Read Banggai LUKAS 22 Bible Online

LUKAS 22 - Banggai bible

LUKAS 22

¹ Lamekanano ko Roti Moakiyo kona Ragi mo sinombuikon tuuk doi Paskah naikon loolanimo.

²Imam-imam kapalano tukon guru-guru agama daano mounggolii loloon sulano Yesus nainakate secara aki natotoi, sabab yanila matakutene komian badaang.

³Doibundu Ibiliis usokiyo Yudas mo sinombuikon Iskariot, doiyamo meeng komian doi songulo lua do Yesus napololaing.

⁴Tobikon doiya Yudas ampakon tukon pobisalai tukon imam-imam kapalano tukon padagai kapalano ko Temeneno Na Bonua tentang bulaando yana namoola salakanggene Yesus doi yanila.

⁵Yanila sanaang tuuno tukon dandiyo sulano nabeena doy doi yana.

⁶Yudas yasemo tukon tambuuno moumbolii todanan sulano nasalakanggene Yesus doi yanila, tukon akiyo komian motoiyo.

⁷Laatemo kooloyono ko Lamekanano ko Roti Moakiyo kona Ragi baikon kodomba kinolot sulano nakinaan doi Paskahdoo.

⁸Maka Yesus sumboliiyo Petrus tukon Yohanes, “Ampakono sadiayomo kokinaan Paskah motuuk doi kita.”

⁹“Inaando Tama nayasano komai sadiakanano?” yanila mansadai.

¹⁰Yesus timbiliyo, “Salataa komuyu usok doi kota, meeng komala-malane mo daano makanggi meeng koselekan moono paisu naikon pososuung tukon komuyu. Lainge yana doi bonua nausokan,

¹¹tukon bontiikene doi bonuadoo tumbuno; Guru bantile, ‘Inaando kotampato sulano daku pololaing-pololaing tukon Yaku makaan kinaan Paskah?’

¹²Bonuadoo tumbuno naikon tudoikene doikoo komeeng kokombiang doi papak mo babasal, motasadiamo tukon lolongguno. Sadiayomo sasaibino indaa.”

¹³Maka Petrus tukon Yohanes ampakono maka laate sasaibino bisa buno doi Yesus nabantilano. Maka yaniladoo sadiayomo kokinaan Paskahdoo.

¹⁴Salataa laatemo kotempono motuuk makaanan kinaan Paskahdoo, Yesus poosulongii tukon Napololaing-pololaing doi tampat perjamuan.

¹⁵Maka Yana bantile doi yanila, “Yaku yase tuuno momakaan kinaan Paskah nia polong komuyu akiyoon kusakisaa.

¹⁶Sabab, poanggayomo: Yaku akimo naikon kumakaan nia koidan polong doi perjamuanoo alatino nai nokitakonan doi Mian Bisa na Dunia Boolu.”

¹⁷Lapa doiya Yesus bingkate kogalaas anggur, maka sambeang doi Mian Bisa, doibundu bantile, “Alayomo naiya, tukon ebe-ebesemo;

¹⁸sabab potoiyo: tambuun diabudodoo Yaku aki naikon momonginum naanggulia koidan polong doi Mian Bisa nalapaan berkuasa tukon tutuuno.”

¹⁹Lapa doiya Yesus mangala roti. Tukon salataa lapa sambeang, Yana bisi-bisiliyo do rotidoo tukon limano maka beekene doi yanila, tukon bantile, “Naiyamo kobutonggu [mo sinalakanggon tuuk komuyu. Kubaiyo naiyo sulano poneneeke Yaku.”

²⁰ Bunomo koidan salataa lapa kaan, Yana beekene do galaas angguroo doi yanila tukon bantile, “Galaas nia daano Mian Bisa naperjanjian mo boolu, mo sinahkanggon tukon saunggu — sau mo kinundang tuuk komuyu].”

²¹ “Bai kitayo! Mian mo dadaate yaku daano polaing yaku dimbaa!

²²Manusia na Pau takainomo naikon mate pokakana komo lapamo Mian Bisa tantukanggene; bai silakamo komian mo dadaate yana!”

²³Maka yanila tambuuno posada-sadai meeng tukon bailon, indee miano doi antara yaniladoo naikon komo lakukanggene do langgedoo.

²⁴ Doi antara pololaing-pololaing Yesus sumbot kopodangaanian tentang indee doi yanila komo sio nainaanggon babasal tuuno.

²⁵ Yesus bantile doi yanila, “Bangsa natomundo-tomundo mo aki natingoniiyo ko Mian Bisa pipike kona rayat, tukon kona pongurus-pongurus mosinombuikon ‘Padagai Rayat’.

²⁶ Bai komuyu aki namoola buno doiya. Kona tutuuwan, mian mo babasal doi antara komuyu sio nateali buno mo poipoisik tukon kopongurus sio nateali buno peleleani.

²⁷ Indee kai komo lobian kona babasalan: mian mo osulang kaan doi meja, kai mian mo leleaniyo yana? Tantu do mian mo osulangoo. Bai yaku daano doi antara komuyu pokakana kopeleleani.

²⁸Doi sasaibino daku kosusaan, komuyu sio posidutu polaing-laing tukon Yaku.

²⁹Bunomo kai Tama lapamo beena doi yaku haak sulano kumaparenta, bunomo kai koidan Yaku naikon beekene doikoo do haakoo.

³⁰ Tukon kalu buno doiya moola tulut balasanaang tukon Yaku doi tempo Yaku teali Tomundo. Tukon komuyu naikon osulang doi bungkuk songulo lua kokulusii tuuk moparentayo songulo lua kobangsa Israel benseno.”

³¹“Simon, Simon, ndongoliiyo! Ibiliis lapamo binee izin sulano naujio komuyu; buno gandum inalaas doi kulito tobikon inalaas doi mo kulokis.

³²Bai Yaku lapamo sambeang tuuk ikoo, Simon, sulano komu manganggaan inai nabolii. Tukon kalu ikoo lapamo abali doi Yaku, ikoo sio mukokobukuanggene koutus-utusomu.”

³³Petrus timbiliyo, “Temeneno, yaku basadia usok talunggu, tukon mate polaing-laing Temeneno!”

³⁴“Manganggamo Petrus,” Yesus bantile, “akiyoon komanuk nakokuuwa oloyo nia, ikoo tolumo luunggon muakiyenggene Yaku.”

³⁵ Salataa lapa doiya Yesus bantile doi yanila, “Looluk salataa Yaku bintekene komuyu tukon aki kupataikene komuyu makanggi dombet, kaikandi kai sapatu, oilakai komuyu daano kopo kakurangan oioila?” “Aki” yanila timbiliyo.

³⁶“Bai diabudodoo,” Yesus bantile, “indee komo daano kona dompet kai kandi, sio nakanggiyo; tukon indee komo akiyo kona sabel, sio nabalukene kona jubah sulano namongoli sabel.

³⁷ Sabab, anggayomo, ayat Kitab Moliyous mo buno naiya konabantilan, ‘Yana inaanggon buno mian molokis,’ sio nateali doi butonggu. Sabab oila komo totulis doi Kitab Moliyous lalomo tentang Yaku lapamo teali diabudodoo.”

³⁸“Temeneno,” pololaing-pololaing Yesus bantile, “kitayo, dimbaa daano kolua kosabel.” “Lapamo!” Yesus timbiliyo.

³⁹Yesus tinggalemo kota tukon ampakon buno nakabiasaan doi Zaitun Bunggulo, tukon napololaing-pololaing ampakon tukon Yana.

⁴⁰Salataa polong idoo Yana bantile doi yanila, “Posambeang sulano komuyu naaki pobaladosa kalu komuyu sinobai.”

⁴¹Doibundu Yana ampakon lobian dodoon soisik doi yanila, uga-ugaate pokakana kobatu sinakukon kona kododoon, maka ladanggene kotuulo tukon sambeang,

⁴²“Tama” konabantilano, “kalu momoola, dedeenggene doi Yaku kosakisaawan mo sio kutoupiyo nia. Bai inai moloingiyo Daku mongiasan, bai loingiyo Tama namongiasan.” [

⁴³Meeng komalaekat lubat doi Yana tukon kokobukuanggene.

⁴⁴Yesus sakisaa tuuno konoano tobikon pololokon Yana sambeang tutuuno. Kona lumbos buno sau motulo-tulo doi buta.]

⁴⁵Lapamo sambeang, Yesus abali koidan doi napololaing-pololaing. Yana pososuunggene yanila daano momoolo sabab susa tuuno.

⁴⁶Maka yana bantile doi yanila, “Bulaando komuyu momoola? Pobanguno tukon posambeang sulano komuyu aki pokanakon sobaan.”

⁴⁷Daano Yesus mobasilingan, lubato komian meeng tambuuno. Yanila Yudas komo andane, daano komeeng komian Yesus napololaing. Doibundu Yudas ampakon doi Yesus maka umayo.

⁴⁸Bai Yesus bantile doi yana, “Yudas, oilakai tukon muumaano yakudoo ikoo yase mokulokisanggene ko Manusia na Pau?”

⁴⁹Salataa Yesus napololaing-pololaing mo daano idoo kitayo oila naikon komo teali, yanila bantile, “Temeneno kami lobosiyomo kai tukon sabel!”

⁵⁰Maka daano komeeng komian doi yanila tabase do imam babasaloo naata tukon sabel sampe botol kotolingaino bakalingano.

⁵¹Bai Yesus bantile, “Banggalo!” Maka Yana taape do mianoo tolingaino tukon tangalinggene.

⁵²Doibundu Yesus bantile doi imam-imam kapalano tukon suludadu-suludadu modagaiyo ko Temeneno Na Bonua, tukon katua-katua Yahudi mo lubat idoo sulano nalakoyo Yana, “Oilakai naiya Yaku nia kulokis, tobikon komuyu polubat tukon sabel maka tompide sulano polakoyo Yaku?

⁵³ Samba kooloyo Yaku daano tukon komuyu doi Temeneno Na Bonua, bai komuyu aki polakoyo Yaku. Bai naiyamo kotempono kopoo kubaiyano, tempo kuasa lokis naberkuasaan.”

⁵⁴Yanila lakoyo Yesus tukon babayo doi imam babasal nabonua. Petrus tunduwo doi nadodoonan.

⁵⁵Doi basaleanoo tanga-tangano inokoitimo koaung balalangan tukon Petrus ampakon osulang polaing tukon domianoo mo osulang potikunggon.

⁵⁶Daano komeeng kopeleleani boine mokitayo Petrus moosulang doi aung balalanganoo bibilo; maka do peleleanidoo boine palatikanggene Petrus, doibundu bantile, “Namiania budodoo daano polaing-laing Yesus!”

⁵⁷Bai Petrus bangakiyonggon. Yana bantile, “Yaku tutuu aki kutingoniiyo do mianoo!”

⁵⁸Aki namalumbit, meeng komian bailon kitayo Petrus tukon bantile, “Ikoomo koidan komeeng komian doi yanila!” Bai Petrus timbiliyo, “Aki, bolikon yaku!”

⁵⁹Uga-ugaat meeng kojam doibundu, meeng komian bailon koidan bantile tukon kokobukuan, “Takainomo namian nia Yesus napololaing, sabab yana Galilea miano!”

⁶⁰Bai Petrus timbiliyo, “Oila komu makisuut, yaku aki kutoiyo!” Doiya kotempono, daano Petrus mobasilingan, kokuuwano komanuk.

⁶¹Yesus mbaleng tukon kitayo Petrus. Maka Petrus neneeke ko Temeneno lapamo bantile doi yana, “Akiyoon nakokuuwa komanuk oloyo nia, ikoo tolumo luunggon muakiyenggene Yaku.”

⁶²Maka tobuato Petrus idoo tukon kokiil yodi-yodi.

⁶³Komian mo daano mototooliyo Yesus, mae-maenggene tukon bobokiiyo Yana.

⁶⁴Yanila kukupiyo komatano tukon sadaiyo doi Yana, “Coba bantile indee komo bobokiiyo Ikoo?”

⁶⁵Badaang koidan kobantilan-bantilan sosibolii yanila mo otuuke doi Yana.

⁶⁶Dodowasoono, katua-katua Yahudi, imam-imam kapalano, tukon guru-guru agama pototongi, maka Yesus binaba doi yanila na Pangadilan Agama salaano.

⁶⁷“Bontiikene doi kami,” yanila bantile doi Yana, “oilakai Ikoo nia Tomundo Pasalamat?” Yesus timbiliyo, “Kalu yaku bontiikene doikoo, komuyu aki naikon poanggayo.

⁶⁸Tukon kalu Yaku mansadai doi komuyu, komuyu naikon aki potimbiliyo.

⁶⁹Bai tambuuno diabudodoo, Manusia na Pau naikon osulang taalikon bakalinga doi Mian Bisa Mobabasal Konakuasa.”

⁷⁰Yanila sasaibino bantile, “Kalu buno doiya, Ikoo nia Mian Bisa Napau?” Yesus timbiliyo, “Bunomo kopoo bantilano.”

⁷¹Maka yanila bantile, “Akimo napalaluu koidan sakisii! Kita lapamo molongol doi suungo susuungo!”