisa tukon daano montotiili tempono ko Mian Bisa nasalamatanano ko Israel. Mian Bisa Na Roh lolainge yana,

²⁶tukon ko Mian Bisa Na Roh lapamo popitoikene doi yana baikon yana akiyoon namate kalu akiyoon nakitayo ko Tomundo Pasalamat Mian Bisa mo perjanjiankene.

²⁷Tongo Mian Bisa Na Roh nalolaingano, Simeon usok doi Temeneno Na Bonua. Doiya kosinggatoo Yusuf tukon Maria babayo Yesus usok, mo daanoon mopoipoisiko sulano nakubaiyo koupacara mo pinarentakon doi ukum agama.

²⁸Maka Simeon bingkate do Paudoo tukon yana lambine, maka nggaale ko Mian Bisa,

²⁹“Diabudodoo, Temeneno, ikoo lapamo daanokene komu perjanjian. Batadikenemo komu peleleani nia namate tukon monondok.

³⁰Sabab tukon matanggu susuunggu yaku lapamo kitayo ko Pasalamaton moluwe doi-Koo.

³¹Do Pasalamatonoo Ikoo lapamo sadiakene tuuk doi sasaibino kobangsa:

³² bunomo kai madialan mo kadiolongiiyo kololoon motuuk doi bangsa-bangsa bailon, sulano nalubat doi-Koo; doiyamo madialan mo lubatene kona inodotiiyan tuuk Muumat Israel.”

³³Do Paudoo tamano tukon tinano masainding molengele oila doi Simeon nabinantil tentang doi yanila napaudoo.

³⁴Simeon balakaatiyo yanila tukon bantile doi Maria do Paudoo tinano, “Na Paunia lapamo Mian Bisa piliyo sulano naosilakayo tukon sulano nasalamatene ko Israel miano. Yana naikon teali paloosan doi Mian Bisa, mian badaang naikon mo tantange,

³⁵tukon kalu bunomo doiya tobukamo yanila noano antoko. Kosusaan naikon tiike konoamu buno sabel mo mamangan.”

³⁶Daano koidan komeeng konabi boine mo motuwamo tuuno. Kosambuno Hana, Fanuel napau, doi suku Asyer. Pitumo kotaun kona lapaan osowaan,

³⁷Hana tealimo balu, tukon diabudodoo alu kolonomo sangkap kotaun kona umur. Akiyoon nadaano kona tinggalano ko Temeneno Na Bonua. Oloyo popook yana sosuba idoo doi Mian Bisa tukon sambeang maka apata.

³⁸Pokokonoi doiya kosinggatoo koidan yana lubat, maka nggaale ko Mian Bisa tukon basilinganggene tentang do Paudoo doi sasaibino komian mo totiiliyo kotempono ko Mian Bisa naosodiiyano ko Yerusalem.

³⁹ Salataa Yusuf tukon Maria lapa kubaiyo sasaibino komo tinuntut doi Temeneno na Ukum, yanila mulemo doi Nasaret doi Galilea.

⁴⁰Do Paudoo tosuungimo kona babasalan tukon bukuano. Yana pandoi tuuno tukon Mian Bisa seseange tuuno.

⁴¹ Samba-samba kotaun Yesus tamano tinano ampakon doi Yerusalem molamekene ko Oloyo Paskah.

⁴²Tukon salataa Yesus songulomo lua kotaun kona umur, yanila ampakon doi lameanoo monurut nakabiasaan.

⁴³Salataa lapa do lameanoo yanila mule, bai Yesus, do Paudoo, daano modungol doi Yerusalem, tukon kotamano tinano aki natoiyo.

⁴⁴Yanila aanggene Yana malaingo doi rombonganoo. Salataa lapa meeng kooloyo kona poampakonan maka nasodo yanila umboliiyo Yana doi utus-utusoila tukon doi yanila napotoikonan.

⁴⁵Bai yanila aki napososuunggene, jadi yanila abali doi Yerusalem unggoliiyo Yana.

⁴⁶Lapa tolu kooloyo kona pai umboliiyano, yanila laate Yana doi Temeneno Na Bonua lalomo. Yana daano moosulang mondongolii koguru agama tukon mebee pasadai-pasadai.

⁴⁷Sasaibino komian molongol Yana masainding sabab kona potimbili-potimbilidoo bisa.

⁴⁸Kotamano tinano masainding mokitayo Yana. Kotinano bantile doi Yana, “Pau, bulaando Ikoo molakukanggene naiya doi kami? Kotamamu tukon tinamu pakadako moumboliiyo Ikoo!”

⁴⁹Yesus timbiliyo, “Bulaando tama tukon tina moumboliiyo Yaku? Banggokai tama tukon tina aki natoiyo baikon Yaku sio nadaano doi Tamanggu nabonua lalomo?”

⁵⁰Bai yanila aki namangalatikene Yesus napotimbili.

⁵¹Doibundu Yesus mule polaing yanila doi Nasaret, tukon loingiyo doi yanila. Sasaibino do langgedoo kotina-No abese doi noano lalomo.

⁵² Yesus momeenggon tosuungimo kona babasalan tukon tosuungimo kona pandoiyan, tukon Mian Bisa seseange tukon kobanggapi kilakene.