Read Banggai LUKAS 20 Bible Online

LUKAS 20 - Banggai bible

LUKAS 20

¹Doi oloyo meeng, Yesus daanon mongotunggul tukon babilitakene ko Bilita Monondok moluwedoi Mian Bisa doi mian modaanon doi Temeneno Na Bonua lalomo. Imam-imam kapalano, tukon guru-guru agama, polaing kokatua-katua Yahudi, lubat

²tukon bantile doi Yesus, “Coba bontiikene doi kami oila komu dasar mokubaiyo sasaibino nia? Indee komo beena haak doikoodoo?”

³Yesus timbiliyo, “Yaku yase koidan momansadai. Coba bontiikene doi yaku,

⁴Yohanes mansau mian tukon indee nahaak? Mian Bisa kai banggapi?”

⁵Maka yanila tambuuno mopopikilanggene, “Kalu kita bantile, ‘Tukon Mian Bisa nahaak,’ Yana naikon bantile, ‘Kalu buno doiya, bulaando komuyu aki pomangangga doi Yana?’

⁶Bai kalu kita bantile, ‘Tukon banggapi nahaak,’ sasaibino komian naikon sakule batu kita, sabab yanila anggayo baikon Yohanes meeng konabi.”

⁷Jadi yanila timbiliyo, “Kami aki mai toiyo.”

⁸Maka Yesus bantile doi yanila, “Kalu buno doiya mau yaku aki naikon kumobontiikon doikoo tukon indee nahaak yaku mokubaiyo sasaibino naiya.”

⁹ Yesus basalitakene doi mianoo, andean nia koidan, “Daano komeeng komian mo sakaiyo komeeng koanggur asino. Yana matambokene do asidoo doi bubula komo limange maka Yana taus doi lipu bailon tukon dungol malumbit idoo.

¹⁰Salataa laatemo kotempono bapupuiyan anggur saono, do asidoo tumbuno sumboliiyo kona peleleani doi polimang-polimangoo sulano natalimayo kona obos. Bai do polimang-polimangoo bobokiiyo do peleleanidoo tukon sumboliiyo yana mule tukon akiyo kona kinanggi.

¹¹Maka do asidoo tumbuno sumboliiyo koidan komeeng kopeleleani bailon; bai do peleleanidoo binobokii koidan tukon do polimang-polimangoo totulaiyo, maka sinumbolii mule tukon akiyo kona kinanggi.

¹²Doibundu do asidoo tumbuno sumboliiyo kona peleleani kotoluno. Bai do peleleanidoo binobokii koidan doi polimang-polimangoo tukon sinakukon doi asidoo tonggulungo.

¹³Doibundu do asidoo tumbuno bantile, ‘Yaku sio oila daku kinubai koidan? Yaku naikon sumboliiyo daku pau sineang susuungo. Tantu yana naikon yanila odotiiyo!’

¹⁴Bai salataa do polimang-polimang asidoo kitayo do asidoo tumbuno napau, yanila pobotiiyonggon meeng tukon bailon, ‘Naiyamo yana komo haakiyo. Mai nda akateyo yana, sulano kita komo laate kona haak.’

¹⁵Maka yanila boboiyo babayo doi asidoo tonggulungo maka yanila akateyo.” Maka Yesus mansadai, “Nah, kalu do asidoo tumbuno abali, yana naikon oila kona kinubai doi polimang-polimangoo?

¹⁶Tantu yana naikon lubat tukon akateyo do polimang-polimangoo, maka nasalakanggene do asidoo doi polimang-polimang bailon.” Molongol doiya, bantilo komianoo doi Yesus, “Kona tutuuwan aki!”

¹⁷ Yesus kitayo yanila maka bantile, “Kalu buno doiya, oila koalatino naiya ayatia doi Kitab Moliyous lalomo? ‘Batu mo aki napinake doi tukang bangunan, lapamo teali batu mo tutuu.’

¹⁸Sasaibino komian mo otuwong doi batudoo naikon manas; tukon indee do batudoo napinisa naikon mopipis teali ambata.”

¹⁹Guru-guru agama tukon imam-imam kapalano toiyo baikon do andeanoo Yesus otuuke doi yanila. Tobikon doiya yanila yase lakoyo Yana doiya singgat koidan, bai yanila matakutene komian badaang.

²⁰Jadi yanila mounggolii todanan mo monondok. Yanila matambo mian sulano nababunokon mian mo moloyos konoano, tukon sumboliiyo domianoo moodinggalayo Yesus tukon pasadai-pasadai, sulano yanila namoola salakanggene Yana doi haak tukon kakuasaan gubernur.

²¹Maka do mianoo mo lapamo tinambo bantile doi Yesus, “Tama Guru, kami toiyo baikon sasaibino Tama nabantilan tukon nainotunggukon bisa. Kami toiyo koidan Tama mongotunggul tukon natutuuwan tentang Mian Bisa namongiasan motuuk doi banggapi, sabab Tama aki napiliyo komian.

²²Tobikon doiya coba Tama bontiikene doi kami, monurut paraturan nda agama, moola kai nda babeal lulu doi Tomundo kai aki?”

²³Bai Yesus toiyo yanila naakal. Tobikon doiya Yana bantile,

²⁴“Coba okitakene doi Yaku komeeng kodoy perak. Indee kai gambaro tukon sambuno naiya?” “Tomundo!” yanila timbiliyo.

²⁵“Kalu buno doiya,” Yesus bantile doi yanila, “beekene doi Tomundo, oila komo Tomundo koona tukon komo doi Mian Bisa, oila komo Mian Bisa koona.”

²⁶Tokita doi mian badaang salaanodoo yanila aki namoola malaat meeng kokasalaan modaano doi Yesus. Yanila tongo tade tolong tukon masaindinggene kona potimbilidoo.

²⁷ Bubula kobenseno ko Saduki miano lubat doi Yesus. (Yanila doiyamo kobenseno napikilan baikon komian momate aki naikon natubo koidan.) Yanila mansadai doi Yesus,

²⁸ “Tama Guru, Musa tulise naukum nia tuuk kita: Kalu meeng komala-malane mate tukon akiyo kona pau, maka koutuso sio nakilayo kobaluno sulano nadaano kona turunan doi mianoo mo lapamo mate.

²⁹Biasa daano kopitu komian montulutus. Kolanggongo osowaano, maka mate akiyoon nadaano kona pau.

³⁰Doibundu koluano osowaan tukon baluno, bai yana koidan mate akiyo kona pau.

³¹Langge mo pokakana teali koidan tukon utuso kotoluno tukon banggadudul polong doi kopituno.

³²Doibundu do boinedoo mate.

³³Doi oloyono komian momate nainotuboiyan koidan, indee kai naboloki do boinedoo? Sabab domo pituiladoo lapamo pokila tukon yana.”

³⁴Yesus timbiliyo, “Mian mo tubo nia budodoo osowaan,

³⁵bai mian mo moola inotuboi doi namatean, tukon tubo naikon doi lounu naikon mo lubat yanila aki naosowaan.

³⁶Kondoongo yanila buno malaekat, tukon aki namoola mate. Yanila daano Mian Bisa napau-pau, sabab yanila inotuboi koidan doi namatean.

³⁷ Musa susuungo okitakene tukon tontong baikon komian momate naikon inotuboi koidan. Doi natulisan lalomo tentang do mosolotoo mokait yana bantile Mian Bisa pokakana ‘Abraham na Mian Bisa, Ishak na Mian Bisa tukon Yakub na Mian Bisa’.

³⁸Nah, do Mian Bisadoo bolikon mian mate na Mian Bisa! Yana mian-mian motubo na Mian Bisa! Sabab motuuk doi Mian Bisa, sasaibino komian tubo.”

³⁹Bubula koguru agama bantile, “Tama Guru napotimbili monondok tuuno.”

⁴⁰Tobikon yanila akimo nabarani koidan momansadaikene komeeng kolangge doi Yesus.

⁴¹Yesus mansadai doi yanila, “Bulaando kai momoola nabinantil baikon ko Tomundo Pasalamat Daud naturunan?

⁴² Banggokai Daud susuungo bantile doi buku Sadeong lalomo, ‘Temeneno bantile doi ku Temeneno: Osulango doi bakalinganggu sembeleng,

⁴³polong Yaku tealikene komu musu-musu taaluuk doikoo.’

⁴⁴Jadi kalu Daud bantile do Tomundo Pasalamatonoo, ‘Temeneno’, bulaando kona tealian yanamo Daud naturunan?”

⁴⁵Daano komian molongol Yesus mobasilingan, Yana bantile doi napololaing-pololaing,

⁴⁶ “Pobada-badagai doi guru-guru agama. Yanila yase amba-ambakon tukon jubah mo bulusan, tukon yase inodotii doi labotan-labotan. Yanila yase kotampat-tampat motongodotii doi bonua kaleda lalomo tukon doi lamean-lamean.

⁴⁷Yanila kokoliiyo kobalu-balu tukon lambase kona bonua. Tukon sulano napo tombukiyo doi yanila nakulokisanoo, yanila sambeang bulu-bulusan! Yanila naukuman naikon babalat!”