Read Banggai LUKAS 21 Bible Online

LUKAS 21 - Banggai bible

LUKAS 21

¹Doi Temeneno Na Bonua, Yesus kitayo komian mokaasa mousekene kona doy doi peti basosubakonan lalomo.

²Yana kitayo koidan komeeng kobalu mo talalais tuuno, mongusokon lua kodoy tambaga.

³Maka Yesus bantile, “Ndongoliiyo: nabalu nia mongusokon lobian kona kadaang doi sasaibino kobailon.

⁴Sabab yanila sasaibino beekene luwedoi nalobianan kona buat. Bai nabalu nia, mau kai natalalais tuuno, beekene sasaibino komo daano doi yana moi yana palaluuwo susuungo tuuk doi natuboan.”

⁵Daano komian mo basilingan tentang bulaando ko Temeneno Na Bonua namonondokan mobinubungai tukon batu mo monondok tukon langge-langge mo sinosubakon doi Mian Bisa. Maka Yesus bantile doi yanila,

⁶“Totiiliyo daano kotempono sasaibino komuyu mo kitayo nia naikon minanas; akiyono mau nabaino meeng kobatu dimbaa naikon mo totinggal tosusun doi natangabosan!”

⁷Yanila mansadai doi Yesus, “Tama Guru, oilakai kotempono do langgedoo natealian? Tukon oilakai kopaloosano baikon molapamo polong kotempono do langgedoo natealian?”

⁸Yesus bantile, “Pobadagai, inai nasampe komuyu inokolii. Badaang naikon komian molubat tukon babayo kosambunggu, tukon bantile, ‘Yakumo kai Yana!’ tukon ‘Laatemo kotempono.’ Bai inaikai komuyu pololainge yanila.

⁹Inaikai koidan pomatakut kalu komuyu molongol kobilita tentang polobosian tukon ponggimakonan. Sasaibino doiya sio nateali loolukon. Bai doiya koalatino akiyoon baikon nalaate kotempono kona kiamatan.”

¹⁰Maka Yesus banggadudulkene kona salita, bantile, “Bangsadoo mo meeng naikon polobosi lawane kobangsa bailon, tukon negara momeeng naikon molobosiyo konegara bailon.

¹¹Doi yayaa naikon teali koleali mo babasal, silakaan malaalan tukon sesel. Naikon teali kolangge-langge mo minosikiton tukon mominatakauton doi timbu.

¹²Bai akiyoon sasaibino doiya nateali, komuyu naikon linako tukon sinakisaa. Komuyu naikon inadili doi bonua-bonua kaleda tukon inusokon doi talunggu lalomo. Tukon komuyu naikon sinalakanggon doi tomundo-tomundo salaano tukon moberkuasa sabab komuyu kupololaing.

¹³Doiyamo komu todanan sulano mupelenggene ko Bilita Monondok moluwedoi Mian Bisa.

¹⁴ Pobatetel baikon komuyu aki naikon pomatakut tentang oila komo sio pobantile motuuk doi mubelaano kobutomu.

¹⁵Yaku susuunggu naikon beena ikoo bantilan-bantilan tukon pandoiyanoo, tobikon akiyo komeeng komian doi musu-musudoo momoola lawane kai akiyenggene oila kopo binantil.

¹⁶Komuyu naikon dinadaat doi tinamu tamamu, doi utus-utusomu, doi mumontolidanan tukon doi tula-tulamu. Kosoobos doi komuyu naikon yanila akateyo.

¹⁷Komuyu naikon minosikiton doi sasaibino komian sabab komuyu kupololaing.

¹⁸Bai meeng kobuuk doi olumu aki naikon nalapus.

¹⁹Kalu komuyu bataanggon tukon sabar, komuyu naikon salamat.”

²⁰“Kalu komuyu kitayo ko Yerusalem suludadu namanasano, komuyu naikon toiyo baikon do kotadoo akimo namalumbit koidan naikon minanaso.

²¹Doiya kosinggatoo siokai komian mo daano doi Yudea naobulen doi bungkuko. Yanila mo daano doi kota lalomo sio natinggale do kotadoo, tukon yanila mo doi kota tonggulungo inai nausok doi kotadoo lalomo.

²² Sabab do oloyo-oloyodoo daano ‘Oloyo-oloyo Ukuman Nainotuwongan’, sulano tukon buno doiya tealimo oila komo lapamo totulis doi Kitab Moliyous lalomo.

²³Bukan maen kona susaan do oloyo-oloyodoo motuuk doi boine mo tianan, tukon pau tinano mo daano mosusuwo kona pau! Nakampung nia naikon toupiyo kosusaan mo babasal, tukon ko Temeneno naikon ukume kobangsa nia.

²⁴Daano komo naikon inakate tukon sabel, daano koidan naikon komo binaba buno mian motinaan doi mian-mian nalipu; tukon mian mo aki natingoniiyo ko Mian Bisa naikon tudo-tudongiiyo ko Yerusalem polong kabus kotempono molapamo Temeneno tantukanggene tuuk doi yanila.”

²⁵ “Totiiliyo doi oloyo, bituwon, tukon bituwon-bituwon pauno naikon natokita kopalo-paloosano. Doi dunia, kobangsa-bangsa naikon matakut tukon bingung mosasalaane kobokol alalo tukon tobun liaako.

²⁶Kobanggapi naikon matakut tuuno mosasalaane oila naikon komo teali doi posaapon nadunia nia, sabab komo kuasaiyo kodapang naikon teali nggabut.

²⁷ Doiya kosinggato do Manusia doona Pau naikon lubat doi bunom lalomo tukon nakuasa tukon namonondokan mo babasal.

²⁸Kalu do langge-langgedoo tambuuno teali, banguno tukon bingkate koolumu, sabab naapa doiya koidan komuyu naikon sinalamatono.”

²⁹Maka Yesus salitaikene doi yanila naandean buno naiya, konabantilano, “Popalatikanggene koara batango tukon sasaibino kokayung batango bailon.

³⁰Kalu kolende-lendeno mulaimo tokita, komuyu toiyo baikon loolanimo koloonu napintalan.

³¹Bunomo koidan kalu komuyu kitayo do langge-langgedoo moteali, komuyu naikon toiyo baikon ko Mian Bisa mosobito naikon namaparenta buno Tomundo.

³²Potoiyo! Langge-langgedoo naikon teali akiyoon komian mo tubo diabudodoo nia mate sasaibino.

³³Timbu tukon buta naikon lapus, bai dakubantilan tataap posidutukon.”

³⁴“Dagaiyo kobutomu, inai napolong komuyu todudul nggabut bala-balamean tukon inume komo ininum momosopot, kai todudul pikikene kosoal-soal mutuboan, tobikon komuyu akipo batotobo salataa do oloyodoo sosinggoton tokita.

³⁵Sabab do Oloyodoo naikon lubat buno palako doi sasaibino komian doi dunia nia bungkono.

³⁶Pobada-badagai, tukon posambeang sidutu sulano komuyu pobukuan atasiyo sasaibino kolangge naikon mo teali tukon komuyu moola mangadap doi Manusia na Pau.”

³⁷ Yesus mongotunggul doi Temeneno Na Bonua doi oloyo tukon doi popook Yana ampakon doi Zaitun Bunggulo tukon dungol idoo.

³⁸Samba kodowa-dowa sasaibino komian lubat doi Temeneno Na Bonua sulano namondongolii Yesus naotunggul.